* * *

Велӧд, вокӧ, да эн ылав,
Аслад шуантор кӧ эм,
А то ӧтитор и кылам:
«Тӧдад, кутшӧм миян нэм!
Кутшӧм войтыр ӧні петӧм!
Коммунизмлысь пестам би!»
Чайта, тӧдӧны и тэтӧг,
Кытчӧ туйсӧ кутам ми.
Гора кывъяснад эн нӧбась,
Наӧн ми воктӧ он кый.
Уджач войтыр абу бӧбӧсь,
Вежӧртӧны, кыдз да мый.
Найӧ тэчӧны ӧд асьныс
Югыд, мича лунсӧ, вок...
Коммунизмыс
	— медшӧр праздник —
Ачыс аснас, дерт, оз лок.
Эз на быдӧнлы кӧть чукты
Шудыс — эскӧмным оз быр.
Асьтӧ йӧзсьыс вылӧ пуктӧм
Йӧзсьыс улӧ лэдзлӧ пыр.
Быдтор тӧдысьӧн эн видзӧд,
Быттьӧ важыслӧн на орт.
Овлӧ ыджыд мог и ичӧт,
Но быд бур морт — ыджыд морт.