ПАРМА НЫВ

Нёль торъя, вит юкӧна драма


Йӧз:


ӦСИП МИТРЕЙ — мужик, ар 25.

СТЕПА — сылӧн гӧтыр, ар 38–40.

КЛАВДИ — Степалӧн ныв, ар 18.

ӦСИП — Митрейлӧн бать, ар 50.

АРТИП — зон, ар 20.

КИРӦ — Митрейлӧн сусед, ар 35.

КАТЯ — сылӧн гӧтыр.

ЗАКАР — озыр морт, дӧвеч, ар 40.

СИМАНОВА } женотделын уджалысьяс.

МАЙКОВА }

МИЛИЦИОНЕР

1 — } ПОНЯТӦЙЯС.

2 —


МЕДВОДДЗА ВӦЧӦМ


Вӧчсьӧ Ӧсип Митрей ордын. Прӧстӧй крестьянскӧй керка пытшкӧс. Веськыда стенас тувйын ӧшалӧ пищаль. Пызан выв тыр нянь, сукар, рудзӧг нянь тупӧсьяс, «сюра» да мукӧдтор (туйӧ мунан кӧлуй). Стенас ен джаджйын ӧбразъяс.

Ар пом. Асывводз.


1-я петкӧдчӧм


КЛАВДИ (ӧтнас пукалӧ лабичын, ӧшинь дорас, лӧсьӧдӧ дадь волыс: вурлӧ дӧраысь да кытсюрӧ кӧртышталӧ. Коник лабичын куйлӧ ноп мешӧк, мыйсюрӧ сэтчӧ сӧвтыштӧма нин). Ӧні сэсся, гашкӧ, сьӧлӧмӧй этша личмунлас. Арся видз чӧжсӧ кӧть ичӧтика красуйтчышта. (Видзӧдлӧ ӧшиньӧд.) Ӧні другӧн сійӧ оз на лок... (Босьтӧ сьывны):


Петас эськӧ муса нылӧй

Кыа бӧрын ме дінӧ...

Мамыс тай сійӧс оз лэдз:

Видчӧ, нывлысь вӧля кутӧ...


Тайӧ эськӧ абу дзик сідзи да: мамӧ эськӧ менсьым вӧляӧс оз кут, дядьӧ тай кутӧ-а. (Ышловзьӧ.) Да ӧд колӧ жӧ вӧлі, зонмӧ, ыштыны мамӧлы Ӧсип Митрей саяс мунны. Сэтшӧм шалопайтӧ эськӧ эз жӧ ков пыртны дась бур овмӧс вылад да, мый сэсся ӧні керан. Киссьӧм ватӧ, буракӧ, он нин курав... Дивъя ӧні сылы дась эмбур вылад и ыджыдавныыд... Ачыс ӧд дзик кушӧн воис татчӧ, весиг нинӧмыс эз вӧв... Паськӧмсӧ и кӧмкотсӧ на батьӧ покониклысь пыр новліс, батьӧ кӧлуйӧн на пыр вӧдитчис и... (Видзӧдлӧ пищаль вылӧ.) Пищальыс батьӧлӧн и... Ставыс батьӧлӧн лӧсьӧдӧм... (Ышловзьӧ.) Да ӧд ӧти воӧн став олӧмыс и вежсис, гудыртчис... Менсьым быд воськов туялӧ, некытчӧ петавны оз лэдз ни... (Видзӧдлӧ гӧгӧр да ӧшиньӧд тшӧтш.) Сэсся ӧд нӧшта на эм менам ыджыдсьыс-ыджыд шогыс, весиг мамӧлы ог лысьт висьтавны, дядьӧысь пола да. Шуӧ тай: ӧні пӧ ӧд позьӧ сідзисӧ, дай тэ пӧ абу рӧдимӧй ныв менам... Мед ен видзас менӧ сыысь! Шуӧны тай эськӧ, енмыс пӧ абу да, код тӧдас: катыдӧ ветлыны оз лэдзны-а, сэні пӧ тай эськӧ быдторсӧ висьтавлӧны да... Но ӧні сэсся дядьӧ вӧравны мунас да коркӧ гусьӧник позяс сэтчӧ котӧртлыны. (Босьтӧ сьывны.)


Арся войӧ сьӧд войӧ да

Сулалі да пукалі.

Сулалі да пукалі да

Видзӧді да виччыси.

Видзӧді да виччыси да

Менам мусукӧй эз лок...


2-ӧд петкӧдчӧм


АРТИП (пырӧ бӧръя кывъяссӧ сьылігӧн да пырысь-пыр сы ног сьылӧмӧн жӧ шуӧ).

