КРЕПОСЬТ

Кывбура да прозаа пьесаысь дженьдӧдалӧм торъяс

МЕДВОДДЗА ВӦЧӦМ

Вӧчсьӧ ичӧтик Войвож ю дорын. Таладорас — эрд нӧрыс. Шуйгавылас тыдыштӧ ӧти бокыс сюръяяс йылӧ вӧчӧм вышкалӧн (тшамъя кодь) — важмӧма нин, варгыльтчӧма; стенас — ӧшинь розь; вышка вылас кайӧ пос. Веськыдвылас — льӧм куст, — коръясыс гӧрдӧдӧны нин; сы дінын прӧстӧй скамья: кык джек пом вылӧ пуктӧма пӧв. Мӧдлапӧлас — кыдз сора вӧр, ылын лӧзалӧ парма — помыс оз тыдав; кыдзьяслӧн коръясыс вижӧдны нин кутӧмаӧсь. Юас кылӧ болскӧдчӧм да корсюрӧ мортлӧн ывӧстлӧм: сэні кӧдзыд ва пиас уялӧ Арсень, ачыс оз тыдав. Туйвеж: льӧм куст сайӧд — ва дорӧ, таладортіыс — мӧд сиктӧ. 1935 во. Август пом. Рытгорув. Сцена сайсянь, ылысянь кылыштлӧны сиктса шыяс — уна пӧлӧс; корсюрӧ юркнитлӧ, быттьӧкӧ тӧв гыӧн мӧвкнитлӧ, том йӧзлӧн сьылан гор.

Лиза петӧ вышка таладорті карнанӧн да тыртӧм ведра гозйӧн, мыйкӧ вомгорулас сьылігтырйи вуджӧ нӧрысӧд да льӧм куст дінті лэччӧ ва дорӧ, саялӧ.

Недыр мысти сцена сайын кылӧ ведраясӧн гольӧдчӧм да Лизалӧн Арсенькӧд гораа сёрнитӧм.

ЛИЗА.

Но, дивӧ! Код нӧ сэн ва шӧрас келалӧ?

Арсень тай вӧлӧма!? Мый нӧ сэн уялан?..

Кынмӧдчан... висьман кӧ, сэки тон велалан!

Кодӧс нӧ ва пытшсьыс корсян да туялан?

Кая да, батьыдлы пырысь-пыр удта!..

АРСЕНЬ (кынмӧмысла тіралан гӧлӧсӧн).

Лизук! Эн вильскӧбты кыдзкӧ тэ юас!

Сэні — друг — дзум, пӧшти кык метра судта,

Усян кӧ, визулыс пыдӧсас сюяс, —

Тэнӧ сэк лоӧ, дерт, некодлы куттӧм, —

Веськыда Вой море йирӧдз и нуас...

ЛИЗА

Тэ дырйи абу на сэтшӧм ме шудтӧм!

Вӧйны кӧ понда ме, он ӧмӧй кут тэ?..

Кыдзи нӧ сэтшӧм лёк приччаыс суас!?.

Мый сійӧ нинӧмсӧ, Арсень, тэ бызган? —

Збыльысь кӧ вӧя ӧд — надейнӧ, кыскан?..

АРСЕНЬ

Аттӧ жӧ, Лизук, тэ петкӧдлан тештӧ!

Кор нӧ ме ноксьыныс тэкӧд тан эшта? —

Уджысла ва петӧ нырысь и пельысь.

Вӧян кӧ — ас вылад ачыд сэк элясь...

СЕРГЕЙ (вышка дорӧд петӧ; сукмана, шляпаа, ботинкиа, ӧчкиа; веськыд пельпом вылас тасма йылын ӧшалӧ пищаль, коскас вӧнялӧма патронташ, сьыліас ӧшӧдӧма бинокль; локтігмозыс мыйкӧ вомгорулас мургӧ. Сцена шӧрӧ сувтыштлӧ да гӧгӧр, увлань и вывлань, гонькнитлӧ-видзӧдлӧ).

Э... тэ-тэ!.. Тайӧ нӧ збыль али шутка? —

Некӧн оз тыдав тан некутшӧм утка...

(Пуксьӧ скамья вылӧ да шобӧ став зепъяссӧ.)

Куритны нинӧмтор — табак чир абу...

Эз тай сюр шепыштны — дзебӧма папа...

(Корсьысьӧ.)

ЛИЗА (сайын).

Арсень! Вай пет сэтысь — кынман тэ сэні.

Либӧ вот веськалан джумйӧ да... пӧдан.

АРСЕНЬ

Жалитан?..

ЛИЗА

Кыдз нӧ ог жалит ме тэнӧ?

Сьӧлӧмӧс кырлалан... ачыд ӧд тӧдан...

Тэтӧг и менам тшӧтш олан туй дзугсяс!..

Сергей тайӧ сёрнисьыс чуймӧ да скӧйялӧмӧн кывзысьӧ.

АРСЕНЬ

Энлы на!.. Друг сідзи эн на тэ чепӧст!..

Шонді да сынӧд, да ва — медбур другъяс:

Здоровйӧ видзӧны, сетӧны крепосьт...

Тайӧ жӧ — бур физкультура да спорт!

Здоров кӧ вир-яйыд — майбырӧй, ов!

Тайӧс нин тӧдӧ быд велӧдчӧм морт:

«Здоровӧй вир-яйын — здоровӧй лов!..»

СЕРГЕЙ (Арсень сёрнитігӧн надзӧник чеччӧ скамья вылысь да кыйӧдчигмоз, гоньялігтырйи, мунӧ нӧрыс йывлань; сэні сувтлӧ кок чуньяс йылас да бинокльӧн видзӧдлӧ ю вылӧ; сэсся сідзи жӧ бӧр локтӧ, сувтӧ скамья вылӧ, видзӧдлӧ бинокльнас льӧм куст сайӧ, ва дорлань).

Э... тэ-тэ!.. Ме вӧлі уткатӧ корся,

Вӧлӧмкӧ — кык утка ныр улын дзик:

Эньыс со — ва дорас сялькӧдчӧ-ворсӧ,

Айыс то — ва шӧрас суналӧ — дзирк!..

Э... тэ-тэ!.. Лизка, тэ радейтан сійӧс?!.

Ылӧгӧс дзик места вывсьыд и кыйи!..

Абу тай окота пежавны киӧс,

Эськӧ вот татысянь чикляӧс лыйи!..

Менӧ тай пӧръялін, гӧрд юра вежӧм! —

Босьтін да Кузьма Вань Арсеньӧн вежин?..

Виччысьлы — помнитла ме... э... тэ-тэ! —

Дугдан кань козинӧн козьнасьныд тэ!

(Грӧзитӧ кинас.)

Тэныд и Арсеньлы петкӧдла пуж! —

Ме ӧмӧй радейтныс сы моз ог куж?..

Кост тор.

Сійӧс тай, антусӧс, морӧн оз лый!

Пыр менам туй вылын мешайтчӧ, жӧдзӧ...

Зэв интереснӧ вот тӧдмавны — мый

Ва шӧрас лунысь-лун болскӧдчӧ-вӧчӧ?..

Ичӧтик кост. Сайын кылӧ гораа бузӧдчӧм да Арсеньлӧн сералігтырйи тіралан ывӧстлӧм.

Э... тэ-тэ!.. Дорас нин петӧ то... Часлы —

Кытчӧкӧ колӧ вот дзебсьывны аслым...

Эновтӧ бинокльсӧ да кыкнан кинас кутчысьлӧ льӧм пу увъясӧ — кӧсйӧ пуас кайны, сэсся кинас шеныштӧ да гӧгӧр видзӧдлӧ — синмыс усьӧ вышка вылӧ; ӧдйӧ лэччӧ скамья вылысь да сцена вомӧн вуджӧ вышка дорӧ.

Э... тэ-тэ!.. Кайла ме этійӧ... раяс,

Ки пыдӧс вылысь моз став Коми крайыс

Татысянь тыдалӧ — оз судз и син,

Он аддзы таысь бур кыйӧдчанін!..

