АРТ
Ӧти торъя ворсантор
Йӧз:
Вӧрпромхозса директор.
Рабочкомса председатель.
Партячейкаса секретар.
Мирон, ар 50–53 } пӧрӧдчысьяс
Габӧ, ар 40
Катя, ар 25 } кыскасьысьяс
Сеня, ар 15
Легунов — приёмщик.
Зыков — ударник.
Закар — стӧрӧж.
І
Директорлӧн кабинет. Стенын ӧшалӧны кабалаяс. Пызан вылын кабалаяс, тшӧтки да паськыд планъяс.
ДИРЕКТОР (зумыштчӧмӧн ветлӧдлӧ джодж кузя, киас газет «Вӧрлэдзысь», недыр мысти ӧтнас сёрнитӧ корсюрӧ сувтыштлӧмӧн). Некутшӧм дивӧ абу... Сідзи и колӧ вӧлі виччысьны... Ӧні практикаыс ачыс петкӧдліс... Тӧвся заготовка помасис. Результатыс тай со! (Швачкӧ кинас газетӧ, сэсся газетсӧ паськӧдӧ да сувтӧмӧн лыддьӧ.) «Медбӧрӧ кольӧма... Вӧр лэдзан программа тыртӧма сӧмын 80 прӧчент... Позор!..» (Бӧр ёкмыльтӧ газетсӧ да ветлӧдлӧ.) Некутшӧм позор абу... Сідзи и колӧ вӧлі виччысьны... Ме пыр шулі... (Сувтӧ да полӧмӧн моз видзӧдӧ гӧгӧрыс.) Ме первойсяньыс шулі: мися, заданиеыс вывті ыджыд, тыртны он вермы... Ӧні практикаыс ачыс петкӧдліс... Результатыс тай со! (Швачкӧ газетӧ.) Да ладнӧ тай ещӧ 80 прӧчент тыртӧма, ме и сы мындасӧ эг чайтлы... (Пуксьӧ пызан сайӧ, видлалӧ планъяс.) Чайтӧны, сійӧ этша! Видзӧдлам да артыштам. Сійӧ лоӧ 100 кубометр пыдди кӧкъямысдас кубометр, разничаыс зэв ичӧтик — 20 кубометр сӧмын... (Видзӧдӧ план вылӧ.) Менам участокын колӧ вӧлі лэдзны 200 сюрс кубометр, лэдзӧма 160 сюрс, разничаыс 40 сюрс кубометр... Да, бура ыджыд тай вӧлӧм артмӧ... Но мый нӧ ме верма вӧчны? План вӧлі лӧсьӧдӧма... Заданньӧ сетӧма... Йӧз уджалісны... Сэсся ӧд абу куш ме мыжаыс... А мый видзӧдіс рабочком? А мый видзӧдіс партъячейка?.. Бригадаяс вӧліны? — Вӧліны. Ордйысьӧм кыптыліс? — Кыптыліс. Ударничество муніс? — Муніс... Мый трустыс ещӧ колӧ?.. Программа вывті ыджыд вӧлі... Практическӧй уджыс ачыс петкӧдліс... Некутшӧм дивӧ абу... Гижныыд ӧд позьӧ.
ІІ
Пырӧ рабочкомса председатель, киас газет «Вӧрлэдзысь».
РАБОЧКОМ. Зэв ыджыд прорыв тай артмӧма миян участокын, директор! Со, видзӧдлы! (Паськӧдӧ газет.)
ДИРЕКТОР. Тӧда, тӧда, рабочком! (Мыччӧ ассьыс газетсӧ.) Со, со!.. Абу нин прорыв, а по-зор... Кылан, позор!..
РАБОЧКОМ. Кыдзи нӧ сійӧ артмис?
ДИРЕКТОР. Мун да и тӧлкуйт сэсся тэ, кыдзи сійӧ артмис... Ме тӧда, кыдзи артмис, а тэ вот, рабочком, тӧдан он?
РАБОЧКОМ. Шензьыны ог вермы! (Ветлӧдлӧ джодж кузяыс.) Кузь тӧвбыд тышкасим вӧр лэдзан программа вӧсна: кык сӧвещанньӧ вӧлі, ордйысьӧм кыпӧдлім, бригада котыртлім, чорыд заданньӧяс сетлім «на все 100 процентов», ударникъяс весиг вӧліны, а результатыс — со! (Швачкӧ газетӧ да лыддьӧ.) «Медбӧрӧ кольӧма... Вӧр лэдзан программа тыртӧма сӧмын 80 прӧчент. Позор!..» (Директорлы.) Тӧдан кӧ, вай висьтав, директор, мыйла сідзи артмис? (Сувтӧ сы водзӧ.)
ДИРЕКТОР. Тэ ӧд — рабочком, тэнад влиянньӧ улын ӧд вӧліны вӧр лэдзысьясыд... Вот и мӧвпышт ачыд бурджыка, гашкӧ, аддзан сэки помкасӧ. Ме чайта, быд пӧрӧдчысь тӧдӧ, мыйла сідзи артмис да... Тэ эн лэдзчысь тӧдтӧм улӧ, тӧдан да он кӧсйы висьтавныыс...
РАБОЧКОМ. Кӧть юрӧс орӧд — ог тӧд, директор... Уджалан темп эз вӧв вывті омӧль ни... Лоӧ чукӧртлыны производственнӧй сӧвещанньӧ да сэні ставсӧ артавны, эрдӧ петкӧдны.
ДИРЕКТОР. Мый чӧртла ӧні производственнӧй сӧвещанньӧсӧ? Тӧвся сезон помасис, заготовка эштіс... А результатыс тай — со (швачкӧ кинас газетӧ.) Вот, рабочком друг, практикаыс ачыс петкӧдліс... По-зорр! А сӧвещанньӧыд нинӧм оз сет... Программатӧ он нин ӧні тырт.
РАБОЧКОМ. Ме ог программа тыртӧм йылысь шу, а программасӧ тырттӧм йылысь вӧлі кӧсъя сёрнитны. А ыджыд-ӧ миян участокын тайӧ прорывыс?
ДИРЕКТОР. Кутшӧм прорыв?
РАБОЧКОМ. Но... позорыс нӧ?.. Кубометрӧн кӧ шуны, уна-ӧ оз тырмы нормаӧдзыс?
ДИРЕКТОР. 20 прӧчент 200 сюрс кубометр вылӧ лоӧ 40 сюрс кубометр.
РАБОЧКОМ. О-о! Ыджыд тай. Ичӧтджык кӧ эськӧ вӧлі, позис-а...
ДИРЕКТОР. Мый позис?