Тэнад мусукыд локтіс да

Шуис: Клавдюш, здорово!.. (Серӧктӧ.)


КЛАВДИ (первой повзьыштӧ, сэсся нарошнӧ лӧгасьӧмпырысь). Йӧй Артип!.. Мый сідз пырӧмӧн тшӧтш ӧскаливайтан?

АРТИП (пуксьӧ коник лабичӧ, шапкасӧ пӧрччӧ да киас бергӧдлӧ). Ме, Клавди, нинӧм... весиг и дум вылын эз вӧв сійӧ. Пыригӧн кыла — тэ сьылан. Час жӧ, мися, тэ кӧ сьылан и ме тшӧтш сьылӧмӧн пыра. Пыри тай со дай здоровайтчи тэкӧд, сэсся нинӧм. Збыль, Клавди, эн лӧгась сыысь ме вылӧ.

КЛАВДИ. Мый нӧ та воддза петӧмыд гуляйтны?

АРТИП. Водз нӧ? Регыд нин, гашкӧ, лун шӧр кад лоӧ да? Ӧні ӧд он и аддзыв лунсӧ: югдыштас ичӧтика дай бӧр нин пемдӧ. Ме Педьӧ Кирӧ ордын нин бура дыр пукалі и.

КЛАВДИ. Дядьӧ нӧ сэні на?

АРТИП. Дядьыд и мамыд сэнӧсь. Дядьыд Кирӧкӧд самӧкур юӧны. Мамыд эськӧ нуӧдӧ гортад, да он босьт. Бура гажаӧсь нин. Сійӧн и татчӧ сэсся ӧдйӧджык локті: мися, Клавди, дерт, кӧнкӧ, ӧтнас буретш гортас ӧні. Колӧ зэв ыджыдтор тэныд висьтавны.

КЛАВДИ. Артип, мун дядьӧ вотӧдз татысь. Суас кӧ, кыкнаннымӧс жнёпкӧдас. Тэ, гашкӧ, пышъян, а менӧ...

АРТИП (локтӧ Клавдилань). Эн сэтшӧма пов, Клавдюш. Оз на дзик регыдӧн воны. (Пуксьӧ Клавдикӧд орччӧн.) Пыр мыйлакӧ тэ менӧ ас дінсьыд вӧтлан. Сідз нин корсюрӧ сӧмын син пыр мунлан тэ. Ӧні ичӧтик стрӧка веськаліс дай сэні он кӧсйы мекӧд сёрнитыштны... (Вӧрзьӧдӧ сойӧдыс.) Кывзы, Клавдюш...

КЛАВДИ (нетшыштӧ да уджнас мунӧ коник лабичӧ.) Дугды, йӧй! Ойя да, суасны!

АРТИП (чеччӧ, шапкаасьӧ да локтӧ Клавди дінӧ). Мый нӧ тэ сырчик моз китликасян, Клавдюш?.. (Пуксьӧ орччӧн.) Кывзы, Клавдюш.

КЛАВДИ. Час, дядьӧ вӧралігкості коркӧ сёрнитам. Ӧні вай мун, Артип. (Чеччӧ да бӧр важ местаӧ мунӧ.)

АРТИП (сувтӧ). Сэсся ӧд зэв дыр огӧ аддзысьлӧй. Аски батьӧкӧд сортовка лэдзны каям вӧрӧ, рӧштвоӧдз, гашкӧ, ветлам, весиг видзӧ пыригкежлӧ огӧ волӧ... Клавдюш!..

КЛАВДИ (видзӧдлӧ ӧшиньӧд). Ой, со локтӧны нин! Мун зіля! (Ӧдйӧ вурсьӧ.)

АРТИП. А, дерт, сэсся воан кад жӧ нин. Но, прӧщайтлы нӧ сідз кӧ, Клавдюш! (Ӧдйӧ петӧ.)


3-ӧд петкӧдчӧм


КЛАВДИ (ӧтнас, юрсӧ лэптӧ сералігтырйи). Ӧдва мыні... Эг кӧ пӧръяв — эз и мун эськӧ... Кыськӧ тай эм йӧйыд, горт шӧрын больгыны кутіс радейтӧм йылысь. Войпукигъясӧн кӧ нӧ ещӧ на-а. Ладнӧ, дядьӧ эз су да, сэки эськӧ петкӧдліс кыкнаннымлы звӧн, да ещӧ код юрнад. Зэв ӧд ёна менӧ вежӧгтӧ.


4-ӧд петкӧдчӧм


АРТИП (пыригмозыс). Ак тэ, кулльӧ-мулльӧ, пӧръялӧмыд тай менӧ!

