ГУДРАСЬӦМ
Ӧти торъя теш важ олӧмысь
Йӧз:
МИРОН — олӧма морт, мӧд гӧтыра, мельник.
ӦПИМ — сылӧн гӧтыр, збой нывбаба.
ИРӦ — Миронлӧн тьӧткаводз ныв.
ВАСИЛЕЙ — том морт, вурсьысь.
АКАКӦЙ ПЕРАПОНТӦВИЧ — важ (заштатнӧй) пӧнӧмар, гӧрд юрсиа, новлӧ кӧса.
Вӧчсьӧ Мирон керка дінын, ӧшинь улас. Кильчӧ помас пызан, пызан бердас скамья.
Медводдза петкӧдчӧм
Ирӧ ӧтнас.
ИРӦ (петӧ керкаысь ведраясӧн, сьылӧ):
«Сад йӧрын кӧ ныв гуляйтӧ...»
Ведраяссӧ пуктӧ, ачыс пуксьӧ скамья вылӧ.
Аттӧ, кутшӧм ме морт, пыр сьыла да гажӧдча... (Кост.) Некод оз тӧд менсьым ыджыд шогӧс... Сьӧкыд жӧ мем овны лёк тьӧт дінын: лунысь лунӧ пыр ӧтарӧ зыньгӧ-видчӧ... (Мӧвпалӧ.) Мӧдарӧ кӧ шуны, омӧля и пола ме сыысь. Ещӧ ёнджыка сьыла да гажӧдча, кор сійӧ увгӧ. Мед ёнджыка вирыс пуас... (Кост.) Кӧть эськӧ нин ӧдйӧджык локтіс менам Василейӧй. Сы дырйи кыдзкӧ мем гажаджык овны. (Мӧвпалӧ.) Кӧсйысис регыд локны, а со пыр на абу. Кӧні бара ветлӧ та дырасӧ-а? Гашкӧ, абу и дзоньвидза нин да?.. (Гырддза вылас лэдзчысьӧ, нора сьылӧ.)
Василейӧй, муса зонмӧй,
Радейта ме тэнӧ.
Вӧльнӧй светыс оз ло муса,
Вунӧдан кӧ менӧ.
Мӧд петкӧдчӧм
ВАСИЛЕЙ (Ирӧ сьылігкості петӧ гусьӧникӧн керка сайсянь, матыстчӧ Ирӧ дінӧ, сідзи жӧ нора сьылӧ):
Зарни нылӧй, сьӧлӧмшӧрӧй,
Эн шу тадзи меным;
Лучшӧ вӧйтча джуджыд йирӧ,
А ог вунӧд тэнӧ.
ИРӦ (повзьӧ, сэсся нимкодя). Василей? Тэ?!
ВАСИЛЕЙ. Мыйысь нӧ повзин, муса нылӧй? Ме, дерт, — видзӧдлы... Но, олан-вылан! (Киасьӧны.)
ИРӦ. Збыль тай тэ... Кутшӧма повзьӧдлін... Кысянь нӧ тэ нем виччысьтӧгыс усин ме дінӧ? Ме ещӧ неважӧн на мӧвпалі, мися, буракӧ, вунӧдіс менӧ... Мый нӧ та дыра ветлін?..
ВАСИЛЕЙ. Вунӧдны тэнӧ? Чӧв, Иринушкаӧй. Кыдз нӧ сійӧ позьӧ? Тэ ӧд тӧдан менӧ: верма ӧмӧй ме тэнӧ вунӧдны... Ветлі нажӧвитчыны. Со мыйта вайи сьӧмтӧ! (Кыскӧ зепсьыс сьӧм мошня, петкӧдлӧ.) Дзоньвидза кӧ, регыд свадьба вӧчам... (Сьӧмсӧ бӧр сюйӧ зептас.)
ИРӦ (шога). Ог тӧд, Василейӧй, лоӧ оз коркӧ миян свадьбаным...
ВАСИЛЕЙ. Мый понда оз ло? Мый тэ шуан?
ИРӦ. Тэ ӧд ачыд тӧдан, кыдзи тьӧтӧй пыксьӧ тэ сайӧ сетӧмысь. Батьӧ эськӧ нинӧм оз шу да, сійӧ ачыс тьӧтсьыс полӧ. Миян ӧд зэв тешкодь олӧмыд. Садь юрӧн батьӧ полӧ тьӧткаысь, юас кӧ — тьӧт нин полӧ сыысь. Ха-ха-ха! (Сералӧ.) Тьӧтка лӧсьӧдчӧ пӧнӧмар сайӧ менӧ сетны. Ӧти-кӧ, пӧнӧмар тьӧща лоас, вичкоад мунас да медводзас сувтас, попаддякӧд орччӧн. Мӧд-кӧ, яндзим и висьтавныыс тэныд... (Гусьӧникӧн.) Пӧнӧмарыд да менам тьӧтӧй кутчысьлӧны... Со ӧд кӧні дивӧыс! Ха-ха-ха! (Сералӧ.) Тэ аддзылін пӧнӧмарсӧ? Кутшӧм ӧд мисьтӧм! Нырыс зэв ыджыд, картупель кодь, да ӧд ещӧ гӧрд. Лёк лӧмӧсь. Ха-ха-ха! Веськыда вукӧдӧ менӧ, кор ме сыкӧд паныдася... Сёрниыс либӧ! Кывлан кӧ, ме чайта, кочкавтӧдзыд сералан. Ас ногыс пондас сӧрны да сӧрны, веськыда кӧть керкасьыд пышйы! Да ӧд и нимыс зэв тешкодь. Ме ог вермы и шуны: Акӧй нисьӧ, Кӧкӧй нисьӧ, кыдзкӧ эськӧ та ногӧн да, ог вермы прамӧясӧ шуныыс. Зэв тешкодь! Мыйӧн бара сэтшӧм полокалӧыс мусмӧма менам тьӧтлы-а? Ха-ха-ха! (Сералӧ да сьӧлыштӧ.) Тьпу! Бурджык ваӧ пырны, сы сайӧ мунӧм дорысь...