РАБОЧКОМ. Ударнӧя уджыштӧмӧн, мися, позис на эськӧ тыртны программасӧ...
ДИРЕКТОР. Ӧні? Да ӧд регыд нин юяс воссясны, кылӧдчыны йӧз лӧсьӧдчӧны, а тэ — программа тыртны кӧсъян...
РАБОЧКОМ. Ыджыд тай прорывыс-а, эськӧ позис да. Вӧрад ӧд лымйыд уна на...
ДИРЕКТОР. Сійӧ и эм, рабочком, — ыджыд прорывыс... По-зорнӧй прорыв... А тэа-меа пӧшти ӧти кывйӧ воам: ичӧтджык кӧ эськӧ вӧлі, тыртім программанымӧс «на все 100 процентов». Ме пыр шулі: мися вывті ыджыд. Практикаыс ӧні петкӧдліс...
РАБОЧКОМ (чуймӧ). Тэ сійӧ мый йылысь шуан, директор?
ДИРЕКТОР. Да позор йывсьыд на век... Сэні, мися, сылӧн помкаыс...
РАБОЧКОМ. Кӧні, мыйын? Ме мыйкӧ ог гӧгӧрво тэнсьыд кывъястӧ...
ДИРЕКТОР. Нинӧм сэні и гӧгӧрвоныыс оз ков... Ставыс яснӧ, восьса!.. Результатыс тай — со! (Тапкӧ кинас газетӧ.) «По-зор!..» Кодлы позорыс? Абу, дерт, куш меным, тэныд тшӧтш, рабочком! Ті ӧд ячейкакӧд...
РАБОЧКОМ (торкӧ). А-а, гӧгӧрвои! Со мый вӧлӧм висьталан! (Индӧ веськыдвывланьыс.) Тэнӧ тай, директор, век на веськыдвыв, шыбӧлитӧ вӧлӧм, оп-пор-ту-низм нюрӧ кыскӧ... Лёк делӧыд!..
ДИРЕКТОР. Мыйла веськыдвыв? Ме вӧлі шуа медуна вылӧ нин, мися, 150 сюрс кубометр — лэдзим 160 сюрс... Со, эськӧ 105 прӧчент вӧлі...
РАБОЧКОМ. Неладнӧ сёрнитан, директор! Кымын пӧрӧдчысь уджаліс?
ДИРЕКТОР. Тэ ӧд — рабочком, аслыд колӧ тӧдны, кымын... (Видзӧдлӧ кабалаяс вылӧ.) Бӧръявылас уджаліс став участокас ӧкмыс сё гӧгӧр...
РАБОЧКОМ. Сідз. Кымын кубометрӧн морт вылӧ усьӧ став заготовкаыс?
ДИРЕКТОР (видлалӧ кабалаяс). Час, висьтала, став арифметикаыс менам эм тані... Со: уджаліс медбӧръя декадаас 923 морт. Ставсӧ лэдзӧма 160200 кубометр, сійӧ воӧ 174 кубометрӧн морт вылӧ...
РАБОЧКОМ. А нормаыс вӧлі 315 кубометрӧн. Со кӧні прорывыс тэнад, директор!
ДИРЕКТОР. Мыйла нӧ менам? Тэнад тшӧтш, рабочком.
РАБОЧКОМ. Ме кымынысь тэнсьыд юавлі тӧвнас: кутшӧма, мися, мунӧ заготовкаыд? Тэ пыр шулін — зэв бура, вӧчӧны морт вылӧ шӧркодя 3 кубометрӧн лун... Кӧні нӧ 3 кубометрӧн луныс сэки? Сё лунӧн ӧд морт вылӧ лои жӧ тӧвбыднад уджалӧмыс?
ДИРЕКТОР. Да эськӧ, ӧкмыссё мортыс кӧ пыр уджаліс... А кытысь сы мындасӧ вӧлі босьтныыс?
РАБОЧКОМ. Кытысь нӧ эськӧ бӧръя кадас сюрліс сы мындаыс?
ДИРЕКТОР. Мый нӧ тэ ме вылӧ кутін зыртчыны? «Кытысь сюрліс?» Тревога вӧлі объявитӧма, став йӧзсӧ пӧшти кыскӧма вӧлі вӧрӧ... А тӧвнас, збыльысь, уджалісны бура: мукӧд бригадаяс вӧлі вӧчӧны 5 кубометрӧн лун морт вылӧ...
РАБОЧКОМ. Ӧні ставыс меным гӧгӧрвоана лои, директор. Тэнад вывті личыда мунӧма уджыс. Йӧз уджалӧма этша. Со кӧні и прорывыд!
ДИРЕКТОР. Абу сэні, а вывті ыджыд программа сетісны... Практическӧй уджыс тай ӧні петкӧдліс...
РАБОЧКОМ. Тӧдан, директор, кыдзи татшӧм сёрниыд тэнад шусьӧ?
ДИРЕКТОР. Самӧй веськыд сёрни, правильнӧй.
РАБОЧКОМ. Самӧй веськыдвыв кежӧм, правӧй оппортунизм практическӧй уджын... Таысь тэнӧ оз малыштны юрӧдыд...
ДИРЕКТОР. Тэнӧ сідзкӧ малыштасны, либӧ кыкнанныдтӧ тіянӧс, партъячейкаса секретаркӧд тшӧтш.
ІІІ
Медбӧръя кывъяссӧ шуигӧн пырӧ партъячейкаса секретар. Киас «Вӧрлэдзысь».
СЕКРЕТАР. Сійӧ мый мекӧд тшӧтшсӧ?
ДИРЕКТОР (повзьыштӧмӧн). Сідз шуа, тӧварыш секретар, сёрниӧ со воим рабочкомкӧд да...
СЕКРЕТАР. Зэв тай нӧ омӧльтор артмӧма, ёртъяс... Лыддинныд газетсӧ? (Разьӧ.)
РАБОЧКОМ. Лоӧма тай, шензьыны ог вермы!..
ДИРЕКТОР. Некутшӧм дивӧ сэні абу... Факт!
СЕКРЕТАР. Кыдзи нӧ абу? Этійӧ нӧ мый? (Зурйӧдлӧ чуньнас газетӧ.) Эсы ыджда прорыв артмӧма — позор! Да кыдзи нӧ, ёртъяс, ми допуститім тайӧс? Кутшӧм ногӧн прӧзевайтім? (Ветлӧдлӧ джоджӧдыс.) Полнӧй провал!.. Позорнӧй прорыв! 80 прӧчент!.. Тӧвбыд мырсим, сійӧ и уджным вӧлі — став выннымӧс пуктім вӧр лэдзан фронт вылӧ, а результатыс — позор!