КЛАВДИ (повзьӧмӧн). Бара нин тай нӧ локтан? Аттӧ! (Сувтӧ.)

АРТИП (матыстчӧ Клавдилань). Мыйысь нӧ полан? Некӧн на некод оз тыдав. (Сувтӧ пызан дорӧ.) Дзик пыр муна, Клавдюш... Час, бергӧдчылӧм сайын висьтала нин тэныд, мый вӧлі кӧсъя ӧнтайнад...

КЛАВДИ (кияснас ӧвтчӧ). Эн, эн, эн! Вай мун татысь ӧдйӧджык!..

АРТИП. Кывзы, Клавдюш.

КЛАВДИ (пельяссӧ тупкӧ). Эн висьтав, нинӧм ог кывзы!

АРТИП. Тӧрыт ме ветлі катыдӧ да веськавлі комсомолечьяс пытшкӧ... (Гораа.) Кылан, Клавдюш?..

КЛАВДИ. Весиг нинӧмтор ог кыв. Мун, Артип, мун! Ойя да, дядьӧ суас!..

АРТИП (жугыля нюммунӧ). Мыйла бара сідзисӧ ышнясян тэ? Кывзы, ме сэсся тӧрытнад тшӧтш гижси комсомолечӧ — босьтісны кандидатӧ... (Шеныштӧ кинас.) Эн дур, Клавдюш!

КЛАВДИ (пельяссӧ восьтӧ да полӧмӧн ӧвтчӧ). Дурмин али мый нӧ тэ, Артип? Мун, шуӧны тэныд!

АРТИП (сувтӧ). Сӧмын ӧні некодлы на та йылысь эн висьтав. Он ӧд?

КЛАВДИ. Ог, ог... Мун, вай регыдджык! (Кевмысьӧмӧн Артиплы.) Вай мун, Артип!

АРТИП (кутӧ Клавдиӧс киӧдыс). Мыйла нӧ тэ, Клавдюш, сэтшӧма полан?..

КЛАВДИ (нетшкысьӧмӧн). Дядьысь пола... Ойя да лэдз вай, да мун нин, мися!

АРТИП (меліа). Он ӧмӧй менӧ радейт!.. Ме тай нӧ эськӧ...

КЛАВДИ. Радейта, радейта!.. Мӧдысь коркӧ, дядьӧ вӧравны каяс да... Ӧні мун.

АРТИП (шымыртӧмӧн кутлӧ Клавдиӧс). Мед ӧд эськӧ важӧн сідз шуин, Клавдюш!

КЛАВДИ (тіралӧ). Мед жӧ эськӧ шогыс эз вӧв менам! (Тшӧтш кутлӧ.)


5-ӧд петкӧдчӧм


СТЕПА (пырӧ, аддзӧ кутчысьлӧмсӧ да чуймӧ). Бласлӧ кристос? Клавди? (Клавди да Артип лэдзчысьӧны.)

КЛАВДИ (яндысигтырйи пуксьӧ лабичас да уджсӧ босьтӧ). Мый нӧ сэсся, мамӧ, керан, некыдз оз мун Артипыс да.

АРТИП (Степалы, вашъялӧмӧн). Нинӧмтор, Степа тьӧтка! Ичӧтикатӧ том войтырлы позьӧ... Тӧдан ӧд ачыд — гажӧдчӧй пӧ тай гажа том кадад... Но, прӧщайтлӧй нӧ сідзкӧ! (Петӧ.)


6-ӧд петкӧдчӧм


СТЕПА (пӧрччысьӧ). Мый нӧ тэ, нылӧ, керсян?.. Дядьыд кӧ нӧ суис, сё загреки? Петкӧдліс эськӧ сэки «гаж».

КЛАВДИ (юрсӧ лэптывтӧг). Локтіс да быттьӧ сир турун крукасис, некыдз оз мун...

СТЕПА. Сэсся и кутчысьлыны? Кыськӧ тай эмӧсь йӧйясыд. Да ӧд горт шӧрын лун шӧр лунӧ оз жӧ позь сідзи? (Локтӧ пызан дорӧ да няньсӧ сӧвтӧ ноп мешӧкӧ.)

КЛАВДИ. Мый нӧ сэсся ме вӧчи, сибдіс ачыс ме дінӧ да? Мед нин, мися, кыдзкӧ регыдджык мына — нарошнӧ сідзи и кутыштлі сэсся...

СТЕПА. Код тӧдас тіянлысь, гашкӧ, и збыльысь да. Дядьыд кӧ нӧ суис?..

КЛАВДИ. Ӧні тай, наперво, эз на су-а... Тэ ӧд, мамӧ, он жӧ висьтав сылы?