Поскӧдыс кайӧ вышка вылӧ да пырӧ пытшкӧсас, сэтысянь ӧшинь розьӧдыс корсюрӧ видзӧдлӧ бинокльнас да чургӧдӧ пищальсӧ.

ЛИЗА (сайын).

Яй бердад сибдӧма ва дӧрӧм-гачыд...

Ёна жӧ асныра вӧлӧмыд, — ок!..

Видзӧдтӧ — лӧзӧдтӧдз кынмӧмыд ачыд...

Каям нин гортад вай ӧдйӧджык, лок!

АРСЕНЬ (сайын жӧ).

Ваыд тай кӧдзыд нин вӧлӧма, Лизук!..

Кутшӧма кынмисны кокъясӧй менам!

Тӧдан ӧд: юыс зэв изъя да визув...

(Сёрнитӧм пыр матысмӧ.)

Раммас, час... збойлунсӧ талысь ми венам!..

Льӧм куст сайсянь петӧны Арсень да Лиза. Арсеньлӧн шуйга киас ва тыра ведра, веськыд киас — рулетка да гидрометр, киняулас — мера пасъяса рейка.

АРСЕНЬ

Тані со, Лизук, и шоныдджык руыс...

Вай татчӧ пуксьыштлам шойччыштны сутш...

Ёна жӧ мудзтӧдіс тайӧ скӧр юыс!

Дас лун нин уялі...

ЛИЗА

Аддзӧмыд удж!..

Весьшӧрӧ вынтӧ да кадтӧ вот воштін...

Збыльысь, вай висьтав тэ: мый корсян сэсь?..

АРСЕНЬ (дӧзмыштӧмӧн).

Сулавлы, Лизук, тэ... ёшты-за-ёштӧ!

Колӧкӧ, ноксьӧмӧй оз вош дзик весь?..

Коркӧ и тэ, гашкӧ, ошкыштан тайӧс —

Мелі кыв шуан сэк, шмонитігтыр:

Тані пӧ эмышт и Арсеньлӧн пайыс!..

Гашкӧ, сы кадӧдзыс абу нин дыр...

ЛИЗА

Час, ме тэд висьтала... абу тан некод...

Пыр тэнӧ ышмӧдӧ удж вӧсна мӧвп,

Гартчӧмыд водзвывса тӧждӧн, а мекӧд...

Радейтан мог йылысь сёрнитны — чӧв!..

.........................................

Арсень мунӧ нӧрыс йылӧ, видзӧдӧ ва вылӧ, кияссӧ чургӧдӧмӧн, быттьӧ кӧсйӧ шымыртны юсӧ.

МӦД ВӦЧӦМ

2-ӧд серпас

Вӧчсьӧ Кузьма Иван ордын. Прӧстӧй крестьянскӧй керка, пельк пытшкӧса: дозмук тыра шкап, ӧшиньясын занавескаяс, пызансӧ вевттьӧма пызан дӧраӧн; кымынкӧ улӧс; стенъясас картинаяс, вождьяслӧн портретъяс; ӧдзӧс дорас — паськӧм ӧшлан тувъяс; пельӧсын — мыссян доз, уліас — таз, — тӧдчӧ судзсьымӧнъя олӧм. Ӧти стенын ӧшалӧ бур пищаль да кыйсян кӧлуй. Веськыдвылас пырӧ ӧдзӧс — чуланӧ, шӧр комнатаӧ (сценасӧ юкӧма кык пельӧ, кыдзи и 1-я серпасъясын). Сэні сулалӧ книга тыра дзоляник шкап (позьӧ 2–3 судта джадж); ичӧтик пызан, пызан вылас паськыд бумага листъяс, кымынкӧ книга, готовальня, чернила доз да гижан кӧлуй. Стенъясас — портретъяс; стен бердас крӧвать; сыкӧд воча, мӧд стенас — часі, петкӧдлӧ 7 1/2 час рыт.

Кыкнан вежӧсас ломтысьӧны карасин лампаяс. Шуйгавылас Матрен лӧсьӧдлӧ пызан вылӧ тшай юан дозмук. Сэсся керкаын некод абу.

МАТРЕН. Регыд нин, кӧнкӧ, пывсьыссяс налӧн, бура дыр нин ветлӧны... Да ӧд и пывсьӧдчысьыд миян эз ло — Демит Крисан вӧлі да кӧн нин кувсьыліс... Выльыд, тыдалӧ, ӧні оз нин ло сэсся... Сійӧ кӧ эськӧ пывсьӧдіс нимвидзӧмӧн, колӧкӧ Арсюклы и кокньӧдыштіс да... Он ӧд тӧд, гашкӧ, збыльысь вомдзасис да... Сэтшӧм сюсь да писькӧс детина вӧлі, да друг мыйкӧ кӧвъясис... Дерт, бара вомидз... Арсюк тай эськӧ сы вылӧ оз верит да... Шуӧ, висьмӧдӧны пӧ кутшӧмкӧ аслыспӧлӧс гагъяс, посньыдик нидзувъяс кодьӧсь, весиг пӧ найӧс и синнад он аддзы... Дерт нин, тыдалӧ, он аддзы пежъясӧс, аддзан кӧ ӧд вӧлі, эн эськӧ лэдз найӧс пырны быд йӧзвиӧ — киӧ и кокӧ... А синнад аддзытӧмтортӧ кыдз кутан?.. Он небось шамырт бӧжӧдыс... Быдсяма дивӧыд ӧні вӧчсьӧ! Войдӧр ми кывлывлім толькӧ кынӧм гаг да шева гаг йылысь... Топӧдас вӧлі кынӧмтӧ, дулльыд петӧ — шогӧдӧ, нюкыртӧ, — сійӧ гагйыд вуджӧдӧ кор... А шева гагйыд пӧ сэтшӧм жӧ тыдавтӧмтор, он пӧ и тӧдлы, кыдз сійӧ вомад тювкнитас да гырк пытшкад пондас йывмыны — чилзӧ да овзӧ, мукӧдыслӧн пӧ сэсся петас дзонь чуман тырӧдз, — шева чуманӧн и шуӧны вӧлі, помнита на ме сійӧс... (Кост тор.) Ог тӧд, ог тӧд, мый лои Арсюккӧд... Ачыс тай вӧлі шуӧ, регыд пӧ, бабӧ, бурда: уна вылӧ нин пӧ вежон, гашкӧ, кыссяс, а со и регыд — кык вежонысь нин дырджык висьӧ, дай оз ӧд кокньӧд, а пыр на нӧшта чорзьӧ висьӧмыс... Пельшӧрӧс талун тшӧктыліс корны, да эз на жӧ волы... Да мый сійӧ миян пельшӧрыд вӧчас — абу ӧд тун, пеж гагъястӧ суставъяссьыд оз вӧтлы...

Лиза пырӧ да гӧгӧр видзӧдлӧмӧн пуксьӧ лабичӧ.

ЛИЗА. Ӧтнад ӧмӧй, Матрен тьӧт?

МАТРЕН. Шойччы, Лизук... Пывсьыны мунісны, регыд нин локтасны.

ЛИЗА. Кӧн нӧ Граша?

МАТРЕН. Граша? Кӧнкӧ куканьяс дінас на... Да мыйла тэныд Грашаыс, тэ ӧд эн сы дінӧ думсьыд лок?..

ЛИЗА (яндысигмоз). Мыйла эг? А Арсень нӧ кутшӧмджык?.. Кокньыдджык абу, оз кывсьы?..

МАТРЕН. Пывсьӧ, пывсьӧ... Виччысьышт...

ЛИЗА (гораджыка). Кокньӧдӧ оз, мися, Арсеньыдлы?

МАТРЕН. Кысь нин кокньӧдас... Не друг ӧні сы пытшкысь пеж гагъястӧ вӧтлан... Тэ, Лизук, веритан он вомдзасьӧмлы? Гашкӧ, Арсюкнымӧс кодкӧ вомдзаліс да? (Сувтӧмӧн виччысьӧ воча шуӧм.)

ЛИЗА. Ме сы вылӧ верита нисьӧ ог нисьӧ... Кӧть эськӧ и вериті, да оз позь: кӧсъя пырны комсомолӧ, кыдз и Арсеньыд...