ДИРЕКТОР. Эн сэтшӧма волнуйтчы, тӧварыш секретар... Мый лоӧма — лоӧма нин, ӧні программатӧ он тырт... Ме кымынысь шулі: вывті, мися, ыджыд программаыс... Ӧні — факт! Практикаыс ачыс петкӧд...
СЕКРЕТАР (торкӧ). Эн бызгы, оппортунист!.. Тэ понда татшӧм провалыс артмис... Веськыдвыв кежӧмтӧ практика вылын тэ нуӧдін... Со тай результатыс...
РАБОЧКОМ. Веськыда шуан, секретар ёрт! Ме тані вель дыр нин вензи директоркӧд да став сёрниыс сылӧн оппортунистическӧй... Да ӧд ещӧ миянӧс ачыс мыжалӧ.
СЕКРЕТАР. Миянӧс?
РАБОЧКОМ. Мун да сэсся тӧлкуйт сыкӧд.
ДИРЕКТОР. Мый нӧ эськӧ, тіян ногӧн, ме ӧтнам мыжа? Менам ас пайысь примитӧма вӧлі быдсяма мераяс... Заданньӧ сетӧма...
СЕКРЕТАР. Вайӧ ӧні жӧ, пырысь-пыр вӧчамӧй сӧвещанньӧ да сэні официальнӧя сёрнитамӧй. (Босьтӧ улӧс да пуксьӧ матӧджык пызан дорӧ.)
РАБОЧКОМ. Ме ӧнтай вӧлі шуа жӧ нин...
ДИРЕКТОР. Ме ог возражайт. (Ставныс пуксялӧны.)
СЕКРЕТАР. Сӧвещанньӧ лыддя воссьӧмӧн. Рабочком секретарав.
РАБОЧКОМ. Кыдзи шуны тайӧ сӧвещанньӧсӧ?
ДИРЕКТОР. Производственнӧй сӧвещанньӧӧн.
СЕКРЕТАР. Гиж прӧстӧ сӧвещанньӧ куимлысь...
ДИРЕКТОР. Треугольниклысь нӧ.
СЕКРЕТАР. Вот, вот, треугольниклысь... Сёрни лоӧ ӧтитор йылысь: мыйла артмис вӧр лэдзӧмын прорыв...
ДИРЕКТОР. Сы йылысь уна сёрнитны нинӧм.
СЕКРЕТАР (ӧлӧдӧ). Шш-ша! Пӧрадок эн торк, директор ёрт. Ме тэныд кыв эг на сетлы.
ІV
Пырӧ стӧрӧж. Киняулас вайӧ ёкмыль.
СТӦРӦЖ. Пошта вылысь сетісны со. (Пуктӧ ёкмыльсӧ пызан вылӧ.)
ДИРЕКТОР (босьтӧ). Видзӧдлам, мый татшӧмыс.
СЕКРЕТАР. Бӧрвылас видзӧдлан, ӧні сӧвещанньӧ колӧ нуӧдны...
ДИРЕКТОР. Ті вай нуӧдӧ, а ме ньӧжйӧник разя... Ог мешайтны кут. (Стӧрӧжлы.) Тэ, Закар, мун сэсся...
Стӧрӧж петӧ.
V
ДИРЕКТОР (разьӧ ёкмыль). Мый бара татшӧмыс-а? Рӧгӧза пытшкӧ гартӧма мыйкӧ...
СЕКРЕТАР. Шыбитлы вай, директор, сійӧс. Бӧрвылас видлав.
ДИРЕКТОР. Нинӧм, нинӧм. Ті вай нуӧдӧй водзӧ сӧвещанньӧсӧ... Ме ог мешайт... Час, видзӧдла нин... (Паськӧдӧ.)
СЕКРЕТАР. Ёртъяс! Колӧ решитны ыджыд политическӧй вопрос. Тайӧ вопросыс инмӧ не толькӧ миян участоклы, а став Коми областьлы тшӧтш. Вӧр лэдзан фронт вылын лоӧма зэв лёктор, прорыв, веськыда кӧ шуны — позор!..
Директор сувтӧ да паськӧдӧ буретш медбӧръя кывъяс дырйи рӧгӧза знамя, кытчӧ гижӧма кыза сьӧд краскаӧн «Позор».
ДИРЕКТОР. Со тай — позор!
РАБОЧКОМ (сувтӧ, шемӧс). Позор! Знамя!?
СЕКРЕТАР (видзӧдӧ знамя вылӧ, сэсся сы вылӧ кинас индӧ). Вот!.. Вот, ёртъяс, мый ми заслужитім вӧр лэдзан уджын! Позорнӧй рӧгӧза знамя!.. Переходящӧй знамяыс тайӧ медбӧрын веськаліс миянлы. Водзӧ ыстыны некытчӧ — тӧвся удж эштӧма, прорыв бырӧдны некыдзи... Любуйтчӧй, ёртъяс!..
ДИРЕКТОР (тубыртӧ знамясӧ). А ми некодлы тайӧс огӧ петкӧдлӧй. Дзебам! (Сюйӧ пызан улӧ.) Вот, мед сэні овлас, бӧрти Закарлы тшӧкта...
СЕКРЕТАР (торкӧ, сьӧлӧмсьыс). Кыскы бӧр сэтысь, директор! Паськӧд да эстчӧ (индӧ бӧрвылас) стенас ӧшӧд, мед быдӧн аддзыласны!
ДИРЕКТОР (кыскӧ да разьӧ знамясӧ). Напраснӧ!
СЕКРЕТАР. Абу напраснӧ, директор ёрт! Заслужитӧма тайӧ знамясӧ асланым уджӧн...
РАБОЧКОМ. Директорлы, тыдалӧ, оз кажитчы знамяыс...
ДИРЕКТОР. Тэныд кӧ кажитчӧ, на босьт (чургӧдӧ) да ӧшӧд рабочкомад... Ме, кыдз администрация, официальнӧя заявляйта: тайӧ позорнӧй знамясӧ ме эг заслужит. Ме пыр шулі, мися, программа вывті ыджыд.
СЕКРЕТАР. Тырмас сы йылысь! Кывлім нин...
РАБОЧКОМ. Век на веськыдвыв кусыньтӧ...
ДИРЕКТОР. Факт!.. Практикаыс ачыс петкӧдліс... Со тай результатыс. (Тапкӧдӧ знамясӧ.) Босьтӧй кодныдкӧ ті: ті ӧд жмитінныд ыджыд программасӧ сюйны!..
СЕКРЕТАР (рабочкомлы). Вай гиж директорлысь кывъяссӧ... Явнӧй оппортунизм!..
