* * *

Сӧмын ӧтчыд вочаасьлі тэкӧд,
Войпуклі дзик ӧтчыд.
Но он вун. И тэ бӧрся со век ӧд
Паметьнам ме вӧтча.

Тӧда эськӧ, талун тӧда стӧча:
Вояс пырыс ылӧ
Нуис тэнӧ поезд. Но — мый вӧчан? —
Сьӧлӧм тэнӧ кылӧ.

Быттьӧ думнам век на тэнӧ кора.
Думсьыд ӧмӧй пышъян?
Быттьӧ век на тамбур ӧдзӧс дорын
Ӧвтчӧ тэнад чышъян.

Асыввылӧ мунін тэ. Сідз колӧ.
Тэнад — аслад олӧм.
Сэні кыптысь шонді-й татчӧ волӧ,
Тэсянь вайӧ чолӧм.

Вояс, вояс... Кыдз нин кадыс рӧдтӧ
Тэд, роч аньлы, сэні?
Ог нин шу, мый радейта. А прӧстӧ
Пыдди пукта тэнӧ.