ПЕЧОРА ВЕСЬТТІ ЛЭБӦ КАЛЯ

Печора весьтті лэбӧ каля.
Ёсь бордъяс кокниӧсь, кыдз ру.
Скӧр тӧлыс юсӧ эз кӧ таляв,
Эз тадзи эськӧ увгы ю.

Веж валнас берег вылӧ кайӧ
Да нюлӧ изсӧ, быттьӧ тшыг.
Он, сылысь вувзясьӧм он сайӧд:
Ас бӧрсьыс кольӧ еджыд быг.

Дзор вӧрыс шыасьтӧг оз вермы —
Пыр шувгӧ, шувгӧ, тӧла кор,
А каля лэбӧ, кӧть оз тэрмӧд
Дзик некод сійӧс асъядор.

Ӧд вӧлись вешйис югыд войыс,
Кӧть вой да лун оз тӧдны кост,
Но лунлы лэбзян пӧра воис —
И каля нинӧмысь оз кос.

Мый сійӧ аддзӧ ӧні юсьыс?
Ас корсянторйыс сюрӧ оз?
То лэччылас, кыдз быттьӧ усяс,
То качас довкнитчылігмоз.

Пӧсь вояс лэбовтӧны ярӧсь,
Тӧд вылӧ уськӧдӧны мем,
Мый каля тулыссянь сёр арӧдз
Ю пӧлӧн лэбӧ нэмысь-нэм.

Сы синъяс улын — кывтысь-катысь.
И каля, сэтшӧм повтӧм код,
Дзик быттьӧ лэбӧ пӧльяс кадысь
Да аддзӧ юлысь выльмӧм от.

Тат вуджліс югыд, вуджліс пемыд,
Тат вуджліс радлун, вуджліс шог,
Тат йӧзлы туй визь ликтысь нэмыс
Пыр кывтӧ мукӧдлаын ног.

Эз быр на лёкыс Му шар вылысь,
Эз быр на веськодьлуныс, эз.
Но вынӧй содӧ каля вынысь,
Тшӧтш сыысь ловлы локтӧ мез.

Ме мичсьыс коддзи и ог паляв:
Ог ачым аснам сӧмын ов.
Мед кадыс вомӧн лэбӧ каля —
Пыр мыйкӧ ассьыс корсьысь лов!

Ме ӧвта сылы кыкнан кинам.
Ме ӧвта сылы кыдзи ёрт.
Печора оз жӧ ӧшйы инас:
Сы весьтын — шевкнитчӧм кык борд.