СТЕПА. Висьтала бара... Локтас да, пырысь-пыр и удта.

КЛАВДИ (повзьӧмӧн видзӧдӧ мамыс вылӧ). Збыль шуан, мамӧ?.. Эн нинӧм висьтав дядьӧлы, нӧйтас дзикӧдз менӧ. Он ӧд висьтав, мамӧ?..

СТЕПА. Повзин?.. Ог, ог, йӧюкӧй, ог висьтав... Тӧда ӧд ачым. (Ышловзьӧ.) Дадь волысыд нӧ эз на эшты тэнад? Регыд локтас, помалісны нин винасӧ.

КЛАВДИ. Эштіскодь нин... Дядьӧ нӧ ёна код, мамӧ?.. Вермас жӧ ӧд кайныыс?

СТЕПА. Кыкнанныс бура кодӧсь. Каям пӧ тай шуӧны-а, тотшсьӧдам пӧ Мегыра ёль йылӧдзыс пыр сьылігтырйи... Лымъялыштӧма да кокниа эськӧ нортъяснысӧ кыскасны. Кирӧлӧн сӧвтӧма нин ставсӧ. Понйыдлы нӧ петкӧдлін эн роксӧ?

КЛАВДИ. Ок, менам сійӧ и вуні дзикӧдз. Час, петкӧда. (Чеччӧ.)

СТЕПА. Тэ помысь. Эштӧд нин, вай, волыссӧ, ме ачым петкӧда. (Мунӧ пачводз дорӧ.) Эг кӧ казяв, тшыгйӧн эськӧ лои Катшыслы тіньгыртны Мегыраёль йылӧдз кык лун чӧж.

КЛАВДИ. Кык лун ӧд оз жӧ ков нелямын версттӧ кайны? Ми тай нӧ батьӧкӧд кулан воас ӧти лунӧн кайлім.

СТЕПА (гырничӧн петігмозыс). Талун ӧд со лун джынйыс кольӧма нин. Чурка егырӧдз кӧ воасны эськӧ, шань нин да. (Петӧ.)


7-ӧд петкӧдчӧм


КЛАВДИ (ӧтнас). Но, мамӧ тай эськӧ нинӧм эз шу, эз видчы ёнасӧ. Тыдалӧ, важ мозыс на жалитӧ менӧ. (Ышловзьӧ.) Ӧні тай не батьдырся кодь олӧмыд миян лои, шондібанӧй!.. Менӧ весиг сійӧ вӧравны тшӧтш катӧдліс Мегыра ёль йылӧ. Велӧдіс лэчьяс, чӧсъяс сиавны, капканъясӧн вӧдитчыны. Пищальӧн лыйсьыны вот эз лэдзлы, зэв эськӧ окота вӧлі да... (Кост.) Йӧй Артип!.. Эз ӧд и мун водзджыктӧ, эськӧ сэки и мамӧ эз су. Ӧні кыдзкӧ быттьӧ яндзим меным сыысь... Сэсся бара некор жӧ нин тадз ог вӧч. (Чеччӧ.) Но, эштіс, буракӧ, сэсся.


8-ӧд петкӧдчӧм


СТЕПА (пырӧ тыртӧм гырничӧн). Дядьыд локтӧ нин кылӧ, Клавди. (Нуӧ гырничсӧ пачводз дорӧ да локтӧ пызанлань.)

КЛАВДИ. Ойя, ме пола, мамӧ, сыысь... (Мамыскӧд лӧсьӧдӧны ноп мешӧк.)

СТЕПА. Мый нӧ тэ лоин, нылӧ? Ог ӧд висьтав, эн пов. (Кылӧ Митрейлӧн сьылӧм: «А завтра рано, чуть светочек, заплачет вся моя семья».)

КЛАВДИ. Ог сыысь пов, сідзи мыйкӧ пола, сьӧлӧмӧй дрӧжжитӧ...

СТЕПА. А тэ кутчысь, эн сетчы полӧмыслы. (Митрейлӧн сьылӧм матысмӧ: «Еще заплачет дорогая, с которой три года я жил».)

КЛАВДИ. Он эськӧ, мамӧ, кӧсйы сетчыныыс да, ачыс кыдзкӧ босьтӧ.

СТЕПА. Чӧв, ланьт!..


Бура дыр некоднаныс нинӧм оз шуны. Митрейӧс виччысьӧны.