ДИРЕКТОР. Гижӧй, мый окота, а тайӧ знамясӧ ме аслым учрежденньӧӧ ог ӧшӧд... Ме официальнӧя заявляйта кыдзи директор... Мед рабочком босьтас.
РАБОЧКОМ (гижигтырйи). Мыйла ме босьта?
ДИРЕКТОР. А мыйла ме босьта? Тэ ӧд вӧр лэдзысьяснас веськӧдлан... Либӧ дзебам!
СЕКРЕТАР. Ланьтлӧй, ёртъяс! Ставнымлы лоӧ позорсӧ нуны — ставнымлӧн тані мыжыс эм... Кытчӧ нӧ дзебан? Уджалысь йӧзыд ӧд тӧдӧны, код ордын позорнӧй знамяыс... Кӧть синнаныс и оз аддзыны, да сьӧлӧмнаныс дзоргӧны миян участок вылӧ... А знамялы ӧшаланіныс — тані, дерт. Вӧрпромхозын...
ДИРЕКТОР. Меным сӧвсем оз кажитчы тайӧ знамяыс! Ӧд — по-зор! (Ӧшӧдӧ знамясӧ стенӧ.)
РАБОЧКОМ. Позор нин гижӧма да, дерт, позор. Ме чайта, некодлы оз кажитчы...
СЕКРЕТАР. Кодсюрӧлы, ёртъяс, тайӧ знамяыс зэв ещӧ кажитчӧ, нимкодясьӧны, жеръялӧны. Медвойдӧр нимкодясьӧ миян асланым классӧвӧй враг — кулак! (Тані позьӧ петкӧдлыны лёкысь сералысь кулакӧс: мыччысьлас мед сайсянь да сералігтырйи кинас индӧ знамя вылӧ. Позьӧ петкӧдлыны и карикатура картинаяс. Водзӧ сідзи жӧ, сёрни сертиыс мыччӧдлыны мукӧд врагъясӧс: ӧтарсянь и мӧдарсянь петкӧдчылӧмӧн.) Колӧ веськыда шуны: эз вӧв миян кулакъясӧс чорыдджыка личкыштӧм. Ни ӧти кулак эз тырт ассьыс нормасӧ. Мыйта вӧчис — вӧчис. Кубометрӧн лун кӧ вӧчис — шань. Со кӧні ӧти прорыв миян! Сэсся эз вӧв чорыд тыш накӧд нуӧдӧма, а найӧ эз чӧв овны, мукӧд уджалысьяссӧ тшӧтш падмӧдісны. Быд праздник кежлӧ вӧрысь петавліс пӧшти джын йӧзыс. Сідзкӧ ми эг вермӧ пуктыны вӧр лэдзысьяс пӧвстын колана уджнымӧс. Тайӧ — мӧдтор, коді отсаліс прорыв вӧчны. Сэсся, ёртъяс, ми пыр горзам: дзенгам враглы плешас керйӧн да шпалйӧн. А ӧні ми кыдзи вермам дзенгыны? Программа эз ло тыртӧма — керйыд да шпалйыд миян оз судз врагыдлы кыз плешас. Вот сы понда тшӧтш нимкодясьӧ буржуй-капиталист. (Мыччӧдлыны сійӧс.) Ті тӧданныд, став мувывса капиталистъяс ӧні шызьӧмаӧсь, повзьӧмаӧсь миян пятилеткаысь, дрӧжжитӧны сыысь, лэптӧны быдсяма лӧжсӧ — «мырдӧн пӧ вӧрын уджӧдӧны», тупкӧны туй заграничаӧ вӧр нуӧмысь. Зыртчӧны пятилетка орӧдны.
РАБОЧКОМ. Американскӧй Фишъяс сэні. (Мыччӧдлыны сійӧс.)
ДИРЕКТОР. Збыльысь ӧд сідзи и эм. Ставыс воссьыны быттьӧ пондіс...
СЕКРЕТАР. Да, американскӧй Фишъяс, английскӧй Хиксъяс (мыччӧдлыны), прансузскӧй Пуанкареяс (мыччӧдлыны) — став буржуазияыс!.. А ми, программа тыртӧм пыдди, вӧчим татшӧм прорыв. Тані, дерт, миян веськыдвыв кежӧм дай ёна кежӧм артмис. Программа эз вӧв ыджыд. Бура кӧ вӧлі уджсӧ организуйтӧма, тайӧ ӧмӧй программа! Бӧръявылыс уджаліс 900 морт. Первойсяньыс кӧ джын мындаыс бура уджаліс — и сэні на ӧд эськӧ тыри содтӧдӧн 200 сюрс кубометрыд. Кармановъяс да Ершовъяс вӧчӧны кыскӧмӧн тшӧтш 1000 кубометрӧн. А ми эгӧ вермӧ йӧзсӧ организуйтны. Эськӧ ӧні вывті нин кокни вӧлі вӧр лэдзан норматӧ тыртны да: кырссьыны воддза моз оз ков ни нинӧм... Эз кӧ тревога кыпӧдлыны, ми и 80 прӧчентсӧ на эгӧ вермӧ лэдзны, гашкӧ. Ордйысьӧм зэв лёка муніс, бригада кык ли куим сӧмын уджаліс... А кымынысь ми вӧрас кайлім да видзӧдлім, кутшӧма уджалӧны? Ме ӧтчыд ветлі...
РАБОЧКОМ. Ме ӧтчыд жӧ!.. Некор дзик...
ДИРЕКТОР. Ме ӧтчыд жӧ кытшовтлі.
СЕКРЕТАР. Вот, ёртъяс, кутшӧми и эм миян производстволань банӧн бергӧдчӧмным. Веськыда позьӧ шуны: вӧр лэдзан удж ми эгӧ оценитӧ. Артмис сплошнӧй прорыв, веськыдвыв кежӧм... Тайӧс миянлы колӧ признайтны.
ДИРЕКТОР. А позорыс миянлы кольӧ жӧ всё-таки?
СЕКРЕТАР. Асьным допуститім сійӧс, директор ёрт! Кытчӧ сыысь вешъян? Он нин дзебсьы ӧні. Сідз протоколас ставсӧ гижам дай ыстам райкомӧ, мед сэні сэсся судитасны. Вот и ставыс. Сӧвещанньӧ лыддя тупкысьӧмӧн.
ДИРЕКТОР. Лёк делӧыд. Вермасны чорыда мыждыны, торъя нин менӧ кыдз директорӧс...