МАТРЕН. Мый Арсеньыд? Сійӧ оз верит... А ме чайта, сё надейнӧ — вомидз сылӧн. Зонмыд сійӧ сюсь, быдлаӧ киподтуя, кодкӧ вот вежалігтыр и ошкыштіс, кӧнкӧ, сійӧс, а «чурки-будитӧ» эз шу дай... Нимвидзысь ни пывсьӧдчысь ӧд сы шӧрӧ-водзӧ миян ӧні абу ни, гашкӧ эськӧ и ӧтльӧк сетіс... Кыдз ӧні тӧдмалан, мый сылӧн, мыйсяма висьӧм кӧвъясис?..

ЛИЗА. Ревматизм пӧ тай, шуӧ, суставнӧй ревматизм кутшӧмкӧ... Сыысь пӧ, Матрен тьӧт, мортыд оз кув...

МАТРЕН. Дерт, оз сувт, водныыс вӧлі колӧ, а чеччыныыд — код тӧдас, вермылас оз коркӧ...

ЛИЗА (гораджыка). Ревматизмсьыд пӧ мортыд оз кув, шуа.

МАТРЕН. Медъя, медъя!.. Арсюкным кӧ ӧд кулӧ — загреки, сэки ставыс эштас!.. Ӧти пи ӧд и эм Иванлӧн... А код сэсся вермас водзвывтӧ и висьтавны, кутшӧм сылӧн олӧмыс лоӧ... Енмыд эськӧ, дерт, тӧдӧ, да оз верит Арсюкным сылы: некутшӧм ен пӧ абу, шуӧ... Мый сэсся керан? Кос пӧгиб!.. (Мыйсюрӧ ваялӧ пызан вылӧ.)

ЛИЗА. Енмыд абу, дерт, Матрен тьӧт: сійӧн ӧд важӧн попъяс ылӧдлывлӧмаӧсь пемыд уджалысь йӧзтӧ, мед найӧ енмӧн накажитӧмысь полісны, лӧня-рама олісны да эз лысьтны озыръяс вылӧ шуасьны-лэптысьны. Та йылысьтӧ ми тӧдам нин дай быд пионер гӧгӧрвоӧ, босьтам кӧть Сеняӧс...

МАТРЕН. Сеняӧс юалан? Тшӧтш муніс пывсьыны — куимӧн мунісны... Рытывбыд на Арсюк да Сеня мыйкӧ гижисны: Арсюк висьталас, Сеня гижас, Арсюк висьталас, Сеня гижас, — видзӧд, Арсюклӧн киыс висьӧ да, ачыс оз вермы гижныыс, Сеня сэсся и отсалӧ... Тэ он жӧ тӧд, Лизук, дыр-ӧ тайӧ висьӧмыс мортсӧ вӧдитлӧ? Кор Арсюкным бурдас?

ЛИЗА. Ог бара тӧд, Матрен тьӧт. Докторъяс, пельшӧръяс, дерт, ылӧссӧ тӧдӧны.

МАТРЕН. Пельшӧрыд? Миян мыкталысь Питиримыд бара нинӧмтор оз тӧд... Энлы жӧ, пӧдлиннӧ, дум вылӧ уси!.. Спира Матвей ордын ӧд, буракӧ, талун чиганъяс узьӧны? Мыйкӧ тай ӧнтай сэтчӧ вӧлі кежӧны-а...

ЛИЗА. Оз. Эз лэдз Матвейыс... Чиганъясыд эстчӧ, Тӧзя Эжа вылӧ, лэччисны. Сэтчӧ тай зэвтӧмаӧсь ыджыд дӧра чом да узьмӧдчӧмаӧсь...

МАТРЕН. Тӧзя вылынӧсь? Тэ, Лизук, он котӧртлы на дінӧдз Арсюкъяс вотӧдз?

ЛИЗА. Мыйла?.. Ме ог лысьт, пола!..

МАТРЕН. Да, дерт, колӧ... Оз-ӧ волы миянӧ кутшӧмкӧ чиганка да гадайт Арсеньлы?.. Код тӧдас, гашкӧ...

ЛИЗА. Ланьт, Матрен тьӧт! Скӧрмас толькӧ сыысь Арсеньыд... А сэсся кодкӧ кӧ тӧдлас?..

МАТРЕН. Мыйла нӧ вӧтлас? Оз вӧтлы, сылы ещӧ аслыс на любӧ лоӧ сёрнитыштны, шмонитыштны чиганкаыдкӧд... Мун, Лизук, котӧртлы. Мун, сёшайт!..

ЛИЗА (чеччӧ). Аттӧ жӧ!.. Час инӧ ветла... Некодлы жӧ бара, Матрен тьӧт, эн висьтав!..

МАТРЕН. Письтан, письтан, абу ӧд кӧнкӧ су сайын, тані. (Лиза мунӧ. Матрен, ӧдзӧссӧ восьтӧмӧн, видзӧдӧ Лиза бӧрся, сэсся петалӧ посводзас да пыртӧ пуан самӧвар, сувтӧдӧ пызан вылас). Пышйӧма самӧварӧй, сёрнинад... (Чышкалӧ вашъялӧмӧн.) Муніс жӧ... Кыдз нӧ оз мун, радейтӧ ӧд Арсюкӧс... жалитӧ... Час, чиганкаыд кӧ локтас, сійӧ, гашкӧ, мыйкӧ висьталас... Найӧ кыдзкӧ вот вермӧны водзвыв тӧдны мортыдлысь олӧмтӧ. Устав жӧ кутшӧмкӧ сійӧ, шензьыныыд он вермы!.. Ки пыдӧстӧ видзӧдласны да ставсӧ сідзи лючки и висьталасны, мый вӧлӧма, мый ӧні эм да мый водзӧ лоӧ... (Ывлаын кылӧ понлӧн эралӧмӧн увтӧм; сэсся посводзын шум, кок шыяс, гӧлӧсъяс.) Локтӧны кӧ нин-а? (Ӧдзӧс восьтӧ.)

Пырӧны: Иван, Арсень да Сеня. Арсень кӧстыльяса, ыджыд гын сапӧга, пальтоа, шапкаа, тӧбсьӧма; сійӧс ӧтар-мӧдарсяньыс кутыштӧны батьыс да Сеня.

АРСЕНЬ. Но, сэсся ачым кыдзкӧ... Абу ылын...

ИВАН. Да он ӧд вермы, Арсень... Часлы, нуам...

АРСЕНЬ. Вай, лэччысь, батьӧ... Сеня, эн кут, кылан?..

Иван да Сеня лэччысьӧны ньӧжйӧник Арсеньысь, сійӧ ружтігтырйи, кӧстыльясас мыджсьӧмӧн, пырӧ дзоля вежӧсӧ да пуксьӧ крӧвать вылас; ставныс сійӧс колльӧдӧны сэтчӧдз да ньӧжйӧник пӧрччӧдӧны — кольӧны сӧмын гын сапӧгнас; сэсся водтӧдӧны крӧватяс да шебрӧдӧны.

ИВАН. Вот, сэсся шойччышт тані... (Босьтӧ кӧлуйсӧ да петкӧдӧ керкаас, ӧшӧдӧ тувйӧ, сы бӧрын мыссьӧ, чышкысьӧ лабичӧ пуксьӧмӧн да сынасьӧ.)

МАТРЕН. А тӧдчис эз нӧ, Арсюк, пывсяныд?..

АРСЕНЬ

Зэв чӧскыд ӧда, бабӧ... Тӧдчис... Аттьӧ!.. Дай бура жӧ нин пывсьӧдіс менӧ батьӧ... Со!.. (Лэптыштлӧ кияссӧ.)

МАТРЕН.

Но... кольмин?.. Эз тай нӧ быттьӧ чад вӧв-а?..

АРСЕНЬ. Эг кольмы, бабӧ... Эн тай велав... пельтӧм!..

МАТРЕН. Зэв делӧ сьӧкыд пельнад... Тшайтӧ юан он?..

АРСЕНЬ. Час, этша лолышта да сэк нин, бабӧ...

Тэ, Сеня, мун да ю...