ВАСИЛЕЙ. Эн шогсьы, Ирина. Ме пӧнӧмарыдлы сэтшӧм ӧшкамӧшка петкӧдла, сэтшӧм увтыс юр улас стрӧчита, нэмыс оз вунӧд! (Мӧвпалӧ.) Мый эськӧ сыкӧд вӧчны?.. Кыдзи сійӧс тшынны татысь? А-а, со кыдзи! Ме карысь вайи ӧти зэв буртор, рочьяс маскаӧн шуӧны. Сійӧс кӧ ныр-вомад пуктан, некод тэнӧ оз тӧд, кӧть мый сэсся вӧч сэки. Ме сійӧ масканас кузь юрсиатӧ повзьӧда. Тавой жӧ пета да кыйӧда, став тошсӧ сылысь нетшка!.. Мед водзӧ кежлӧ велалас...
ИРӦ. Повзьӧд, повзьӧд! Гашкӧ, сэсся эновтас миянӧс, дугдас волывлыны.
ВАСИЛЕЙ. Мукӧд ногӧн некыдз он вермы мынтӧдчыны сыысь... Талун жӧ ставсӧ лӧсьӧда!.. (Босьтӧ Ирӧӧс киӧдыс, видзӧдӧ синмас.) Тэ эськӧ ме сайӧ мунан?
ИРӦ (яндысьӧмӧн). Ещӧ тай юасян. Кӧть талун венчайтчам.
Керкаын зык. Кылӧ Ӧпимлӧн горзӧм: «Мунан али он нӧ тэ талун, идол? Кодлы шуӧны?» Кылӧ коколюкаӧн катшкӧдчӧм, сэсся бара зык-шум.
ВАСИЛЕЙ. Мый нӧ сэн керсьӧны?
ИРӦ. Тӧдан ӧд мый. Бара тай со, кылӧ, тьӧтӧй йиркӧдчӧ. (Ыстӧ Василейӧс.) Мун ӧдйӧджык, Василей, пышйы! Татчӧ ещӧ петас... Прӧщай ӧні кежлӧ!.. Рытнас аддзысьлам!.. Петав льӧм куст дорӧ. (Босьтӧ ведраяссӧ.)
ВАСИЛЕЙ Прӧщай но! (Зэв тэрыба Ирӧӧс окалӧ, сэсся котӧрӧн мунӧ керка сайӧ. Ирӧ мунӧ мӧдарӧ.)
Коймӧд петкӧдчӧм
Мирон ӧтнас.
Войдӧр керкаысь кылӧ ыджыд зык. Сы бӧрын Мирон шляпкысьӧ-усьӧ кильчӧ помӧ.
МИРОН (надзӧникӧн чеччӧ). Со тай мый вӧчыштіс бара. Аддзылінныд, бур войтыр? (Юрсӧ малалӧ.) Аттӧ дивӧ! Ме чайта да, мукӧдлӧн абу жӧ кӧ татшӧмӧсь гӧтыръясыд-а?.. Мем тай со ен сиӧма Ӧпимӧс. Со тай, ерӧмаканьыд, мый вӧчыштіс. Ӧдзӧсысь ӧдзӧсӧ, куричысь куричӧ став кильчӧ поссӧ лыдди, татчӧдз со лэбзи. Ок-ок-ок!.. (Ниртӧ мышкусӧ.) Быдсяматорсӧ нин менам мышкуӧй тӧдӧ. Кымыныськӧ чеччавліс жӧ нин сы вывті коколюкаыд, быгыльтаныд, сера пуыд, пожъясян нӧшыд, быдсяма пӧлӧс нывбаба ӧружйӧыд. (Сьылӧ.)
Кутшӧм дявӧл тшӧктіс мем
Мӧдысь бара гӧтрасьны?
Эг мӧй тӧдлы, кутшӧм эм
Лунысь лунӧ косясьны.
