ЭНЛЫ, СЬӦЛӦМ

Арся рытын чукыль сайӧ
Вошис катысь пароход.
Мукӧд нывлы веськодь тайӧ.
Менӧ кыскӧ юлӧн от.
Быттьӧ мыйкӧ вошті сэні,
Кӧні муткылясьӧ кӧдж.
Быттьӧ коньӧр сьӧлӧм менам
Пессьӧ гыяс костын тшӧтш.
Быттьӧ сэні сійӧ пессьӧ,
Сӧмын вӧйны, дерт, оз вӧй.
Ок, оз висьлы сійӧ весьсӧ:
Ставсьыс мыжа рулевӧй.
Сыкӧд паныдӧдліс тулыс,
Сыкӧд тӧдмӧдліс причал.
Прӧстӧй кывъяс зонмыс шуліс.
Муслун татшӧмӧн эг чайт.
Регыд бара кывтас сійӧ.
Энлы, сьӧлӧм, энлы, эн.
Ю выв бакенъяслӧн бияс
Рытбыд мигайтӧны мен.