КЫКӦН

Югыд вой оз вермы овны сьыланкывтӧг:
Сьыланкывйыс бара ласта весьті кывтӧ.
Лӧз ю дорӧ петіс, вензьӧ вӧльнӧй гыкӧд.
А ю берег дорті ветлӧдлӧны кыкӧн.

Ветлӧдлӧны найӧ, шудаӧсь да збойӧсь,
Ликтіс налы шудсӧ ачыс гожся войыс.
Кӧть и лэчыд тӧлыс гортӧ вӧтлӧ найӧс,
Да и рытыввывсянь сім сьӧд кымӧр кайӧ.

Но веж кинас ӧвтӧ кымӧрыслы пожӧм.
Эн вай ыршась, вой тӧв, сы вылӧ и гожӧм.
Весьшӧрӧ мӧй берег окасьӧ веж гыкӧд?
Мед нӧ, мыйта колӧ, ветлӧдлӧны кыкӧн.