Ак, ерӧмакань, ёна жӧ юрӧй висьӧ! (Юрсӧ бергӧдлӧ.) Зэв сьӧкыд талун!.. Тӧрыт ми Васька Педӧркӧд неуна кокыштім да, со и пӧкмелля. Эз жӧ, зон, пӧкмелитӧд гӧтырӧй. Абу пӧ, шуӧ. Эськӧ эм, тӧда, эм. Нарошнӧ оз сет. Ерӧмаканьыд. Мун, шуӧ, лэччы мельничаад изныыд. Тӧда ӧд эськӧ да. (Соссӧ пуджӧ, кабырсӧ петкӧдлӧ керкалань.) Тӧда, ставсӧ тӧда, ерӧмакань! Тӧда, мыйла менӧ мельничаад мӧдӧдан! Энлы, коркӧ петкӧдла тэд изӧм! Сюрлан коркӧ этійӧ изки улас менам гажа юр дырйи. (Кык кулак воча ниртӧ.) Петкӧдла ме сэки кос кӧльӧса да ва кӧльӧса!.. (Перйӧ каллян, сӧвтӧ табак.) Тадзи со видзӧда, видзӧда дай вевття тэнӧ другыдкӧд тшӧтш!.. Энлӧ, энлӧ, онӧ зэв дыр ті шонтысьӧй, воас коркӧ и кӧдзыд дыр, ерӧмаканьяслы! (Каллян сюйӧ вомас, кыскӧ биа из, тывкӧрт да биалӧ. Сьылігтырйи мӧдӧдчӧ мунны.)
Код эм кӧні, татчӧ локтӧй,
Код эм кӧні, татчӧ локтӧй,
Тшака би ми перъям,
Калляннымӧс пестам.
Энӧ шогсьӧй, энӧ шогсьӧй...
Саялӧм бӧрын ещӧ на кылӧ: «Ерӧмакань».
Нёльӧд петкӧдчӧм
Ӧпим ӧтнас.
ӦПИМ (ньӧжйӧникӧн петӧ керкаысь). Ӧдва мыні тэысь! Пӧтлытӧм горшлы, мед эськӧ пыр вина юны! Удж йылысь оз и мӧвпыштлы. Кӧть эськӧ мед нэм кежлас кузьясыс нуасны, мездасны менӧ сыысь. Морт жӧ ӧд кыськӧ чужлӧма. Ӧдва-ӧдва вӧрӧ. Со тойлалі нин керкаысь да ещӧ на татчӧ сувтіс, быттьӧкӧ сирасис... (Сьӧлыштӧ.) Тьпу, ёрӧм кучик! (Кост.) Вурсьысь Васька пӧ воӧма. Колӧ кыдзкӧ ӧдйӧджык лӧсьӧдчыны да Иринаӧс пӧнӧмар сайӧ сетны. Лоӧ тэрмасьыштны неуна, мед эськӧ оз жӧ торк Васьӧыд. (Чеччӧ.) Аттӧ дивӧ! Сёрнинад дзикӧдз ылалі, регыд ӧд гӧсть локтас. Менам нинӧм на абу... Колӧ жӧ мыйкӧ лӧсьӧдыштны... (Пыралӧ керкаӧ, петкӧдлӧ пызан дӧра, кутшӧмсюрӧ сёян, вина тыра грапин да ыджыд румка. Ставсӧ лӧсьӧдлӧ пызан вылӧ.) Рочнад кӧ эськӧ кужан сёрнитны, мый, майбырӧй, овныыд. Рочнад кужтӧгыд бара на, ме чайта, пӧнӧмарыдкӧд ми матӧ волам тӧндзия моз... Сэки тай мыйкӧ висьталіс, висьталіс да сэсся шуис: «Давай пӧ пӧдушка». Юрлӧстӧ ме сылы петкӧді, кинас и кокнас пондіс висьтавны — бӧр пӧ ну. Бӧрвылас сӧмын гӧгӧрвои: пель водзӧ вӧлӧм мыйкӧ кӧсйӧ вашкӧдны. Пӧдушкаыд вӧлӧм абу юрлӧс, а пель водзӧ вашкӧдӧм. Ха-ха-ха! (Сералӧ.) Кысь нӧ сэсся гӧгӧрвоан сійӧс? Ме чайта, да талун на сыкӧд пикӧ волам. (Видзӧдӧ бокӧ.) Со ӧд локтӧ нин.
Витӧд петкӧдчӧм
Ӧпим да пӧнӧмар.
ПӦНӦМАР (локтӧ туй кузя. Лёк пӧдрасника, киас зонтик. Юрас зэв ыджыд шляпа. Сёрнитӧ нюжйӧдлӧмӧн, ныр пырыс). Хозяйке дома сего здравие и спасение, во всем благое поспешение, на враги же победу, мне одоление подаждь, господи! (Матыстчӧ пызан дорлань. Ӧпимлы сетӧ кисӧ.) Велелепной Евфимии умильное поклонение!
ӦПИМ (быттьӧ неуна яндысьӧ). Олан-вылан, Акӧй... али кыдзи нин шуан? Какӧй Серапонтӧвич!
ПӦНӦМАР. Позвольте, Ферапонтович. Отца моего звали Ферапонтом, так и писание глаголет.
ӦПИМ. Мый бара тэ шуан-а? Ог ӧд ме нинӧм гӧгӧрво. Серапон-ӧ, Черапон-ӧ, — нинӧм ог тӧд! (Лӧсьӧдӧ скамья, индӧ пӧнӧмарлы.) Пуксьы да шойччы, бур Потӧвич!