СЕКРЕТАР. Оз, дерт, малыштны. Сӧмын ӧні делӧсӧ сійӧн он нин веськӧд. Водзӧ кежлӧ, ёртъяс, оз ков тадзи, чунь пыр видзӧдӧмӧн, уджавны. Классӧвӧй врагыд, мися, оз узь. Миянлы колӧ сюся видзӧдны, кыдз шуласны, — зорко гляди!..
РАБОЧКОМ. Кыдзкӧ нӧ, збыльысь, оз позь этша чинтыштны прорывсӧ?
СЕКРЕТАР. Позорсӧ? Кыдзи чинтан?
ДИРЕКТОР. Абу ӧд эськӧ вывті сэтшӧм ыджыд прорывыс — 40 сюрс кубометр...
СЕКРЕТАР. Не-ля-мын сюрс! Абу и зэв ичӧт... Да ӧд кадыс кольӧма нин. Кӧнӧсь уджалысьясыд? Гортаныс нин ставныс. Кыдзи тыртан?..
РАБОЧКОМ (юрсӧ друг лэптӧ). Уджалысьяс вӧрынӧсь на.
СЕКРЕТАР (чуймӧмӧн). Ӧні? Не может быть!
ДИРЕКТОР. Унаӧн нин петӧмаӧсь.
СЕКРЕТАР. Кылӧдчыны колӧ лӧсьӧдчыны, регыд юяс воссясны, кутшӧм нин вӧрын ӧні уджалӧм.
РАБОЧКОМ. Гашкӧ нӧ, тайӧ лунъясас и воалісны нин да, ог тӧд. Напервой тай, воддза лунъясас некод на эз вӧв-а.
VІ
Пырӧны Мирон, Габӧ, Катя да Сеня. Ставныс уджалан паськӧмаӧсь, воддза кыкыслӧн кианыс чер да пила.
СЕКРЕТАР. Со тай, медбӧръяясыс нин, буракӧ, воисны.
МИРОН. Чолӧм! Воим, воим.
СЕКРЕТАР. Вӧрсянь?
МИРОН. Сэсянь, дерт.
РАБОЧКОМ. Медбӧръя йӧз нин ті?
ГАБӦ. Кыдзи нӧ медбӧръя йӧз? Норма тыртім дай локтім. Медводз тыртім.
ДИРЕКТОР. Тыртінныд?
МИРОН. Ме эськӧ пӧрысь нин дай сэн на эг медбӧрӧ кольччы. Содтӧдӧн тыртім, тӧварыш директор! Бӧръя дас лунсӧ ударнӧй бригадаын тшӧтш уджалі...
СЕНЯ (гӧгӧр видзӧдліс да знамя вылысь гораа лыддис). «Позор».
ГАБӦ (Сенялы). Кутшӧм позор? Кодлы?
СЕНЯ. То тай рӧгӧза вылас гижӧма: «Позор».
ГАБӦ. Мыйла нӧ сэтчӧ позора рӧгӧзасӧ ӧшӧдӧмныд?
СЕКРЕТАР. Сійӧ — позорнӧй знамя миян участокын норма тырттӧмысь ыстісны. Инмӧ ставнымлы — миянлы дай тіянлы тшӧтш. Со ӧд кутшӧм мисьтӧм!..
ГАБӦ. Эн лешкӧд, зонмӧ! Кутшӧм али позор миянлы? Мыйысь?
МИРОН. Пӧдлинӧ, мыйсяма позор миянлы? Кутшӧм лешак татчӧ ӧшӧдіс сійӧс? (Кӧсйӧ нетшыштны.)
СЕКРЕТАР. Эн нетшышт, ёрт!
ДИРЕКТОР. Ме ӧшӧді сійӧс.
МИРОН. Тэ? Мися, прамӧй морт татшӧм рӧгӧзатӧ оз жӧ ӧшӧд... Гортад ну да ӧшӧд, мед тані эз вӧв!..
РАБОЧКОМ. Энлы тэ, дядьӧ, сэтшӧм лёкысь... Видзӧд, миян участокын лоӧма прорыв...
ГАБӦ. Мый сійӧ прорывыс?
СЕКРЕТАР. Час, ме висьтала. Прорывыс со мый лоӧ: программа эгӧ вермӧ тыртны, оз судзсьы 40 сюрс кубометр...
ГАБӦ. Нелямын сюрс?! Но, лешакӧ!
МИРОН. Сӧрӧны! Нелямын сюрс мать оз-ӧ ков тіянлы? Норма эгӧ тыртӧ? Коді висьталӧ?
СЕКРЕТАР. Директор висьталӧ дай газетӧ со гижӧмаӧсь. (Матыстлӧ газетсӧ.)
МИРОН. «Директор висьталӧ». Мыйӧн нӧ сійӧ тӧдӧ? Ӧтчыд ӧд тӧвбыдӧн нырсӧ пу костӧд мыччыліс директорыд!
РАБОЧКОМ. Сідзи, ёртъяс, артмӧма.
ГАБӦ. Тэ нӧ коді?
РАБОЧКОМ. Ме — рабочкомса...
ГАБӦ. О, но, тӧдам! Вӧрас нӧ тэ ветлін эн?
РАБОЧКОМ. Ӧтчыд волі жӧ...
МИРОН. Ставныд ӧткодьӧсь! Пукаланныд тані да вӧчаланныд кутшӧмкӧ позоръяс. А ми вӧрын уджалім ударнӧя... Со, аддзанныд (лэптыштлӧ тюнисӧ), тюниӧй пыдӧстӧм. Тӧвбыд кори: кӧть дӧмас вылӧ, мися, вайыштӧй кутшӧмкӧ гынтор да нинӧм эз сетны. Кок кынмӧ... Со кыдзи уджалім, а ті лэптанныд миян вылӧ кутшӧмкӧ позор... Бӧръя кадас 8 кубӧн лун вӧчим!...
СЕКРЕТАР. Сідзкӧ, дядьӧ ёрт, тэ бура уджалӧмыд. А мукӧдъяс эз тыртны. Прӧстӧ ӧд эз ыстыны позорнӧй знамясӧ!
ГАБӦ. Кодъяс нӧ «мукӧдъясыс»? Гашкӧ, ми да?
СЕКРЕТАР. Ӧтув артмӧма ставнымлӧн, ӧтув.
ГАБӦ. Тіян, гашкӧ, куим друглӧн и артмис, а миян, наперво, эз ло. Ми уджалім пыр сьӧлӧмсянь. Дерт, вӧліны и дышӧдчысьяс...
СЕКРЕТАР. Вот-вот! Вӧліны, дерт.
