ВОЙВЫЛӦЙ ОЗЫР

Войбыд видзӧдчӧ ваӧ веж козйыс,
Тувсов ытвалы ме моз жӧ рад.
Югыд войясӧн войвылӧй озыр.
Вӧр-ва вӧччӧдысь кад!

Морткӧд кисьмӧны радлунлӧн розъяс.
Гажлун, миянкӧд киась да ов.
Сьыланкывъясӧн войвылӧй озыр,
Нэмным ышӧдӧ лов.

Быттьӧ миянлы медыджыд козин —
Сувтӧ парманым весьтӧ выль лун.
Гырысь уджъясӧн войвылӧй озыр,
Кӧть мед кытчӧ ог мун.

Шудным олӧ оз ичӧтик позйын.
Ыджыд Рӧдина ставнымлӧн эм.
Уна бур йӧзӧн войвылӧй озыр,
Найӧ мусаӧсь мем.