ПӦНӦМАР. Не вредно есть, велелепна Евфимия. (Пуксьӧ.)
ӦПИМ. Кӧть бара тэ мый сӧр ас кывнад, ог жӧ нин велав нинӧм. Мыйкӧ тай эськӧ менӧ, буракӧ, казьтыштін да, мый сыысь? Тэ пыр на важ мозыд Епимӧн менӧ шуан. Мужик нима нывбабаясыс ӧмӧй овлӧны жӧ? Гашкӧ, мыйкӧ юалан да, мыйкӧ колӧ тэд, Кокӧ Серапонтӧвич?
ПӦНӦМАР. Ферапонтович по писанию! Словеса твои аз не уразумею, прекраснейшая Евфимия. Яко глас вопиющего в пустыне.
ӦПИМ. «Пустӧй», шуан? Ланьт, омӧля жӧ нин тай, буракӧ, аддзан синнад. Кыдзи нӧ пустӧй? Видзӧдлы, тыра да! (Матыстӧ грапинсӧ.) Ю, ю, колӧ кӧ! Тэныд ӧд тайӧс сувтӧдӧма.
ПӦНӦМАР (чеччӧ). О, о, с великим удовольствием! (Кисьтӧ.) Вино веселит сердце человека и, аки елей, услащает утробу его. (Юӧ, сэсся сёйыштӧ.) К-хе! Важнейшее питие! Аз употребляю оное (грапинсӧ босьтӧ киас) не только до (кисьтӧ да юӧ), но и по... (бара кисьтӧ да юӧ) сле обеда. Не только утром рано (юӧ), но и вечером поздно (бара юӧ.) Во все дни живота моего сугубо. (Юӧ веськыда грапинсьыс.) Велелепно! Кхе, кхе, кхе!
ӦПИМ (ёна шензьӧ). Тэ тай зэв горш вӧлӧмыд вина вылад. (Кияснас шлапкӧдӧ бокас.) О, господьӧй, мыйта кисьтін вомад! Кытчӧ нӧ сы мындаыс тӧрис? (Кияснас юалӧ сылысь.) Оз нӧ тайӧ уна ло тэныд, Какӧй Перапонтӧвич? Вывті, мися, оз-ӧ ло юӧмыд?
ПӦНӦМАР (сутшиктӧ). О-о-о. Не зело много. Ок-го. Утроба моя... ик, ик... о... обильная и вместительная. (Босьтӧ Ӧпимӧс киӧдыс.) Позвольте теперь во умилении сердца воспеть всегласно твою красоту, о велелепная Евфимия. (Сувтӧ пидзӧс вылас, сьылӧ.)
Руки белейшие,
Брови чернейшие,
Очи яснейшие,
Уста краснейшие,
Всепрекраснейшая!
ӦПИМ.
Мый бара тэ сьылан-а?
Мый бара тэ сӧран-а?
Гашкӧ, менӧ ёран да?
Гашкӧ, менӧ видан да?
Мыйкӧ тай со баксан-а!
ПӦНӦМАР (чеччӧ). Теперь, по сладком пении, обнимемся и облобызаемся и возлюбим друг друга. (Кӧсйӧ Ӧпимӧс кутны коскӧдыс.)
ӦПИМ (оз сетчы). Мый нӧ тэ лоин, Кокӧй Серапонтӧвич? Он-ӧ нин кӧсйы окавны менӧ? Ывла вылын!.. Мун, вешйы сэсь! Эн йӧйтав!
Квайтӧд петкӧдчӧм
Ӧпим, Пӧнӧмар, сэсся Ирӧ.
Пӧнӧмар кутӧ Ӧпимӧс коскӧдыс, сэки Ирӧ петӧ ва ведраяса. Пӧнӧмар Ӧпимкӧд оз аддзыны сійӧс.
ИРӦ (гораа сералӧ). Ха-ха-ха!.. Видзӧдлӧй жӧ, видзӧдлӧй!.. Татшӧм дивӧсӧ ме ещӧ некор на эг аддзыв!.. Ха-ха-ха! (Сувтӧ.)
ПӦНӦМАР (повзьӧ, тіралӧ). Что сие значит? Яко тать понощи... Что за причча во языцех?
ӦПИМ (Ирӧлы скӧра). Мый тані шӧйтан, ваксян вомтӧ паськӧдӧмыд да? Мый тась эн аддзыв? Мун син водзысь!
ИРӦ (повтӧг). Аддзи тай со, небось, ха-ха-ха!..
ПӦНӦМАР (повтӧг жӧ). Ничего же здесь не без законновахом.
ИРӦ. Сӧр, сӧр, сісь ныра полокалӧ, хах, ха, ха! (Пырӧ керкаас.)
Сизимӧд петкӧдчӧм
Найӧ жӧ Ирӧтӧг.
ӦПИМ (быттьӧ скӧра). Вӧчин жӧ тэ сёрни! Кыдз сэсся ӧні татшӧм роктӧ панялан?
ПӦНӦМАР. О, кое посрамление.
ӦПИМ. Дерт жӧ, срам. Но да тэ эн пов, Какӧй. Ме Иринатӧ (петкӧдлӧ кабырсӧ) чирышта, да сійӧ кыв оз лысьт шуны некодлы.