ГАБӦ. Миянӧс оз позь шуны дышъясӧн. Уджалім зіля. А мыйӧн кывлім, буржуйяс пӧ шуӧны мырдӧн миянӧс уджӧдӧмӧн да кыпӧдӧны быдсяма лӧжсӧ, ещӧ на ёнджыка босьтчим, мед тӧдасны проклятӧйяс!.. Мукӧд дырйиыс сёйны вӧлі огӧ эштӧ — полам, мед эськӧ мукӧд тӧварышъяс оз ордйыны миянӧс. Чеччан да он и мыссьыв вӧлі — пӧстать вылӧ мунігӧн чужӧмтӧ гыӧра ройӧн чышкыштан, дай олас... Бӧръявылас вывті нин ёна личким удж вылас, нырысь и синмысь би петӧ — уджалім. Вӧчам вӧлі 10 кубометрӧдз луннас! Тревога пӧ вӧр лэдзан уджын, висьталісны, да асьнымӧс эгӧ жалитӧй! Со!
СЕКРЕТАР (ас котырлы). Кыдзи нӧ сэсся татшӧм ударнӧя уджалысьяснас прорывыс артмис, ёртъяс? Видзӧдлӧй ті асьныд — тайӧясӧс ӧд позьӧ шуны трудӧвӧй геройясӧн!
ДИРЕКТОР да Рабочком (йӧз вылӧ видзӧдӧмӧн). Шензьыны сӧмын вермам.
СЕКРЕТАР. А ме нинӧм ог гӧгӧрво.
МИРОН. Тані пукалігад нӧ мый тӧдлан. Удж пытшкас кӧ эськӧ сунлінныд — и гӧгӧрвоинныдджык-а.
ДИРЕКТОР. Ті кутшӧм делянкаын уджалінныд?
МИРОН. Ми уджалім Руд ёльын.
ДИРЕКТОР. О, главнӧй участокас!
МИРОН. Главнӧй, дерт. Морт 250 кымын сэні вӧлі йӧзыс.
ГАБӦ. Дай миянын — Юрган кӧджын — эз вӧв этша, гашкӧ, 300 морт куш пӧрӧдчысьыс вӧлі.
ДИРЕКТОР. Сійӧ — основнӧй участок жӧ...
СЕКРЕТАР. Ставныс сэні бура уджалісны, тіян моз жӧ?
МИРОН. Кызвыныс. Бӧръя вежонсӧ торъя нин ёна зэвтчылім, дзик ставӧн, позьӧ шуны. Быдӧн тай вӧлі кайтӧны: вайӧ жӧ пӧ медбӧръясьыс чорыдджыка ещӧ ӧдӧбтыламӧй.
ГАБӦ. Миян моз жӧ тай сідзкӧ.
РАБОЧКОМ. Сідзнад ті абу на медбӧръя йӧз?
МИРОН. Медводдзаяс кӧ-а. Медводз норманымӧс тыртім... Ӧні гортӧ локтам. Рӧщӧтла татчӧ пырим.
РАБОЧКОМ. Ме ог сы йылысь юав, а, мися, вӧрас колины на йӧзыс?
МИРОН. Уджыс эштіс жӧ нин ставыс, петісны унаӧн миянкӧд тшӧтш, кодсюрӧ колины на.
ГАБӦ. Пӧрӧдчыныыд эськӧ позьӧ на вӧлі, да кыскасьныыд оз нин шогмы.
ДИРЕКТОР. А, пӧдлинӧ, кутшӧма муніс кыскасьӧмыс? Дерт, джын керйыс, кӧнкӧ, места вылас коли...
КАТЯ. Места вылӧ, зонмӧ, эгӧ эновтӧ, эз кӧ кыдзкӧ тӧдлытӧг коль, — ставсӧ кыским катище вылӧ. Бӧръявылас тай ёна ульдіс да, тшыксис ледянкаыс-а, лои войяснас уджавны. Мый пӧрӧдӧны вӧлі, вочасӧн ставсӧ и кыскам...
СЕНЯ. Мукӧдыс вӧлі шуӧны: ледянкатӧ пӧ колӧ водзджык вӧчны, ёнджык пӧ сэки лоӧ да дырджык сулалас.
СЕКРЕТАР (директорлы). Кылан, директор, мый висьталӧ детинаыс? Тшупышт кытчӧкӧ да мӧдысь кежлӧ эн вунӧд.
КАТЯ (индӧ знамя вылас). Тайӧ лёк рӧгӧза пластыс ӧд миянлы оз жӧ инмы!
СЕКРЕТАР. Кыдз ӧні и шуан сэсся? Тайӧ быдӧнлы эськӧ инмӧ, став участокыслы... Сӧмын, тыдалӧ, тіянӧс ордйӧдны ковмас... Миянлы, буракӧ, куим друглы лоӧ та вылӧ любуйтчыныыс.
ГАБӦ. Аслыныд нин, дерт, лоӧ кольӧдны...
VІІ
Пырӧ Легунов.
ДИРЕКТОР. Но, тӧварыш Легунов воис!.. Старшӧй приёмщик тайӧ...
ЛЕГУНОВ. Чолӧм ставныдлы!
СЕКРЕТАР. Здоровйӧ! Вӧрсянь?
ЛЕГУНОВ. Сэсянь.
ДИРЕКТОР. Но мый? Кутшӧма муніс удж тэнад участокын? Кыдзи программа? Кутшӧм результат?
ЛЕГУНОВ. Ничево, тӧварыш директор, бӧръя помас зэлӧдчылім прамӧя. Программа тыртім сполна дай ичӧтик содтӧд на артмис.
МИРОН. Сідз жӧ и миян кварталын... А тані со мыйӧн миянӧс укӧрайтӧны. (Индӧ знамя вылӧ.)
ЛЕГУНОВ. «Позор»... Мыйла нӧ тайӧ тані?
СЕКРЕТАР. Тайӧ — переходящӧй позорнӧй знамя, местаысь местаӧ новлӧдлан знамя. Кӧні медомӧля вӧр лэдзӧм мунӧ — сэтчӧ и ыстыссьӧ...
ЛЕГУНОВ. Миян кварталлы, наперво, тайӧ оз мун-а...
РАБОЧКОМ. Став участокыслы ӧтвылысь мунӧ, тӧварыш. Тіян кварталӧ тшӧтш инмӧ и... Прорывыс ӧд тшӧтш сэні эм?