Матрен петӧ керкаас.

СЕНЯ. Ме вӧлі кӧсъя гортӧ мунны... Пемді...

АРСЕНЬ. Да водз на ӧд... (Видзӧдлӧ часі вылӧ.)

Кӧкъямыс час на абу... Мун ю... Ӧд миян письмӧ гижан эм дай?.. А ме, час, шойччышта...

Сеня петӧ керкаас. Сэні ставныс тшай юны пуксялӧны шы ни тӧв.

ИВАН. Мам! Кылан? Миян нӧ эз на волыны некоднанныс — Ликӧ ни Граша?.. Эз на, мися, волыны?

МАТРЕН. Эз на тай... Сёрмисны мыйкӧ талун?

СЕНЯ. Талун ӧд вартӧм помалӧны да, сійӧн, кӧнкӧ.

ИВАН. Таво водз вартсис... Артельнад пыр жӧ ӧдйӧджык уджыд топалӧ...

АРСЕНЬ. (кияссӧ вывлань лэптыштавлӧ).

Но, трустӧ, кор нӧ висьӧмсьыс ме мынла?..

Да ог жӧ дзикӧдз сетчы ревматизмлы?..

Кӧть мый, а наперво пыр водзӧ сынлам!..

Став вынӧс пукта ме социализмлы!..

Оз вермы лоны мекӧд сэтшӧм делӧ,

Мед кутшӧмкӧ проклятӧй висьӧм торкис

Став уджӧс, мыйӧ кутчыси сідз смела?.. (Кост.)

ИВАН. Дырджык кӧ оз воны ещӧ, кӧдзалас пывсяныс...

АРСЕНЬ (декламируйтӧмӧн).

Да... Пывсян, пывсян, чӧскыд ӧда пывсян!..

И коді тэнӧ думайтлӧма, кор?

Тэ уна йӧзлы, ылі муӧдз кывсян...

И быдлаын тэ, пывсян, колантор!..

Кӧть тураснад тэ дзоля, ляпкыд мусянь,

Кӧть абу тэнад ёна тӧдчан мич, —

Тэ мудзьяс бӧрын мелі мам кодь муса,

Пыр сетан мудзӧм йӧзлы долыд лич.

Быд висьӧм дырйи мунӧны тэ ордӧ,

Кыдз быттьӧ тэ быд висьӧм вӧтлысь врач, —

И частӧ овлӧ — вынсялӧм сыв бордйӧн

Удж вылын мортыд лэбалӧ — швуч-швач!..

Тэ уна йӧзлы олігчӧжыс кывсян

Кыдз асшӧр санаторий да курорт...

Эк, пывсян, пывсян, чӧскыд ӧда пывсян!

Кыдз тэнӧ радейтӧ быд коми морт!..

Кост.

ИВАН. Кӧн та дырасӧ ветлӧны?.. Тӧдӧны жӧ ӧд, аски водз колӧ мӧдӧдчыны кыйсьыны — ветымын версттӧ пемыдсянь пемыдӧдз муртса, гашкӧ, васӧд туйӧдыд воан... Мам! Понйыдлы нӧ сетлін эн сёйны?

МАТРЕН. Мый шуан?

ИВАН. Понтӧ, мися, Катшыстӧ вердлін эн?

МАТРЕН. Вердлі, вердлі, пывсьыны мунӧм бӧраныд и петкӧдлі сёянсӧ.

АРСЕНЬ. А... бабӧ! Кылан, бабӧ?

СЕНЯ. (тувкнитӧ Матренӧс да индӧ чуланлань). Арсеньыд тэнӧ корӧ.

МАТРЕН (ӧдйӧ пырӧ Арсень дінӧ). Мый нӧ, Арсюк?

АРСЕНЬ. А пельшӧрыд нӧ, бабӧ, эз на волы?

МАТРЕН. Эз на... Мамыд ни, Грашаыд ни...

АРСЕНЬ (гораа). Да пельшӧрыдтӧ, мися?..

МАТРЕН. Пельшӧрыд? Эз на, Арсюк...

АРСЕНЬ. Тэ, гашкӧ, сійӧс корны эн и ветлы?..

МАТРЕН. Сеня — том морт — ӧдйӧджык котӧртлас...

АРСЕНЬ (гораа). Тэ, мися, сійӧс корлін?

МАТРЕН. Корлі... водз асывводзнас и ветлі... Кӧсйис волыны, а ме ог тӧд, мыйла ӧнӧдз эз пырав... Тшайтӧ юан он, Арсюк? Кисьта ог?

АРСЕНЬ. Эн кисьт, оз ков... А Сеня юӧ оз нин?

МАТРЕН. Юӧ на.. (Лӧсьӧдышталӧ шебрассӧ.)

..................................................

Сеня лӧсьӧдчӧ гижны. Иван кыськӧ перйӧ лаз да сійӧс кытсюрӧ дӧмлӧ пызан дорын аслыс мыйкӧ мураліг-сьылігтырйи. Матрен идралӧ пызан вылысь йӧв — кисьтӧ кринчаӧ да петкӧдӧ посводзас; сэсся самӧвар шонтӧ — посводзас жӧ петкӧдлӧмӧн.

СЕНЯ. Мый нӧ гижныыс?

АРСЕНЬ. А ӧнтайнад нӧ, Сеня, кытчӧ сувтім? Вай лыддьышт этша, сэки тӧдны кутам...

СЕНЯ (лыддьӧ). «Сы понда регыдъя кадын техникумӧ...» (Бергӧдчылӧмӧн юалӧ:) Али водзысяньджык?..

АРСЕНЬ. Но, лыддьы, лыддьы, кысянь босьтін...

СЕНЯ (лыддьӧ). «...тыдалӧ, менам воӧм оз ло. Но ме чайта, вывті кузя висьӧмӧй оз жӧ нюжав. Кора кольны менӧ тайӧ во вылас студентъяс лыдын. Мыйта коля велӧдчан программаысь, сійӧс кӧсйыся верстайтны, а мыйӧн бурдышта — пыр жӧ локта техникумӧ». (Юрсӧ лэптӧ.) Ставыс.

АРСЕНЬ. Но сэсся пом и эм... Да нӧшта содты. Вай гиж: «Тайӧ шыӧдчӧм дінас... Тайӧ шыӧдчӧм дінас...» (Аслыс.) Эг вермы помавны медбӧръя вотӧ!..

СЕНЯ. Но... «Тайӧ шыӧдчӧм дінас...»

АРСЕНЬ. «...шыӧдчӧм дінас... пукта сиктса пельшӧрсянь... пукта сиктса пельшӧрсянь...» (Аслыс.) А пельшӧрыд вот, трустыд, эз и волы...

СЕНЯ. «..пельшӧрсянь...»

АРСЕНЬ. «…справка».

СЕНЯ. (гижӧ) «…справка».

АРСЕНЬ.

А ӧні улӧджык вай сэтчӧ гижышт:

«Тіян студент... Арсений Уляшов»...

«Арсений Уляшовсӧ» гижны тэд оз ков,

Ме сэтчӧ кырымася кыдзкӧ ачым,

А то неграмотнӧй студентӧн лоан...

Но гижӧдсӧ да ручка вайлы татчӧ...

Сеня сетӧ, улӧс вайӧ крӧвать дорас, Арсеньлы кырымасьны.

АРСЕНЬ.

А кырымалан да, чайтасны здоровӧн...

(Кырымалӧ.) Эз «Уляшов», а «Чляшев» артмис, трустыд!..

Тэ босьт да «У»-сӧ шуйгавывджык крукыльт...

СЕНЯ.

Сійӧ артмас... (Нуӧ гижӧдсӧ пызан вылӧ да справитӧ.)

АРСЕНЬ.

Но сэсся, колӧкӧ, тэ котӧрт гортад...

Да, энлы, Сеня... нолтӧ, татчӧ волы... (Сеня локтӧ.)

Тэ частӧ пыравлан Крест Педӧр ордад?

СЕНЯ.

Зэв шоча сюрлӧ — иганӧн пыр олӧ.