9-ӧд петкӧдчӧм


МИТРЕЙ. (первой посводзас, кылӧ, сьылӧ; сэсся керкаас пырӧ. Пасьтасьӧма нин вӧрӧ мунӧм вылӧ: шабура, лазъя, кыса, порошничаяса, патронташа, вӧралан шапкаа. Ачыс бура код. Пырӧ сьылігтырйи). ...три года я жил. (Сэсся джодж шӧрас зунясьӧ.) Баба, гӧтов ставыс? А?.. Клав...- (Сутшиктӧ.) -дюк!.. гӧтов?.. Больше ничево...

СТЕПА. Ставыс, ставыс... Пуксьыштлы, вай, Митрей, ноптӧ кӧрталігкості.

МИТРЕЙ. (збодера). Кутшӧм али пукалӧм, трасича! Колӧ ӧдйӧджык кайны вӧрӧ, а тэ тшӧктан пукавны? Мед вӧлі сей минут ставыс гӧтов, больше ничево! Кылан, баба? Пӧрт, пурт, тшайник, чер, лызь, койбедь, тасьті-пань, — став прӧмышляйтан шылльӧ-мылльӧыс! (Пуксьӧ коник лабичас.) Вӧрзьӧдчыны важӧн нин колӧ вӧлі, а тіян век на нинӧм абу лӧсьӧдӧма. Мижуй пара, больше ничево!

СТЕПА. Ставыс нин сійӧ нортъяд, сарайын. Нянь ноптӧ вот кӧртыштам дай мун, бласлӧ кристосӧн. (Кӧрталӧ ноп мешӧксӧ.)

МИТРЕЙ (чатӧртчылӧ пищаль вылӧ, чеччӧ да босьтӧ пищальсӧ киас). Тайӧ эськӧ мед оз вун. (Видлалӧ.) «Крымка» ӧд, трасичаыд, ачыс. «Крымка!» Педьӧ Кирӧлӧн прӧстӧй шомпура пищаль, а менам «Крымка!..» Пасибӧ свӧяклы та вылӧ! (Серӧктӧ.)

СТЕПА. Кутшӧм свӧяклы?

МИТРЕЙ. Но, либӧ, шуны кӧ, тэнад воддза мужикыдлы! Бур пищаль меным кольӧма Сидӧр Васькаыд, поконик...

СТЕПА (дӧзмӧмпырысь). Мый нӧ, нинӧм абусӧ, Митрей, больган?.. Мыйла кулӧм мортсӧ сералан?..

МИТРЕЙ. Ланьт, некутшӧм серам абу, пасибӧ тай кайта! Сідз ӧд, Клавдюк?

КЛАВДИ (небыдика). Ме ог тӧд, дядьӧ.

МИТРЕЙ. Тӧдан эськӧ да он висьтав, больше ничево. (Степалы.) Но, зільджыка, баба, вӧр! Проч манитан менӧ, трасича. Со ӧд лун джынйыс виччысьӧмӧ и коли.

СТЕПА. Эштіс нин, эштіс, Митрей... Час петкӧда да кӧртала нортъяд. Клавди, вай волыссӧ тшӧтш лӧсьӧда. (Босьтӧ ставсӧ да петӧ.)


10-ӧд петкӧдчӧм


МИТРЕЙ (локтӧ Клавдилань). Тэ нӧ, Клавдюк, кыдз кутан метӧг овнысӧ? (Босьтӧ сойӧдыс шуйга кинас.)

КЛАВДИ (полӧмӧн). Эн вӧрӧд, дядьӧ... Кыдзкӧ ӧд олам, быть ӧд ов... Лэдз, дядьӧ...

МИТРЕЙ. Кутшӧм нӧ ме тэныд дядь, Клавдюк? Тэныд дас кӧкъямыс арӧс, меным — кызь вит, сизим арӧс и эм костаным да? А мамыд меным вот абу пара, больше ничево: сылы регыд нин нелямын тырас... Веськыда кӧ шуны, Клавдюк, ме ӧд эг мамыд вӧсна и пыр тіян овмӧсад — тэ понда дзик ышті ме. Он верит? Сё кристос, збыль, Клавдюк. Мамыд ӧд пӧрысь старука кодь нин, кыдз сійӧс верма ме радейтны? Ог вермы дай ог и радейт, больше ничево! А тэ ӧд, Клавдюк, мича чӧжрысь кодь на дзик... да тэ эн пов меысь, мый сэтшӧма тіралан? (Кутӧ топыдджыка.)

КЛАВДИ (нетшкысьӧ). Ойя да, лэдз, дядьӧ!.. Мамӧ пырас!