ЛЕГУНОВ. Воддза тӧлысь помас лолі жӧ. Кулакъяс вӧлі лэптӧмаӧсь сёрни: оз пӧ ков ёна уджавны, Англия пӧ да Америка видӧны, грӧзитчӧны пӧ ёна уджалӧмысь война кыпӧдны. Кодсюрӧ сэсся и личӧдӧмаӧсь уджалан ӧдсӧ... Мыйӧн тӧдмалім да висьталім, мый вӧсна кавшасьӧны буржуйяс, ёна ӧдӧбтісны сэки: ставныс пӧшти котыртчисны бригадаясӧ, бырӧдісны воддза прорывсӧ дай содтӧдӧн на программа тыртісны.
СЕКРЕТАР (ас котырыслы). Ме тай висьтавлі, мися, врагыд оз узь. А ми нинӧм на ӧнӧдз эгӧ кывлӧ.
ДИРЕКТОР. Первойысь кыла татшӧмторсӧ.
МИРОН. Кор нӧ сетанныд рӧщӧтсӧ миянлы?
ДИРЕКТОР. Лун-мӧд мысти пыралӧй. Сведениеяссӧ ваясны да, вӧчам.
ГАБӦ. А тайӧ лёк рӧгӧзаыс мед эз вӧв тані! Кыдз гажныд, а идралӧй татысь!.. Прӧщайтлӧй!
Петӧны уджалысь йӧз сёрнитігтырйи.
VІІІ
СЕКРЕТАР. Ӧні аддзанныд, ёртъяс, миян кольсьӧма бокӧ вӧр лэдзан уджсьыд.
ДИРЕКТОР. Кыдзи бокӧ? Ӧні тыдовтчыны нин пондіс, абу бокын сулавсьӧма.
СЕКРЕТАР. Бокын, ме шуа, директор ёрт, — веськыдвыв бокын... Со ӧд уджалысьясыд мый висьталісны. Кывлін? Вот! Ӧні колӧ мӧвпыштны, кыдзи вештыны позорнӧй пятнасӧ...
ІХ
Пырӧ Зыков. Киас ичӧтик кабала тюрк.
ЗЫКОВ. А, буретш став начальствоыс ӧтилаын! Бур!.. Чолӧм-здорово, руководительяс! (Киасьӧ быдӧнкӧд. Ставныс шензьӧмӧн видзӧдӧны сы вылӧ.) Мый йылысь нин соборуйтанныд, тӧварышъяс?
СЕКРЕТАР (индӧ знамя вылӧ). Со тай гӧснеч воис миянлы.
ЗЫКОВ. «Позор»... (Сералӧмӧн.) О-хо-хо, здорово! Награда тай бур!
ДИРЕКТОР. Бур, кӧть кык дор вур!..
ЗЫКОВ. А складнӧя ӧд шуин, тӧварыш директор: збыльысь, бур, кӧть кык дор вур да пачӧ гур!.. Хо-хо-хо!..
СЕКРЕТАР. Некутшӧм теш сэні абу, тӧварыш. Коді тэ ачыд?
ЗЫКОВ. Кыдзи нӧ абу теш, тӧварыш... Ме коді? Вунӧдін ӧмӧй?
СЕКРЕТАР. Мыйкӧ эськӧ быттьӧ тӧдса чужӧмыд да, ог тӧд...
ЗЫКОВ. Кысь нӧ миянӧс тӧдны... Абу дивӧ миянӧс вунӧдныыд, кор став вӧр лэдзан фронтсӧ весиг ті вунӧдӧмныдӧсь... Ме сэсся абу татчӧс дай... Ме — ВКП (б) обкомса бригадаысь — ударник. Ӧні ветлім сквӧзнӧй бригадаӧн, волім быд кварталӧ... Шуны кӧ, чеччыштім тіян юр вомӧн.
ЛЕГУНОВ. Збыльысь, волісны и миян кварталӧ тайӧяс да ёна ызйӧдісны уджалысьясӧс норма тыртны...
СЕКРЕТАР. Удайтчис?
ЗЫКОВ. Тӧдан мый, — абу сэтшӧм крепосьтыс, кодӧс оз вермыны босьтны большевикъяс!.. Колӧ сӧмын кӧсйӧм да водзмӧстчӧм. А ті, ёртъяс, веськыда шуа, места вылад пукаліганыд измӧмныд да веськыдвыв оппортунизм нюрӧ вӧйӧмныд... Результатыс тай сэсся со! (Индӧ знамя вылӧ.) Тайӧ, тӧварышъяс, тіянлы медсясӧ и ляскысьӧ, а оз вӧр лэдзысьяслы. Найӧс колӧ кужны котыртны да мобилизуйтны ӧнія гырысь могъяс гӧгӧрыс. А ті энӧ вермӧ... Вот сэсся и любуйтчӧй!.. Колі эськӧ куимӧс татшӧмсӧ ыстыны, быдӧнлы мед вӧлі, морт ӧтиӧн. Но тайӧ нин, ме чайта, мӧрччас.
СЕКРЕТАР. Веськыда, тӧварыш, сёрнитан. Збыльысь ми прӧзевайтім. Артмис прорыв...
ДИРЕКТОР. Вывті жӧ ыджыд программаыс вӧлі...
ЗЫКОВ. Со тай кӧні оппортунистыс! Тайӧ нӧ программа, серӧднӧя кӧ уджавны? А мый нӧ тэ кутан сьывны мӧд во, коймӧд во?
СЕКРЕТАР. Ми осудитім нин директорӧс...
ЗЫКОВ. Да, ладнӧ ещӧ ми кутчысим бырӧдны прорывсӧ, эськӧ делӧыд лёк лоис...
ДИРЕКТОР. Дай бырӧдінныд?
ЗЫКОВ. Бырӧдім!.. На, видзӧдлы медбӧръя сводкаяссӧ да лыддьы-артышт став результатсӧ. (Сетӧ кабаласӧ.)
ДИРЕКТОР (ӧдйӧ разьӧ). Не может быть...
Ставныс видзӧдӧны кабалаяс вылӧ. Директор вашъялӧ.
ДИРЕКТОР. Быд кварталысь эм!..
СЕКРЕТАР. Вай тшӧтки вылад тэчлы ӧдйӧджык! (Директор тэчӧ.)
ДИРЕКТОР. Вот, чёрт возьми!.. 206 300 (кыксё квайт сюрс да куимсё) кубометр!.. Уна, тӧварышъяс!.. 103%! Молодцы!..
ЗЫКОВ. Уджалысьяс оз на быдӧн тӧдны вӧр лэдзӧмлысь могсӧ. Унаӧн на лыддьӧны сійӧс кутшӧмкӧ временнӧй уджӧн. Кор висьталан налы: вӧр промышленность подулын, мися, тэчсьӧ Войвыв крайын социализм, — найӧ гӧгӧрвоӧны бура дай сьӧлӧмсьыс кутчысьӧны уджас. Кулакъяслы лич лолыштны ӧні оз ков сетны. Найӧ мый сӧрӧны, тӧданныд онӧ ті?