Ме книгатӧ тай тӧндзи сылысь босьтлі,

Зэв ёна видіс... Ӧні оз и восьтлы...

АРСЕНЬ.

Тэ, Сеня, сюсьджыка сы бӧрся видзӧд...

Кор лёктор аддзан — висьтав меным, — сідз ӧд?

СЕНЯ.

Кыдз стрӧка сюрас — пыр ме кыйӧда,

Да игнасьӧ век, — морӧн лыйӧ да...

Тэ, Арсень, регыдджык вай бурд, эн вись!..

АРСЕНЬ.

Эн тӧждысь, Сеня, — бурда... бурда регыд!

Ӧд том на ме, а томыд — винёв, крепыд!..

Вай мыччы меным пызан вывсьыс книга,

Эм сэні «Что такое ревматизм»,

Зэв дзоляник...

СЕНЯ (корсьӧ).

Со, сюрис. (Сетӧ Арсеньлы.)

АРСЕНЬ.

Но сэсся мун... Да аски бара волан...

Сеня мунӧ. Арсень заводитӧ лыддьысьны.

ИВАН.

Гортад, Сеня?

СЕНЯ.

Гортӧ, Иван дядь. (Петӧ.)

МАТРЕН

(пырӧ Арсень дінӧ).

Гашкӧ, тэныд, Арсюк, сёйыштны колӧ? Кынӧмыд сюмалӧ оз?

Водзӧ вӧчигӧн Иван кымыныськӧ петавлӧ керкасьыс — понсӧ видлыны.

АРСЕНЬ.

Оз сюмав... Лизаыд тай эз жӧ волы...

МАТРЕН.

Лизаыд?.. Сійӧ бара волас на...

АРСЕНЬ.

А чиганкаыд талун, дерт, оз лок...

МАТРЕН.

Чиганкаыд абу жӧ лёк? Найӧ ещӧ кутшӧм меліӧсь!.. Сідз пытшкӧсад и пырӧны, он кӧсйы, да сетчан... Ок, мудерӧсь! — дзик чиганкаяс и эмӧсь!..

АРСЕНЬ (аслыс).

Зэв интереснӧ!.. Оз ӧд, кӧнкӧ, лок вот-а...

Ог эскӧм кузя — сёрнитны сідз окота!..

(Матренлы.)

Тэ, бабӧ... он на кӧсйы водны узьны?

МАТРЕН.

А эштам на ӧд: войыд ӧні кузь нин.

(Петӧ керкаас да ноксьӧ самӧварӧн да дозмукӧн.)

АРСЕНЬ.

Но, ладнӧ!.. Тӧрыт мӧдӧдім проект,

А аски техникумӧ ыста письмӧ, —

Спокойнӧджыка ӧні позяс висьны... (Друг кватитчӧ.)

Но, мый ме сӧра? «Висьны?» Ог, ог сетчы!..

А главнӧйыс — проект, проект! Ме сэтчӧ

Став здоровйӧӧс ассьым вот и вошті!..

Да... кӧдзыд ваыд мӧрччис, — ёш-за-ёштӧ!..

Пырӧны Питирим да Сергей. Питиримлӧн пальто улас еджыд халат, киас ичӧтик ящик. Сергейлӧн нырыс йодӧсь.

ПИТИРИМ.

Здорово!.. Ми вот висьысь дінад локтім.

ИВАН.

Локтӧй, локтӧй! (Чеччӧ.) Пырӧй сэтчӧ. (Индӧ чуланлань.) Сэні сійӧ, Арсеньыд...

Питирим да Сергей пӧрччӧны вылыс паськӧмъяссӧ да ӧшӧдӧны тувъясӧ. Иван бӧр пуксьӧ дӧмсьыны.

МАТРЕН

(ӧдйӧ пырӧ Арсень дінӧ).

Арсюк, эсійӧ лёк пельшӧрыд локтіс.

АРСЕНЬ.

Но, мед нӧ татчӧ пырас. (Матрен бӧр петӧ керкаас.)

Питирим да бӧрсяньыс Сергей пырӧны Арсень дінӧ. Питирим ящиксӧ пуктӧ улӧс вылӧ. Арсень гӧгӧр гоннялӧ, скӧйялӧ.

ПИТИРИМ (сувтӧ Арсень водзӧ).

Тэ висян али мый, Арсень Иваныч?

Сергей тшӧтш видзӧдлӧ Арсень вылӧ да шпыньмунӧмӧн бӧр вешйӧ.

АРСЕНЬ.

А ог кӧ вӧлі вись ӧд, эг и корлы...

Ме эськӧ-й ачым волі, абу паныч,

Да ог вермы... Тэ нӧ мый сідз сёрмин?..

ПИТИРИМ

(корсьысьӧ ящиксьыс).

Не друг ӧд, зонмӧ, ми вокыд вот слӧйман...

Кузь лунтӧ тёнькъялан да быттьӧ йӧйман...

А рытгорувнас вуграсьны ме ветлі...

Ӧд регыд пуксяс тӧв, сэк сэсся — петлӧ! —

Он кый сэк вугырнад!..

(Локтӧ Арсень дінӧ трубкаӧн — стетоскопӧн.)

Час, нолтӧ, видлам.

Тэ неуна вай пуксьыв...

(Отсалӧ Арсеньлы пуксьыны. Сэсся трубканас кывзӧ морӧссӧ да мышсӧ Арсеньлысь, дӧрӧмсӧ лэптылӧмӧн, шуалігтырйи.)

... Лолышт пыділань...

А ӧні — ортсылань... Эн лолав... Гм-гм!.. Лолышт...

Эн лолав... Лолав... Ӧні сідзи олышт...

(Сэсся трубкасӧ пуктӧ да, кинас тотшкӧдӧмӧн, видлалӧ морӧссӧ да мышсӧ.)

А сьӧлӧм тонъясад оз кывны перебойяс...

Дай тэнад абу на туберкулёз...

АРСЕНЬ.

Да менам юкалӧны кокъяс, сойяс...

ПИТИРИМ.

Час, пырысь-пыр ми пуктам диагноз...

(Вешйыштӧ Арсень дінысь да мӧвпалӧ.)

АРСЕНЬ (аслыс).

Эк, доморощеннӧй тэ Гиппократ!

Тэ либӧ неуч, либӧ бюрократ!..

(Гораа.) Тан диагнозыс — ревматизм суставнӧй.

Ме тӧда — прӧстудитчи кӧдзыд ваын...

СЕРГЕЙ (батьыслы).

А... Э-тэ-тэ! — Водянка, сідзкӧ, явнӧй,

Ӧд мортыс прӧстудитчӧма водаын?..

Бур средство сэсь — слабительнӧй, касторка...

А сідз жӧ мочегоннӧй — скипидар!..

АРСЕНЬ (аслыс).

Дурак!..

ПИТИРИМ (Сергейлы, скӧрысь).

Ланьт, йӧй!.. «Водянка»... Мыйла сюйсян, торкан,

Кор тэнад сьылі йылад тыртӧм шар?..

(Арсеньлы.)

Пӧжалуй, збыль тэ висян ревматизмӧн...

Тэ принимайт антипирин да... хина...

Кор гыркыд йӧрмас, колӧ вӧчны клизма...

А сэсся зэв бур гӧрд гормӧга вина...

Но толькӧ хина миян ӧні абу, —

Медикаментъяс мӧдӧдӧны слаба...

АРСЕНЬ (дӧзмӧмӧн).

А ме вот лыдди книгаысь да, колӧ

Медъёна салицилӧвӧй раствор

Да сэсся мазьӧн мавтны — ихтиолӧн...

ПИТИРИМ.

О, книгаясад гижасны быдтор!..

А тӧдан кӧ, теория сэн ставыс.

Ме, кыдзи ыджыд стажа пельшер-практик...

(Кинас шеныштӧ.)

Да мый?.. Быд поплӧн аспӧлӧс уставыс...

Но, босьтам кӧть пример: вот тэ — ревматик,

Тэ шуан, салициловка пӧ колӧ

Да сэтчӧ ещӧ мазь пӧ ихтиолӧн, —

Зэв бур лекарство (книгаыд эз ылӧд!),

Но салициловкаыд сьӧлӧм вылад

Зэв неблагоприятнӧя влияйтӧ,

А ихтиолыд... их-ти-ол?.. (Мӧвпалӧ.)