МИТРЕЙ. Мый кӧть и пырас?.. Тэкӧд ӧтлаасям да, мамыдкӧд ме торйӧдча, рӧзвод сылы сета... Ӧні ӧд абу сійӧ омӧль... Тэ кӧ эськӧ вӧлін менам рӧдимӧй ныв, сэки эськӧ, дерт, и сёрниыс эз вӧв... Тэ ӧд ачыд грамотатӧ тӧдан, школа кончитлӧмыд. Дай ме неуна кужа лыддьысьны... Кӧть эськӧ Краснӧй Армияӧ эг шогмыв, да ӧнія права йывсьыд — ок, бура ме тӧда: любӧй коммунистӧс йӧртны верма споруйтӧмӧн, больше ничево! Но мый, Клавдюк, олан он мекӧд?

КЛАВДИ. Эн юась, дядьӧ, весиг яндзим кывзыныыс. Ойя да, лэдз вай менӧ... (Нетшкысьӧ.) Ог вермы, оз позь сідзи, дядьӧ.

МИТРЕЙ (скӧрысь йӧткыштӧ Клавдиӧс. Клавди муртса оз усь, пуксьӧ лабичас да юрсӧ ӧшӧдӧ. Митрей бура дыр сы вылӧ видзӧдӧ). Тэнад, трасичалӧн, век на важ руыд? Виччысь, нылӧнка! Мекӧд кӧ он ов — некодкӧд ог лэдз!.. Кывла кӧ либӧ казяла кӧ кодкӧдкӧ гуляйтӧм-кутчысьлӧм — бур оз ло! (Лэптӧ пищальсӧ да восьтӧ затворсӧ.) Этійӧ «крымканас» и дзенга плешад, больше ничево!.. Патронас сюя пуля да тадзи (веськӧдӧ стволсӧ Клавдилань) и клопка, трасичаӧс!

КЛАВДИ (повзьӧ). Ой, дядьӧ, эн лый?! (Горӧдӧмӧн чеччӧ да кутчысьӧ пищаляс.) Ой!..

МИТРЕЙ (наяна сералӧмӧн). Ӧні эн на пов, зарадтӧм ӧд пищальыс... А мӧдысь кежлӧ тӧд, больше ничево! (Волысалӧ пищальсӧ пельпомас да бӧр пуксьӧ важ местаас, куритчыны заводитӧ. Бура ыджыд кост. Клавди пуксьӧ жӧ, бергӧдчӧ стенлань да тупкысьӧмӧн гусьӧник бӧрдӧ. Митрей аслыс.) Кӧть мый, а кыдзкӧ ме песовта на тайӧс. Не тайӧ кӧ ӧд, ме эськӧ эг и пыр Степа вылад: мися, час, нылыс быдмыштас да мамсӧ вежас меным... А бурӧн, тыдалӧ, оз кӧсйы сетчыны, трустыд...


Ывлаын Кирӧлӧн гӧлӧс: «Митрей, коли ӧд! Лок, Митрей».


КЛАВДИ (видзӧдлӧ ӧшиньӧд). Педьӧ Кирӧыд со мунӧ нин. (Чышкалӧ синъяссӧ да пӧлялӧ аслыс чужӧмас.)

МИТРЕЙ (локтӧ ӧшинь дорӧ да горӧдӧ). Дзик пыр, Кирӧ! Эн коль, пырав! (Кирӧлӧн гӧлӧс: «Ог нин пыр. Лок, ме надзӧник довга»). Но-но! (Мунӧ ӧшинь дорысь.)


11-ӧд петкӧдчӧм


СТЕПА (пырӧ). Кирӧыд мунӧ нин, Митрей... Миян ставыс жӧ гӧтов, позьӧ, бласлӧ кристосӧн, вӧрзьӧдчыны...

МИТРЕЙ. Но, бура олӧй метӧг. Клавдюктӧ, баба, эн зэв пӧтачит, гуляйтны, войпукны ветлӧм мед эз вӧв, больше ничево!.. Тӧлысь мысти кымын, ме чайта, бӧр гортӧ воам... Но, вайӧ жӧ пуксьыштламӧй сэсся. Прӧщайтчытӧг абу лӧсьыд мунны. Он ӧд тӧд, мый вермас вӧрад лоны.


Ставныс здук мында шы ни тӧв пукалӧны, сэсся чеччӧны да юрбитӧны. Юрбитігас Митрей шатлалӧ. Сы бӧрын окасьӧмӧн прӧщайтчӧны. Степаӧс Митрей окалӧ кӧдзыда.


СТЕПА (прӧщайтчӧм бӧрын). Мед жӧ Микайлӧ аркандел видзас тэнӧ быдсяма приччаысь.

МИТРЕЙ (оз кывзы Степалысь, прӧщайтчӧ Клавдикӧд топыда кутлӧмӧн да окалӧмӧн). Бура ов, Клавдюк!.. Ме тайӧ туйсӧ ветла тэнад тшассьӧ вылӧ.