ПӦНӦМАР. Лучше бы добром и лаской.
ӦПИМ. Тэ эн пов!.. Иринаыд ӧд регыд аслад лоӧ! Тэкӧд сійӧс венчайтам!..
ПӦНӦМАР. О, велелепная Евфимия. Ты еси неизсякаемая сокровищница всяких укрощений и прощений. (Босьтӧ Ӧпимлысь кисӧ да окалӧ.)
Кӧкъямысӧд петкӧдчӧм
Ӧпим, Пӧнӧмар, сэсся Василей.
ВАСИЛЕЙ (петӧ керка сайысь, матыстчӧ). Ӧні талы некутшӧм маска оз ков... (Гораа.) Олан-вылан, Акакӧй Серапонтӧвич!
Пӧнӧмар Ӧпимкӧд ёна повзьӧны.
ПӦНӦМАР. И паки и паки глумление над моим ликом...
ӦПИМ. Мый нӧ тэ шӧйтан керка гӧгӧрыс?
ВАСИЛЕЙ. Колӧ, сійӧ и шӧйта. Лӧсьыда жӧ ті тані гӧститанныд. Эг-ӧ ме торк тіянлысь мелі сёрнинытӧ, Ӧпим тьӧтӧй?
ӦПИМ. Эн серав, гашкӧ, бӧрдны на лоӧ да.
ВАСИЛЕЙ. Ог тӧд, кодным кутам бӧрдны. Локтас Мирон дядь да ме ставсӧ висьтала, мый тані вӧлі. Сэки, дерт, коднымкӧ бӧрдны кутам.
ӦПИМ. Тэ дорысь водзджык ачым ставсӧ висьтала!
ВАСИЛЕЙ. Тэ, гашкӧ, тьӧтӧ, мыйкӧ вунӧдан да?.. Оз нин ло дыр виччысьны Мирон дядьтӧ. Петӧма нин вӧлі Педот ордысь... Зэв код! Кулакъяссӧ сідзи и лэпталӧ.
ӦПИМ (полігмоз). Збыль тэ шуан? Код?
ВАСИЛЕЙ. Кутшӧм нужда нӧ мем пӧръясьныыс? Збыльысь зэв код.
ӦПИМ (пӧнӧмарлы). Колӧ тэныд, Какӧй, ӧдйӧджык мунны татысь. (Петкӧдлӧ кинас да юрнас.) Верӧсӧй пӧ менам локтӧ, зэв пӧ код. Нӧйтас ещӧ тэнӧ. (Петкӧдлӧ кинас.) Мун ӧдйӧджык, мун, мун. Верӧсӧй, мися... Мироныд локтӧ. Юӧма... Нӧйтас тэнӧ... Менӧ тшӧтш.
ПӦНӦМАР (тэрмасьӧ). Разумею и твое веление исполню елико возможно скоро... (Мунӧ. Василей кутӧ сійӧс.)
ВАСИЛЕЙ. Энлы тэрмасьлы, пӧнӧмар дядьӧ, домойтӧ! Эштан на, кор пришо Мирон дядь. Тшӧтш заводнем разговаривает...
ПӦНӦМАР (нетшкысьӧ). Отпусти и не прикасайся убо к власам, усмащенным елеем, своими нечестивыми руками.
ВАСИЛЕЙ (оз лэдз). Обождешь на ещо!.. Эн, колӧкӧ, пессьы-а!.. Волосатӧ колӧ кӧсанас юрсьыд нетшыштны!
ПӦНӦМАР (тіралӧ). Доколе мне будет поношение сие?
ВАСИЛЕЙ. Эн на пӧръясь! Эн ылӧдлы! Прӧстӧ тэ шуан ситечӧн ассьыд поношеннӧй балаконтӧ. Абу на тайӧ ситеч, настӧящӧй треко на. Оз косясь, он кӧ понды нетшкысьны.
ӦПИМ. Лэдз, Василей, сійӧс! Мед мунас кытчӧ гажыс.
ВАСИЛЕЙ. Лэдза? Тайӧс? Ог! Ещӧ тай сюрис-а. Мирон дядьӧ лэдзас.
ӦПИМ. Лэдз, енмогысьӧн! Мирон дядьыд локтас да, бур оз ло.
ВАСИЛЕЙ. Мем, тьӧтӧ, сійӧ и колӧ. Мед этша Мирон дядь кыскалас кӧсаӧдыс ассьыс зятьпусӧ!
ӦПИМ. Мый нӧ тэ сӧран? Кутшӧм нӧ тайӧ зятьпу миян?!
ВАСИЛЕЙ. Тӧдам, кутшӧм. Оз ков висьтавны миянлы. Тэ эськӧ зэв сьӧлӧмсьыд кӧсъян Иринатӧ та сайӧ верӧс сайӧ сетны, да оз ло тэ ногӧн, тьӧтӧй!
ӦПИМ. Эн йӧйтав, Василей! Вай лэдз тайӧс ӧдйӧджык!
ВАСИЛЕЙ. Кытчӧдз он сет ассьыд кыв да он кӧсйысь Иринатӧ ме сайӧ сетны, ог лэдз.