АРСЕНЬ (дӧзмӧмӧн).

Но, мый ме кора — вай тэ!..

ПИТИРИМ.

Да, ихтиолыд лякӧсьтас зэв яйтӧ...

Ме сета, меным абу жаль...

(Пуксьӧ пызан дорӧ да гижӧ речепт, мӧвпалӧмӧн.)

АРСЕНЬ.

Да ещӧ — йод.

СЕРГЕЙ

О, э-тэ-тэ!.. Став йодсӧ татчӧ видзи...

(Индӧ аслас ныр вылӧ.)

Мед папа нырӧс сэтшӧма эз дойд!..

АРСЕНЬ (аслыс).

Мый трустла тайӧ йӧйыс локтіс?.. Сідзи?..

(Питиримлы гораа.)

Тэ, Никанорыч, гижышт ещӧ справка,

Мый велӧдчыны висьӧмла ог вермы...

ПИТИРИМ.

А сэтшӧм справкаяс ме сетны верма?

Оз ло мем сыысь некутшӧм затравка?..

АРСЕНЬ.

Но, мый нӧ сэні лёкыс либӧ мыжыс?

ПИТИРИМ.

Час, гижам... (Босьтӧ выль бумага лист.)

Коминад ӧд ог куж гижныс...

АРСЕНЬ.

Гиж рочӧн... Аски техникумӧ ыста... (Питирим гижӧ. Арсень сылысь корсюрӧ юасьӧ.) А тіян аптекаад эмӧсь ядъяс?

СЕРГЕЙ

Дерт, эмӧсь... Толькӧ сетавны ог лысьтӧ...

АРСЕНЬ.

Оз тэнсьыд юавны, он тӧд сы йылысь тэ...

СЕРГЕЙ

Вот, э-тэ-тэ, и тӧда: шкапын, джаджъяс,

А ключыс — со кӧн!

(Зепсьыс кыскӧ ключ чукӧр да зильӧдӧ Арсеньлы пель водзас.)

Фармацевт ӧд ме!..

(Бӧр сюйӧ зептас ключьяссӧ.)

АРСЕНЬ (аслыс).

Но... сідзкӧ тайӧ, дерт, йӧй «фармацевтыс»,

И миян Катшыснымлы ядтӧ сетіс...

ПИТИРИМ (чеччӧ).

Но, вот и справка тэныд... (Сетӧ Арсеньлы.)

АРСЕНЬ.

Ыджыд аттьӧ! (Лыддьӧ.) «Справка. На основании простуды Арсентий Уляшов заболел суставным ревматизмом, что и даю настоящую справку в том, что он учиться не может в виду того, что сильно хворает и руки ни ноги не действуют. Фельдшер П. Типункуров»... (Аслыс.) Гм!.. Гижӧма жӧ, зонмӧ! Чистӧй «роч»... Но ладнӧ... бурджыкыс оз артмы... Олас...

ПИТИРИМ

(сетӧ нӧшта речепт).

А вот речепт, мед кодкӧ аски асывводз

Аптекаӧ лекарствоыдла волас...

АРСЕНЬ (босьтӧ).

А эмӧсь ядъяс — сулема... стрихнин?..

ПИТИРИМ.

Оз позь... Оз шогмы... Боже сохрани!.. (Идралӧ кӧлуйсӧ.)

Керкаӧ пырӧны Лиза да чиганка; бӧръяыс ёсь йыла чышъяна, пельпом вылас ыджыд шаль, паськыд юбкаа.

ИВАН (чуймӧмӧн).

Мый нӧ войнас этійӧ люзьялӧ? (Чиганкалы.) Мун, мун, ступай!..

(Чиганка видзӧдлӧ Лиза вылӧ.)

МАТРЕН.

Мед олыштас, Арсюкыд корліс... Лиза ветліс...

ИВАН.

Арсень, дерт, корис тайӧс... Мый сійӧ нинӧм абусӧ больган, мамӧ?.. (Лизалы.) Тэ ветлін корны тайӧс?

ЛИЗА (яндысигтыр).

Ме, Иван дядь... Оз вӧлі лок ещӧ, да этша и кевми...

ИВАН.

Но, сідзкӧ нӧ — мед... (Чиганкалы.) Пуксьы, садись! Больнӧй (шеныштӧ кинас чуланлань.) Здесь, пельшер есь...

Лиза сетӧ чиганкалы улӧс.

ЧИГАНКА (пуксьӧ).

Дай бог здоровья да счастья вашему семейству!..

МАТРЕН (мунӧ чулан ӧдзӧс дорӧ).

Зэв тай нӧ дыр пондінныд овны?.. Мый пӧльзаыс тіянысь?..

СЕРГЕЙ

Но, э-тэ-тэ!.. Эн увгы тэ, старука!..

МАТРЕН.

Кыдзи нӧ он увгы, войбыд кутінныд мыйкӧ маласьны да?.. (Локтӧ Арсень водзӧ да ньӧжйӧник.) Арсюк, вот и локтіс Лизаыд дай чиганкатӧ вайӧдӧма...

АРСЕНЬ (нимкодя).

Збыль, бабӧ?.. Аттӧ жӧ да, менам Лизук!..

Мун ысты татчӧ кыкнаннысӧ, бабӧ!..

Матрен петӧ керкаас да ыстӧ Лизаӧс да чиганкаӧс.

МАТРЕН.

Кыкнаннытӧ корис. Мун пыр, Лизук. (Чиганкалы.) Тэ тшӧтш мун, ступай сэтчӧ! (Шеныштӧ кинас.)

ПИТИРИМ

(лӧсьӧдчӧ Сергейкӧд мунны). Прӧщай, Арсень Иваныч!..

АРСЕНЬ.

Прӧщайтлы, Никанорыч! Аттьӧ тэныд!..

Питирим да Сергей петӧны, паныдасьӧны Лизакӧд да чиганкакӧд, кодъяс пырӧны Арсень дінӧ.

СЕРГЕЙ (шӧйӧвошӧмӧн).

Но, Лиза, э-тэ-тэ?!. Ок, сьӧлӧм ёпкӧ!..

Чиганка, э-тэ-тэ?! Гадайтны локтӧ?..

ИВАН (Питиримлы).

Но кутшӧмджык нӧ Арсеньыс, ӧпаснӧ абу?

ПИТИРИМ (пасьтасьӧ).

Ӧпасносьт абу... ревматизм... прӧстуда...

ИВАН (ӧдйӧ чеччӧ).

Час, энлы, ме тэныд мыйкӧ петкӧдла, тэ ӧд, гашкӧ, тӧдан? (Ӧдйӧ петалӧ посводзас да пыртӧ яй кусӧк.)

АРСЕНЬ (Лизалы).

Вай, пуксьы, Лизук... Мися, он нин волы?..

(Чиганкалы.)

Садись, гражданка... Коми ты не знаешь?..

ЧИГАНКА (пуксьӧ).

Нет, милый человек, не научилась... Вот пригласила меня эта красная девица! (Индӧ Лиза вылӧ.) Дай бог здоровья, счастья и хорошего жениха!.. (Арсень да Лиза нюмъялӧны.)

ИВАН

(петкӧдлӧ яй кусӧксӧ Питиримлы).

Тэ верман он тӧдны, мыйсяма зелля татчӧ пуктӧмаӧсь?.. Кодкӧ понлы шыбитӧма вӧлі, да муртса эз кув...

ПИТИРИМ.

А нолтӧ, вайлы жельтор...

Иван вайӧ сартас. Сэсся Питирим, Иван да Сергей видлалӧны яй кусӧксӧ. Питирим сійӧс желльӧн бергӧдавлӧ, видзӧдӧ би водзын, исышталӧ. Сергей сы кості корсюрӧ волывлӧ чулан ӧдзӧслань да видзӧдлывлӧ пытшкас, кывзысигтырйи.

АРСЕНЬ (чиганкалы).

Вот это хорошо!.. Мне скучно так лежать...

