* * *Шура чойӧлыНоко горӧктыв сійӧс, мый коркӧ Мамным сьывлывліс тэд и мем, Воштӧм надея менӧ оз торк ӧд, Сьылан сямӧй и менам на эм. Ме ӧд тӧда и пукта пыдди, — Вӧрзьӧд сьӧлӧмӧс, да эн пов, — Тэнад гӧлӧсысь гортсяньным быттьӧ Кыла мамнымлысь мелі лов. Тэ мем сьыв, а ме тэ дінын ӧні, Тэнсьыд сьылӧмтӧ кыла кор, Муртса синъясӧс куньла сӧмын — Бара син водзам меддонатор. Тэ мем сьыв. Менам дзик ӧти радлун — Мый эз ӧтнамлы муса мем вӧв Тӧдса дзиръяыс арся садлӧн, Пелысь пуяссӧ пӧрччӧдысь тӧв. Тэ вай сьыв, а мем тӧд вылӧ воас, Вунас шоглунӧй, ог ло скӧр. Сэтшӧм долыд да кокни лоас Муса мамнымкӧд аддзысьны бӧр. Кыдзлысь статьсӧ ме радейта сыысь, Мый и руа, и лысваа тан, Тӧда зарниа кӧсасӧ сылысь, Оз вун сылӧн и веж сарапан. Сійӧн сьӧлӧмам небыдлун содіс — Сьыланкыв саяд, гажмигсор, Тэ мем кажитчан кыдз пуӧн, коді Гортын гажӧдліс кильчӧ дор.