ӦПИМ (бокӧ). Со коді вӧлӧма идолыд. Воши менам став арталӧмӧй... Сёйис ставсӧ, пеж горшыд. (Василейлы.) Босьт кӧть талун, код кутӧ!
ВАСИЛЕЙ. Но, сідзкӧ, мун, пӧнӧмар дядь, домой-то. (Видзӧдлӧ.) Эн тай удит. Мирон дядьыд идёт нин, дзик тані.
ӦПИМ (полӧ). Локтӧ ӧдйӧ ставным пырамӧй керкаӧ да сэні арталамӧй, кыдз мый вӧчны. (Ставныс пырӧны керкаӧ.)
Ӧкмысӧд петкӧдчӧм
Недыр кежлӧ ӧшинь улӧ некод оз коль. Кылӧ Миронлӧн сьылӧм, пыр матыстчӧ.
МИРОН (петӧ сьылігтырйи. Код, шатлалӧ, шочиника восьлалӧ).
Мӧдлапӧлын тінь-тонь,
Талапӧлын тінь-тонь.
Аддзан он, ме кутшӧм мича,
Видзӧдлы, том ичмонь.
Аддзан он, ме кутшӧм мича,
Видзӧдлы, том ичмонь.
(Пуксьӧ скамья вылӧ.) Но-о! Талун эськӧ бара на изыштім. Лӧсьыд тадзтӧ изныыд, ерӧмакань! Васька Педьӧкӧд, ме чайта, бура уна изім. Позьӧ на ӧд и артавны! (Лыддьӧ чуньнас.) Первой ме сувтӧді пӧлӧвинка, — юим. Сэсся сійӧ вайис, — юим. Кык пӧлӧвинка нин со лоис. Сэсся ме ещӧ пӧлӧвинка вылӧ сетлі... Со ӧд мыйта кыкӧн ӧти здукӧн кырссьыштім!.. Изыштім тай, ерӧмакань!.. (Юрсӧ бергӧдлӧ пызанлань, аддзӧ грапин.) На, тайӧ нӧ мый?.. Абу-ӧ тшӧтш метӧг тані изӧмаӧсь? (Босьтӧ грапин, исалӧ, сэсся кыв йылас кисьтӧ.) Вина эськӧ вӧлӧма да помалӧмаӧсь. Ӧти войт сӧмын пыдӧсас кольӧмаӧсь, ерӧмаканьясыд. (Мӧвпалӧ.) Кодъяс бара тані гӧститӧмаӧсь-а? Эз-ӧ нин пӧнӧмарыд вӧв? Ак, ерӧмаканьӧй, эг су! Петкӧдлі эськӧ ме сылы гаж!.. (Петкӧдлӧ кулаксӧ.) Гӧститӧді этійӧн!.. Пӧдлинӧ, тайкӧ оз вун, Василей мем талун паныдасис, юалӧ: кор пӧ свадьба вӧчам? Ме нӧ мыйӧн тӧда? Ме сідзи и шуи сылы: «Ме вӧсна, мися, кӧть талун, кӧть аски. Мый, мися, Ӧпим шуас». Ме ачым важысянь нин зять пыдди сійӧс видза. Ӧпим тай мыйкӧ пыксьӧ, оз сы сайӧ Иринаӧс сет. Ӧпим сайын свадьбаным. Ӧпим кӧ шуас сетны, пырысь-пыр пир лӧсьӧдам. Василейӧс пи пыдди босьтам... (Бара видзӧдӧ грапин вылӧ.) Аттӧ, ерӧмакань, мый нӧ тайӧ? Ок, Ӧпимӧй, суи кӧ эськӧ тэнӧ татысь, кушті жӧ, ме чайта, юртӧ тэнсьыд да, пӧнӧмарыдлысь тшӧтш! Энлы, юалам, кутшӧм тані бал вӧлӧма. (Горзӧ.) Ӧпим! Ӧпим! Кылан он тэ? Волы зіля татчӧ, петав! Ӧпим! Кылан? (Кылӧ шы: «Локта».) Кывзыштам, мый пондас менам гӧтырӧй висьтавны. Ӧти кыв сэсся ӧні ме сылысь ог кут эскыны.
Дасӧд петкӧдчӧм
Мирон да Ӧпим.
ӦПИМ (петӧ керкаысь. Сёрнитӧ зэв меліа да рама). Тэ нӧ, Миронӧй, воин нин? Мыйкӧ нӧ мельничаад сёйыштлін эн?.. Кынӧмыд ӧд, кӧнкӧ, сюмалӧ, коньӧрлӧн? Лок пырам да пажнайтам!
МИРОН. Ме, буракӧ, тэнӧ талун пажнайтӧда, ерӧмаканьӧс! Ноко, волы татчӧ матӧджык!
ӦПИМ (матыстчӧ). Мый нӧ?
МИРОН (индӧ грапин да закуска вылӧ). Этійӧ нӧ мый татшӧмыс?
ӦПИМ. Кӧні?
МИРОН (мыччӧ ныр улас грапинсӧ). Со, этійӧ?..
ӦПИМ. Мый нӧ тайӧ?
МИРОН. Со тай ме и юала, мый, мися, тайӧ?..
ӦПИМ. Он ӧмӧй тӧд, мый? Грапин тай.