Спасибо, что пришла!.. Развеселишь хоть ты меня...

ЧИГАНКА.

Не надо печалиться, милый человек! Болезнь твоя пройдет бесследно... Будешь счастлив...

МАТРЕН (ӧдзӧс дорсяньыс).

Арсюк, тэ сылы китӧ сетлы, мед гадайтас, кылан? Китӧ сетлы...

АРСЕНЬ (Матренлы).

Тэ, бабӧ, энлы... Сёрнитыштлам, часлы...

(Чиганкалы.)

Пройдет, конечно, — сам себя я знаю:

Я — молод, крепок и, конечно, счастлив...

Вот только жаль — не вовремя хвораю:

Учиться надо мне, а нет вот силы...

ЧИГАНКА.

А дай-ка руку — погадаю, милый...

(Кисӧ ассьыс чургӧдӧ Арсеньлы.)

АРСЕНЬ (оз сет кисӧ).

Эх, не поможет: чепуха всё это!..

МАТРЕН

(ӧдзӧс дорсянь Арсеньлы).

Сет, Арсюк, китӧ!.. Ачыс нин со сетӧ...

ЧИГАНКА.

Всю правду про судьбу твою узнаю...

Но, дай же руку, милый, — погадаю...

Арсень да Лиза мӧда-мӧдныс вылӧ видзӧдлӧны нюмъялігтырйи.

ПИТИРИМ.

(эновтӧ яй кусӧк).

Тан сӧвершеннӧ яснӧ тӧдчӧ — сулема...

Да кыдзи тэнад понйыд абу кулӧма?

Тэ пыдӧджык яй торсӧ гуав муӧ... (Сергейлы.)

Но, мунам, Сергей.

СЕРГЕЙ (аслыс).

Ак, э-тэ-тэ! — Сідз сьӧлӧмӧй и пуӧ!..

Питирим да Сергей мунӧны, на бӧрся петӧ Иван яй кусӧкнас .

ЛИЗА (Арсеньлы).

А видлы, Арсень... Петкӧдлы тэ китӧ...

АРСЕНЬ.

Да комсомолечлы нӧ кыдзи позьӧ?

Ме ки ог сет, а сідз вот варовитам...

ЛИЗА.

Да прӧста, он ӧд эскы... мый тэ повзин?..

АРСЕНЬ.

Ог эськӧ эскы, дерт, да... мисьтӧм сійӧ...

ЛИЗА.

Но, мыйкӧ мисьтӧм... Сетлы шутка пыдди...

Зэв интереснӧ — мыйджык эськӧ лыддис?..

АРСЕНЬ.

Вай татшӧм шутканас ог ворсӧ, Лизук...

ЛИЗА.

Ме чайті, мися, гажӧдыштан асьтӧ...

ЧИГАНКА.

Не хочешь знать про жизнь, судьбу, про счастье?..

АРСЕНЬ (чиганкалы).

Да, нет, не будем... Как тебя зовут-то?..

МАТРЕН (ӧдзӧс дорсянь).

Да мый нӧ тэ эн тӧдмав ассьыд шудтӧ?..

АРСЕНЬ.

Тэ, бабӧ, мун сэсь!..

(Матрен мунӧ пызан дорӧ да лӧсьӧдлӧ чашкаяс. Арсень чиганкалы.)

Не сердись, гражданка,

Мы люди, знаешь, нового порядка...

Как звать тебя по имени?..

ЧИГАНКА.

Земфира...

АРСЕНЬ.

Земфира?!. Эх, ты!.. (Аслыс.) Аттӧ, ёш за ёштӧ!..

Кыдз сэтшӧм нимнад татшӧм уджас пыран?..

(Чиганкалы.)

Не верится мне что-то... а не врешь ты?

Керкаӧ пырӧ Иван да пуксьӧ дӧмсьыны.

ЧИГАНКА

(видзӧдлӧ торъя ёна Лиза вылӧ лӧгалӧмпырысь моз).

Вы сами врете вот, а мы — уж нет!..

АРСЕНЬ.

Ты Пушкина когда-нибудь слыхала?

ЧИГАНКА.

Не знаю...

АРСЕНЬ.

Был великий наш поэт.

Вот у него одну цыганку звали

Земфирой тоже...

Керкаӧ пырӧ Пищиков, кынӧмас кутчысьӧмӧн, сёрнитӧ нярган гӧлӧсӧн.

ПИЩИКОВ.

Бур рыт, Иван Кузьмич!

ИВАН.

Лок, шойччы...

Пищиков волӧ чулан ӧдзӧс дорас да видзӧдлӧ пытшкас.

ПИЩИКОВ.

Но, пельшерыс нӧ абу тіян ордын?

ИВАН.

Воліс да бура важӧнкодь нин бӧр муніс.

ПИЩИКОВ.

А менам мыйкӧ кынӧмӧй друг висьмис,

Да лолыштны ог вермы... Ветлі гортас,

Сэн висьталісны татысь, тіян ордысь,

А мунӧма нин вот... Глафира кӧні?..

ИВАН

Пывсьыны мунісны мамыскӧд... Воан кад нин ӧні...

Пищиков ветлӧдлӧ нюкрасигтырйи, частӧ волывлӧ да видзӧдлӧ чулан ӧдзӧсӧд.

АРСЕНЬ.

Ты поэтическое имя носишь...

Зачем вот ремесло свое не бросишь?..

Ведь это все — обман, все — небылица...

ЧИГАНКА (Лиза вылӧ).

Зачем звала ты, красная девица? (Чеччӧ.)

ЛИЗА (Арсеньлы, элясигмоз).

Вот ӧні сэсся ме и мыжа лои...

АРСЕНЬ (чиганкалы).

Пришла, так — хорошо: мне веселее...

А пригласила для меня, жалеет. (Нюммунӧ.)

Эх, жаль тебя, Земфира черноокая!

Ты посмотри — какая жизнь широкая,

Счастливая, — бурлит ведь всё вокруг!..

ИВАН (Пищиковлы).

А менсьым кодкӧ понйӧс талун вӧлі ӧтравитӧма! Яйтор шыбитӧма, — пельшӧр видлаліс да, сулема пӧ...

ПИЩИКОВ.

Кулі понйыд?

ИВАН

Эз, бӧр яйсӧ быликтӧма... Дыр жӧ туплясис... йӧлӧн юкталім да, прӧйдитіс кыдзкӧ ^Тані кост. Рукописяс абу 4 лист бок./^...

ЧИГАНКА.

На два слова можно? (Бӧр пуксьӧ.)

Ну, говори...

Лиза недыр мысти пуксьӧ жӧ бӧр.

АРСЕНЬ.

Так вот здесь в чем основа:

Зачем вам жить всё время так тревожно,

По всей стране бездомными скитаться?

Ведь лучше же хозяйством вам заняться,

Оседло, как живут уж многие из ваших, —

Живут, конечно, лучше вас и краше:

Зажиточней, культурней, — безупречно...

ЧИГАНКА.

Я ничего не понимаю, милый... (Чеччӧ.)

Напрасно приходила вот... Прощай!..

АРСЕНЬ.

Постой!.. (Лизалы, юрлӧсас индӧмӧн.)

Тан сьӧм эм, сет вай ӧти шайт...

Лиза перйӧ юрлӧс улысь сьӧм да сетӧ чиганкалы.

АРСЕНЬ (шемӧсӧн).

Ну, вот те на!.. «Не понимаю, милый»...

ЧИГАНКА.

(сюйӧ сьӧмсӧ кытчӧкӧ питшӧгас).

Спасибо! Будь же счастлив ты, мой милый!..

А погадала бы тебе как славно я!

(Виччысьӧ — мунны али абу.)

АРСЕНЬ (аслыс моз).

«Не понимаю, милый»... Это — главное!..

Мӧвпалӧны мыйкӧ дыра ставныс.

Керкаӧ зэв ӧдйӧ пырӧ Епим, жугыль, тревогаа.

ЕПИМ

(пӧшти пырӧмӧн тшӧтш).

Пельшерыс нӧ, Иван, тіянын на али муніс нин?

ИВАН

Бура важӧн нин мунліс...