СЕКРЕТАР. Миянлы ӧні на висьталіс толькӧ приёмщик: видчӧны пӧ Америка да Англия ёна уджалӧмысь...
ЗЫКОВ. Но вот шуӧны: миянӧс пӧ ӧні он зэв кесйӧд уджнад, миянӧс пӧ дорйӧны Америкаса да Англияса господаяс... Со ӧд... Мыйӧн вӧр лэдзысьяслы ми висьталім ставсӧ, найӧ веськыда биӧн быттьӧ ӧзйисны удж вылӧ.
РАБОЧКОМ. Кыдзи нӧ эськӧ этійӧ позорнӧй знамяыс веськаліс миянӧ?
ЗЫКОВ. Воддзасьыс на кӧнкӧ. Сэки ӧд ыджыд прорыв артмылӧма... Ӧні, дерт, татысь кытчӧкӧ мӧдлаӧ ыстасны, а гашкӧ, и некытчӧ оз инась, быдлаын кӧ бура помалісны заготовкасӧ.
СЕКРЕТАР (видзӧдӧ газетӧ). Ёртъяс! Збыльысь тай тайӧ важсьыс! Сё морӧ робота!
Ставныс видзӧдӧны газетӧ, сэсся нимкодясьӧны.
ДИРЕКТОР. Кысь, мися, оз подкодит миянлы да...
СЕКРЕТАР. Подкодитӧма тай эськӧ да, тӧварышъяс асланыс ударнӧй уджнаныс вештісны-а...
ЗЫКОВ. Уджалысь коми войтырлӧн тырмис на энтузиазмыс!..
СЕКРЕТАР. Ӧні выльысь вӧчам сӧвещанньӧ... Вай, рабочком, гиж. (Рабочком лӧсьӧдчӧ гижны.) Тайӧ лоӧ производственнӧй сӧвещанньӧ. Гиж: участвуйтісны тшӧтш старшӧй приёмщик да обкомса ударнӧй бригадаысь член... Сёрни лоӧ: вӧр лэдзан уджлӧн итогъяс...
ДИРЕКТОР. Результатъяс.
СЕКРЕТАР. Ӧткодь, гиж нӧ результатъяс. Ме чайта, веськыда предложениеяс колӧ сетавны? Кодлӧн мый эм?
РАБОЧКОМ. Менам эм: медбур вӧр лэдзысьясӧс премируйтны...
ЗЫКОВ. Колӧ. Фондыс ӧд тіян эм?
ДИРЕКТОР. Эм, вӧрзьӧдлытӧм на...
ЗЫКОВ. Со ӧд, и сэні тшӧтш прорыв.
СЕКРЕТАР. Колӧ, ме ногӧн, медвойдӧр пасйыны ассьыным нелючкинымӧс. Ӧнтай шулім нин сы йылысь. Веськыдвыв кежӧм... Воддза прорывысь позорнӧй знамя ыстӧм признайтны веськыдӧн. Сӧмын шуны: прорыв бырӧдӧма, вӧр лэдзан программа тыртӧма 103 прӧчент вылӧ.
ДИРЕКТОР. Правильнӧ, 103 прӧчент.
СЕКРЕТАР. Кодлӧн ещӧ кутшӧмкӧ содтӧд эм абу?.. Некодлӧн абу. Сідзкӧ сӧвещанньӧ лыддя...
ЗЫКОВ (тэрмасьӧмӧн торкӧ). Менам ещӧ эм.
СЕКРЕТАР. Мый?
ЗЫКОВ. Пырысь-пыр жӧ босьтчыны вӧр кылӧдан уджӧ.
СЕКРЕТАР. Возраженньӧ оз ло?
КОДСЮРӦ. Оз.
ЗЫКОВ. Сэсся классӧвӧй врагӧс ёнджыка топӧдны да сы бӧрся сюсьджыка видзӧдны.
СЕКРЕТАР. Прӧтив, дерт, некод абу?
КОДСЮРӦ. Абу.
СЕКРЕТАР. Сэсся кодлӧнкӧ эм абу мыйкӧ?.. Абу!.. Сідзкӧ производственнӧй сӧвещанньӧ лыддя...
ЗЫКОВ (воддза моз торкӧ). Ещӧ ӧтитор...
СЕКРЕТАР. Мый ещӧ?
ЗЫКОВ. Партъячейкаса секретарӧс да рабочкомса председательӧс главнӧй удж вылӧ чунь пыр видзӧдӧмысь лыддьыны примиренечьясӧн...
СЕКРЕТАР (балябӧжсӧ гыжъялӧ). Абу лӧсьыд...
ДИРЕКТОР. Поддерживайта! Вполне заслуживайтан сійӧ нимсӧ...
СЕКРЕТАР. Возраженньӧ эм абу?
КОДСЮРӦ. Абу.
ЗЫКОВ. Ещӧ ӧти предложенньӧ. Кыдзи явнӧй оппортунистӧс этійӧ мортсӧ (чуткӧ директорлы) чӧвтны директорысь...
ДИРЕКТОР. Чӧвлӧй, тӧварышъяс!.. Кыдзи нӧ сідз друг чӧвтны?
СЕКРЕТАР. Ми чӧвтны огӧ вермӧ.
ЗЫКОВ. Но корны нӧ, мед чӧвтасны.
СЕКРЕТАР. Возраженньӧ эм абу?
ДИРЕКТОР. Ме протестуйта!
СЕКРЕТАР. Ме гӧлӧсуйта. Коді «за»? (Ставныс, директорысь кындзи, лэптӧны кияснысӧ.) Коді «прӧтив»? (Лэптӧ ӧтнас директор.) Тэныд, директор, колӧ вӧлі воздержитчыны... Сӧвещанньӧ лыддя...
РАБОЧКОМ (тэрмасьӧмӧн). Менам содтӧд эм бӧръя предложениеас.
СЕКРЕТАР. Висьтав.
РАБОЧКОМ (сувтӧ да индӧ знамя вылӧ). Этійӧ позорнӧй знамясӧ сетны директорлы «на память» некытчӧ шогмытӧма уджалӧмсьыс...
ЗЫКОВ. Поддерживайта! Мед босьтас.
ДИРЕКТОР. Меным оз ков! (Копыртчӧ.)
СЕКРЕТАР. Возраженньӧ абу?
СТАВНЫС. Абу!
ЗЫКОВ. (нетшыштӧ знамя да вевттьӧ сійӧн директорӧс). Вполне заслужитін!
Занавес.