МИРОН. Пытшкас мый вӧлӧма?
ӦПИМ. Грапин пытшкас? Ме ог тӧд, мый овлӧ грапин пытшкын. Ва овлывлӧ, овлӧ и вина...
МИРОН. Висьтав, неважӧн мый вӧлӧма тані: вина али прӧстӧй ва?
ӦПИМ (видлалӧ, грапинсӧ исалӧ). Вина тай эськӧ вӧлӧма да бырӧма-а...
МИРОН. Висьтав веськыда, мый тані менам ветлігкості вӧчид?
ӦПИМ. Немтор сэтшӧмтор эз вӧв. Василей воліс Ирина дінӧ да вайліс пӧлӧвинка вина, сійӧ юим. Сэсся немтор эз вӧв. Василейыд ӧд зятьпу миян. Тӧрыт на гортас воӧма. Неуна гӧститӧдыштім сійӧс Иринаыдкӧд, со и ставыс.
МИРОН. Пӧнӧмарыд тэнад тшӧтш вӧлі?
ӦПИМ. Мый нӧ сыысь?
МИРОН. Пӧръялан эськӧ тэ менӧ, буракӧ да, ерӧмакань.
ӦПИМ. На. Збыль, мися, эз вӧв. Он эскы али мый?
МИРОН. Ог! Некыдз ог эскы! Ноко, вай божитчы!
ӦПИМ (Миронӧс киӧдыс кутӧмӧн нуӧдӧ бокӧ). Тшӧктан кӧ нӧ, мый мем. (Индӧ кинас вичко вылӧ.) Со, вичкосӧ аддзан?
МИРОН (оз видзӧд вичко вылӧ). Но, аддза.
ӦПИМ. Со ӧд и ме аддза. Вичко вывсьыс крестсӧ аддзан?
МИРОН. Но, аддза.
ӦПИМ. Ме, Миронӧй, аддза жӧ. Кыкнанным аддзам.
МИРОН (аслыс). Аттӧ, ёна жӧ божитчӧ. (Ӧпимлы.) Ӧні сэсся эска. (Локтӧны кыкнанныс пызан дорӧ.)
ӦПИМ. Ог жӧ понды ме тэнӧ пӧрйӧдлыны. Колӧ кӧ, юалам Василейлысь. Сійӧ миянын на пукалӧ.
МИРОН (долыдпырысь). Сійӧ нӧ тані? Ме сідзкӧ ачым гортӧ пырала, ерӧмакань. (Кӧсйӧ пырны.)
ӦПИМ (кутӧ). Энлы, ме сійӧс татчӧ чукӧста. Ирӧкӧд тшӧтш. (Пырӧ.)
Дас ӧтиӧд петкӧдчӧм
Мирон ӧтнас.
МИРОН. Ме чайта да, мыйкӧ тані гудралӧма менам гӧтырӧй. Василейӧс синнас оз вермы вӧлі аддзыны, ӧні керкаӧ пыртӧма... (Кост.) Юрӧй изки моз бергӧдчӧ, ерӧмаканьыд.
Керкаысь петӧны Ӧпим, Василей, Ирӧ да пӧнӧмар. Василей да Ирӧ орччӧн сувтӧны. Пӧнӧмар сувтӧ Ӧпим сайӧ.
МИРОН (Ирӧлы). Кыдзи нӧ тэ вермин песовтны чорыд сьӧлӧмсӧ тьӧтыдлысь? Вай висьтав, кыдзи мый сійӧ лои?
ИРӦ (бокӧ). Ме сорся, ме ог! (Миронлы.) Василей та йылысь бӧльӧ тӧдӧ, сылысь тэ, батьӧ, юав.
МИРОН. Ноко, Василей, висьтав ставсӧ! Эн соссьы нинӧмысь, ерӧмакань!
ПӦНӦМАР (аслыс). Согрешихом, беззаконовахом.
ВАСИЛЕЙ. Мыйысь соссьыныыс, Мирон дядь? Ставсӧ лючки висьтала.
ӦПИМ (гусьӧник Василейлы). Эн йӧйтав, кыдз нӧ позьӧ ставсӧ?.. Кыдз лӧсьӧдчим керкаад, сійӧс сӧмын и висьтав.
МИРОН. Василей, ӧдйӧджык, мый сэні вашкӧдчанныд?
ВАСИЛЕЙ. Тэ, Мирон дядь, тӧдан, ме да Ирина Мироновна важысянь мӧда-мӧднымӧс радейтам...
МИРОН (юрнас личкыштӧ). Сідз, сідз!..
ВАСИЛЕЙ. Сӧмын ме эг лысьтлы куш киӧн коравны тіянлысь нывтӧ. Ветлі ме нажӧвитчыны. Ас сюсьлунӧн да морттуйӧн чӧжи бура уна сьӧм. Гортӧ тӧрыт на вои. Талун асывнас чеччӧмӧн тшӧтш мӧдӧдчи тіянӧ, аддзысьлыны Ирина Мироновнакӧд. Зэв ёна менам сыысь гажӧй быри, ветлігчӧж тӧд вылын вӧлі. Сэсся, мися, ӧти сайын, корася. Босьті сьӧрысь пӧлӧвинка вина. Тіянӧ локтігӧн мем паныдасис пӧнӧмар. (Пӧнӧмар голясӧ нюжйӧдлӧмӧн корсюрӧ видзӧдӧ Ӧпим сайсянь. Мирон кывзӧ.) Рочасьыштім сыкӧд ӧтитор-мӧдтор йылысь, сэсся и шуа ме сылы: мунам, мися, тшӧтш, Какӧй Серапонтӧвич.