ЕПИМ.

Аттӧ жӧ!.. Висьталісны татысь... Гортас лоӧ котӧртлыны... (Лӧсьӧдчӧ мунны.)

ЛИКӦ.

Мый нӧ сэтшӧмыс лои, Епим?

ЕПИМ.

Да медбур вӧвным кулі, Серконым...

КОДСЮРӦ.

(тшӧтш, повзьӧмӧн). Чӧ-ӧв?!. Кулі?!.

Шемӧс кост.

АРСЕНЬ (чиганкалы).

Тогда ты не Земфира, а... Ненила!..

ЧИГАНКА.

Прощай!.. Дай бог здоровья!.. (Копрасьӧ да петӧ керкаас, сэні сувтлӧ, видзӧдӧ йӧзыс вылӧ.)

ВИТӦД ВӦЧӦМ

Действиеыс мунӧ сэн жӧ, кӧні муніс медводдза вӧчӧм. Башня бердас лӧсьӧдӧма трибуна кодьӧс. Ӧшлӧма бура уна гӧрд флагъяс. Сюръяясӧд нюжӧдалӧмаӧсь проводъяс, сэн жӧ ӧшалӧны гырысь электрическӧй лампочкаяс.

1937 во, гожӧм пом. Рыт. Сцена сайын, ва дорын, кылӧ валӧн гузьгӧм да станциялӧн уджалӧм шы. Сцена вылын рӧмыд. Трибуна вылын: Павел, Арсень, Максим; трибуна гӧгӧрыс сулалӧны мичаа вӧччӧм йӧз. Башня пос йылын Сеня, киас сылӧн пионерскӧй горн. Йӧз костын тыдалӧны: Кӧсьта, Епим, Петыр, Иван, Парась, Ликӧ, Граша, Лиза (бӧръя кыкыс сьылысьяс пӧвстын).

..............................

ПАВЕЛ (трибуна вывсянь йӧзлы). Тайӧн, ёртъяс, помалам ми торжественнӧй митинг, кодӧс сиӧма вӧлі электростанция восьтӧмлы. Эм ӧти предложение: миянлысь станциянымӧс шуны «20-ӧд Октябр» нимӧн. Кыдз ті, ёртъяс, видзӧданныд та вылӧ?.. (Йӧз костын аплодисментъяс да горӧдӧмъяс: «Бур!» «Мед сідзи и лоӧ!») Сідзкӧ, ёртъяс, тайӧ нимсӧ лыддям примитӧмаӧн. Ӧні сэсся заводитӧй гажӧдчыны ыджыд праздник кузя — сьывны, ворсны, йӧктыны. Митинг лыддя тупкӧмӧн.

...............................

КӦСЬТА (кодлысюрӧ, нимкодя). Со ӧд, другӧ, мый выйӧдз ми воим... Эз жӧ тай дарӧм вош миян партизанитӧмным... Мед жӧ эськӧ ловъяӧсь вӧліны менам вокъясӧй, эськӧ аддзылісны тшӧтш талунъя гажа праздниксӧ...

МАКСИМ (йӧзлы). Но, ёртъяс, заводитӧй сьывны ли, ворсны ли... Первой эськӧ мед олӧмаджык йӧзыс петкӧдлісны гажсӧ... Нолтӧ, ті, тьӧткаяс, босьтчылӧй!.. Видзӧдлӧй, кутшӧм гажа лоис миян тайӧ нӧрысным! Дивъя нин гажӧдчыны танітӧ... Вайӧ, Парась тьӧт, Кӧсьта дядь, ті, ставныд, сувталӧй да кругӧн ворсӧмӧн ли, мый ли, босьтлӧй сьывны!..

................................

АРСЕНЬ. (Лизакӧд вешйыштӧны бокӧ). Но, вот, Лизук, станцияыд и эштіс, уджавны кутіс...

ЛИЗА. Уджалӧ тай эськӧ да...

АРСЕНЬ. Мыйкӧ тай нӧ тэ быттьӧ жугыль?.. Мый нӧ, Лизук?..

ЛИЗА. Тэ, Арсень, бара мунан ылӧ... ме бара коля татчӧ... шогсьыны... Сідзи, тыдалӧ, и кольӧ миян том бур пӧраным: тэ нэм чӧжтӧ пондан велӧдчыны, а ме — шогсьыны... Вот, Грашаыд тайӧ лунъясӧ гижсяс Пилимоныскӧд... Найӧ сідзи лӧсьӧдчылӧмаӧсь: кор пӧ станция воссяс, сэки пӧ и гижсям... А ми век колям янсӧн олӧм вылӧ...

АРСЕНЬ (сералігтыр). Со мыйысь тэ жугыльтчӧмыд!.. Сійӧ делӧыд, Лизук, житейскӧй, дай миян кадным эз на коль... Граша? Грашаыд ӧд миянысь кык арӧсӧн ыджыдджык...

ЛИЗА. Да ӧд и меным нин кызьӧд арӧс... Ачыд коркӧ шулін: техникум пӧ помала да сэки...

АРСЕНЬ. Но, ладнӧ, бурась, Лизук: ми тэкӧд, вай, Пилимонъяскӧд ӧти лунӧ гижсям... Сідзи?

ЛИЗА (радлігтыр). Збыльысь?.. Вот и бур!.. Эн пӧръяв толькӧ, Арсень!..

АРСЕНЬ. Тэ и ме ӧні кыкнанным комсомолынӧсь, а комсомолечьяс оз пӧръясьлыны. Со тэныд кыв: збыль! На тэныд залог! (Топыда киасьӧны.) Ӧні сэсся вай гажӧдчыны кутам тшӧтш! (Мунӧны йӧз пӧвстӧ.)

МАКСИМ (йӧзлы). Ӧні, вайӧ, ещӧ сьылыштамӧй мыйкӧ... Да, подлиннӧ, ті кужанныд «Локтӧйтӧ»?

УНАӦН. Кужам, вайӧ сьыламӧй сійӧс...

Сувталӧны бара кругӧ. Гудӧкасьысь сетӧ аккорд — тонсӧ мед кужисны босьтны сьылысьяс, сэсся ставныс сьылӧны.

1.

Локтӧй, локтӧй, зонъяс, нывъяс.

Гажӧдчамӧй вай! — да

Босьтлам сьыланкывъяс,

Медым юргас вӧльнӧй край!

Припев ^Припевсӧ сьылігӧн колӧ бергалӧмсӧ ӧддзӧдны да сьылысьяслы ворсігмоз йӧктыштавны./^:

Ми олам гажа, шуда кадын,

Водзӧ мунам зумыд радӧн, —

Долыд вӧльнӧй удж —

Ог тӧдлӧй мудз!

Локтӧй, локтӧй, вокъяс, чойяс,

Миян кругӧ тшӧтш! — да

Мед жӧ ӧддзас, збоймас

Гажа сьылан-ворсан кытш.

Припев.

3.

Локтӧй, батьяс, локтӧй, мамъяс,

Лок, став бур рӧдвуж! — да

Коді сьывны панъяс? —

Некод миян моз оз куж.

Припев.

4.

Топыд дружба семья костын —

Багатырскӧй вын, — да

Любӧй крепӧсть босьтам, —

Мый ми перъям — бӧр оз мын!

Припев.

Сьылӧм помалӧм бӧрын пӧшти ставныс йӧктӧны гудӧкӧн ворсӧм улӧ. Арсень сулалӧ орччӧн Лужковкӧд да найӧ нюмъялӧмӧн видзӧдӧны йӧктысьяс вылӧ.

КӦСЬТА (йӧктігмозыс). Аттӧ да, гажа жӧ нин олӧм пуксис!..

ЛИКӦ (йӧктан кытшысь петӧ, локтӧ Арсень дінӧ). Лок, Арсень, эня-пиа йӧктыштам! (Босьтӧ Арсеньӧс ӧтар сойборднас.) Дай тэ тшӧтш миянкӧд ӧтвылысь! (Босьтӧ Павелӧс мӧд сойборднас, да куимӧн пырӧны йӧктан кытшӧ.)

Занавес.

3.Х. 1937. Сыктывкар