КЛАВДИ (веськодя). Мед инӧ унджык прӧмыс тэныд, дядьӧ, шедас.

МИТРЕЙ. Тэ кӧ шуда — бур и прӧмыс сюрас... Но, мунім, господи благӧслӧви!


Петӧ. Сы бӧрся петӧ тшӧтш Степа.


12-ӧд петкӧдчӧм


КЛАВДИ (ӧтнас. Пуксьӧ ӧшинь дорӧ да ышловзьӧ). Но, слабог, муніс эськӧ. Аттӧ, ёна жӧ повзьӧдіс менӧ пищальнас. Ме чайті, лыяс нин, мися, места вылам. (Кост.) Эз тшӧкты гуляйтны ни, войпукны петавны. Сы вылӧ эськӧ ӧні стрӧкаыд сюрлас нин да. (Друг.) Мый бара ӧнтай Артипыс висьталіс-а? Эг ӧд кывзы йӧйыд. (Ышловзьӧ.) Ёна жӧ эськӧ, буракӧ, радейтӧ сійӧ менӧ да ог лысьт... Со ӧд кутшӧма грӧзитіс менӧ дядьӧ... Ойя жӧ нин дай олӧм менам! (Бергӧдчӧ ӧшиньлань.)

МИТРЕЙ (ывлаын горзӧ). Кирӧ, эн коль! Сувтлы!.. Клавдюк, прӧщайтлы!

КЛАВДИ (аслыс моз). Прӧщай, зэв кӧ колӧ... (Нимкодьпырысь.) Катшыс, Катшыс, сьта! Катшыс, Катшыс!.. Бура корсьысь уръястӧ да дона куа зверъястӧ! (Кылӧ понлӧн леститчан гӧлӧс шы.)

МИТРЕЙ (ывласянь). Смотри тэ менам, больше ничево!.. Тэнад тшассьӧ вылӧ. Ки-рӧ, трасича!.. Сулавлы!.. (Кылӧ сэсся сьывны босьтӧ да пыр ылысмӧ.)


«Последний нынешний денёчек

Гуляю с вами я, друзья...»


КЛАВДИ (видзӧдӧ ӧшиньӧд). Мун да бара кӧть эн и волы... Ӧд мамӧ ещӧ и бӧрдӧ сы вӧсна, синвасӧ чышкалӧ. (Бергӧдчӧ бӧр.) Тыдалӧ, радейтӧ дядьӧс да жаль янсӧдчыныыс. (Шпыньмунӧ.) Быдсяма пӧлӧс олӧмыд жӧ, зонмӧ, овлӧ, шензьыныыд он вермы... Ок, эськӧ, тӧдіс кӧ мамӧ, мый ӧнтай меным дядьӧ шуаліс... Висьтавны эськӧ колӧ да, ог лысьт. (Ышловзьӧ. Видзӧдӧ ӧшиньӧд да чуксалӧ.) Мам, мамӧ! Пыр нин, ылалін тай сэсся пос помад. (Бӧр бергӧдчӧ важ моз.) Кутшӧм бара сійӧ сьӧлӧм тырӧн ас вӧляысь некодысь повтӧг радейтӧмыс-а?.. Тӧдла ог нӧ ме коркӧ сэтшӧмсӧ?.. (Ышловзьӧ. Чеччӧ да заводитӧ пызан вывсӧ чышкыны.)


13-ӧд петкӧдчӧм


СТЕПА (пырӧ). Лымйыс бӧр нин сывны кутӧма. (Мунӧ пачводз дорӧ, шонтысьӧ.) Колӧ эськӧ талун, Клавди, Няртыбӧжӧ турунла ветлыны да. Ӧтчыдтӧ ӧд волан на... Гашкӧ, дзикӧдз сэсся ульдас да турунтӧг колям, сідз нин лун-мӧд кежлӧ кындзи оз тырмы... Тэ ӧмӧй мӧсъястӧ эн сёӧдлы, дівзӧны тай нӧ мыйкӧ? (Чышкалӧ син доръяссӧ чышъян помнас.)

КЛАВДИ. Сетлі эськӧ да. Сідз дівзӧны найӧ. (Видзӧдлӧ мамыс вылӧ.) Колӧкӧ, дядьӧлысь мунӧмсӧ тӧдӧны да тшӧтш гажтӧмчӧны...

СТЕПА. Ӧд, йӧйыс! Кысь нӧ сійӧ мӧсъяс, кывтӧм пемӧсъяс, тӧдасны?