ПӦНӦМАР (зэв гораа). Ферапонтович по писанию!
МИРОН (чуймӧмӧн, скӧра). А-а-а! Тэ тані жӧ, ерӧмакань, вӧлӧмыд. (Уськӧдчӧ пӧнӧмар вылӧ кулакъяснас. Пӧнӧмар видзчысьӧ нӧйтӧмысь: зонтиксӧ восьтӧ да пӧдлалӧ. Ирӧ да Ӧпим Миронӧс кутӧны, мед оз кучкав пӧнӧмарӧс.)
ИРӦ. Эн вӧрӧд, батьӧ. Войдӧр кывзы помӧдзыс да вӧлисти.
МИРОН (нетшкысьӧ). Лэдзӧ! Энӧ кутӧ! Талысь юрсӧ кушта да вӧлисти кывза. Ме тэд, ерӧмаканьлы, сизьда юрад кос кӧлеса да ва кӧлеса.
ПӦНӦМАР. О, страх и ужас нападе на мя!
МИРОН. Лэдзӧ, лэдзӧ менӧ сы дінӧ регыдик кежлӧ! Важӧн гаж петӧ кузь юрсиа полокалӧӧс пуркӧдыштны. Мед, кытчӧ оз ков, оз ветлӧдлы! Вӧча ме сылы юр пыдӧсас мельнича!
ВАСИЛЕЙ. Мирон дядь! Энлы, дугдыв! Ме помала ассьым висьтӧс да вӧлисти мый вӧчан — вӧч... Ме талы и шуа, «мунам, мися, пӧнӧмар дядь, тшӧтш!..» Локтім, пукыштім, гӧститыштім ичӧтика...
МИРОН. Кӧть тэ мый висьтав меным, тайӧ полокалӧӧс сідз ог лэдз! Ерӧмакань!.. Нырсӧ талысь шоммӧда!
ИРӦ. Мыйысь, батьӧ?
МИРОН. Тэ нинӧм, нылӧ, он тӧд. Мед йӧз нянь вылӧ вомсӧ оз паськӧдлы.
ВАСИЛЕЙ. Кывзы, Мирон дядь, мый вӧлі, водзӧ кежлӧ сійӧ оз ло! Ӧні сэсся медбӧръя кыв тэнсьыд виччыся. Шогма кӧ зять вылад, бласлӧвит ассьыд нывтӧ ме сайӧ, Мирон дядь! Пӧнӧмартӧ лэдз!
МИРОН. Но. Мед инӧ тэ ногӧн лоӧ. Зэв эськӧ киясӧй лудісны пуркӧдыштны да, мый нӧ керан. Ирина йывсьыд тэ, Василей, юав тьӧткаыслысь. Ме сайын делӧ абу.
ВАСИЛЕЙ. Ми тьӧткаыскӧд артмӧдчим нин.
ӦПИМ (рама). Нылыд ӧд тэнад, кӧть код сайӧ сет, ме нинӧм ог шу. Василей кодь бур мывкыда да вежӧра морт тані матігӧгӧрын абу. Ме думысь, Иринаыдлысь ӧд шудсӧ огӧ жӧ торкӧй.
МИРОН. Тэ нӧ, Иринушкаӧй, мунан Василей саяд?
ИРӦ (яндысигмоз ньӧжйӧник шуӧ). Муна.
МИРОН (ӧтлаалӧ Ирӧӧс Василейкӧд). Сідзкӧ, мед жӧ кузь нэм кежлӧ овмӧдчыны да мӧда-мӧдыдлысь кывзыны! (Бурсиӧм бӧрын Мирон шуӧ Ӧпимлы.) Тэ бара на менӧ пӧръялӧмыд, ерӧмакань! Пӧнӧмарыд тані вӧлӧма. Тэ шуин, эз пӧ вӧв.
ӦПИМ. Эн мыжав менӧ, Мирон! Водзӧ сэсся ог кут.
МИРОН. Дерт, лоӧ вунӧдны. Мый вӧлі — коли, важӧс казьтывны огӧ кутӧй. Мем нывлӧн шудыс донаджык аслам шуд дорысь. (Матыстчӧ пӧнӧмар дінӧ, кӧсйӧ лапкӧдны мышсӧ. Пӧнӧмар повзьӧ, зэв ёна тіралӧ.) Эн пов! Ӧні немтор нин оз ло. Тэнӧ тшӧтш ме прӧстита: мый вӧлі старӧй, новӧй кежлӧ мед оз ло!.. (Сетӧ кисӧ.) Прӧстайтам ставсӧ, важсӧ вунӧдам! (Пӧнӧмар радлӧ.)
ПӦНӦМАР (сьылӧ):
Сей урок пребудет мне
От века и до века.
Занавес.