КЛАВДИ. Тӧдасны бара найӧ, мамӧ... Найӧ, ме чайта да, тэнсьыд пос помад ӧнія бӧрдӧмтӧ на кывлісны и. (Нюмъялӧ.)

СТЕПА (шогпырысь шпыньмунӧ). Мый нӧ тэ, нылӧ, нинӧм абусӧ сӧран. Мыйысь нӧ меным бӧрдныыс? Дай бӧрдін эськӧ кӧть корсюрӧ да синваӧй нин оз пет — косьмӧма, бырӧма ставыс...

КЛАВДИ. Аддзылі ӧд ме, синватӧ кыдзи чышкалін... Эмышт на, буракӧ, коланінъясӧ...

СТЕПА. Ланьт, дурмин али мый нӧ тэ?.. Кутшӧм шог нӧ суис менӧ бӧрдмӧныс?

КЛАВДИ (пуксьӧ пызан вылӧ). Дай торъя долыдӧн оз позь шуны, мамӧ, миянлысь олӧмнымӧс ӧні... (Лэччысьӧ пызан вылас, шогпырысь.) Ок эськӧ, тӧдін кӧ тэ, мамӧ, кутшӧма менӧ дядьӧ ӧбидитӧ!.. (Кияссӧ шлапкӧ пызан вылӧ да юрсӧ лэдзӧ кияс вылас.)

СТЕПА (локтӧ Клавди дінӧ да вӧрӧдӧ пельпомӧдыс). Мый нӧ тэ, нылӧ, лоин? Кыдзи нӧ ӧбидитӧ дядьыд? Пыр сійӧ тэ понда тӧждысьӧ, мед кыдзкӧ эн веськав омӧльтор вылӧ. Весиг меным нимкодь, оз кедзовт дядьыд тэнӧ да. Мый нӧ тэныд ещӧ колӧ?.. Дугды, эн ышнясь весьшӧрӧ... Дядьыд ӧд тэнӧ радейтӧ, йӧюкӧй.

КЛАВДИ (юрсӧ лэптыштӧ). Вывті радейтӧ, мамӧ, ме весиг пыр сыысь пола... Тэнӧ нӧ эськӧ радейтӧ оз?..

СТЕПА. Мыйкӧ ӧд кутін жӧ, нылӧ, нинӧм абусӧ больгыны! (Ышловзьӧ.)

КЛАВДИ. А тэ, буракӧ, радейтан жӧ сійӧс. Эн кӧ радейт ӧд, эн эськӧ бӧрд...

СТЕПА (сьӧлыштӧ). Тьфу, прӧсти господи!.. Грекӧ вӧйтысь!.. Мый нӧ тэ талун лоӧмыд?.. Бӧрді кӧ, эг дядьыд вӧсна. (Бӧр мунӧ пачводз дорӧ.)

КЛАВДИ (пуксьӧ веськыда, видзӧдӧ мамыслань). Сідз тай со нинӧм думышттӧг кыдзкӧ пансис сёрниыс... Код вӧсна нӧ эськӧ бӧрдін, мамӧ, эн кӧ дядьӧ понда?

СТЕПА. Эн юась, Клавди, абу ӧд тадзтӧ шань. (Синъяссӧ чышкалӧ.) Ачым ог тӧд... Батьыд дум вылӧ уси да сійӧн. Кымыныськӧ ме сійӧс тадзи колльӧдлывлі вӧравныыд, шонъянӧс. А ӧні Митрей дядьыд сы вылын сералӧ...

КЛАВДИ. Кывлі, шуис тай ӧнтайнад. Абу жӧ сылӧн яндзимыс, мамӧ! Мыйла нӧ эськӧ сы саяс мунін? Он ӧмӧй вӧлі тӧд сійӧс.

СТЕПА. Ок, зарниӧй, тӧді кӧ эськӧ, эг жӧ мун да. Ӧні быть сэсся кыдзкӧ ов.

КЛАВДИ. Ӧні пӧ тай эськӧ, мамӧ, позьӧ бӧр торйӧдчыны да.

СТЕПА (шеныштӧ кинас). Чӧв, нылӧ, сы йылысь эн сёрнит. Виас сэки менӧ, ӧні пыр грӧзитчӧ-а: коркӧ пӧ ме тэнӧ лыя ли джагӧда, шуӧ... (Друг.) Но, ылалім тай дзикӧдз лёк сёрнинад... (Кыкнанныс лӧсьӧдчӧны.) Вай, Клавди, петав да доддьышт Каркотӧ, ветлам Нярты бӧжад. Юктыштны эськӧ колі первой Каркотӧ да. Ме сы кості сёйны корсьышта. (Пырӧ гӧбӧчӧ.)

КЛАВДИ (пасьтасьӧ). Ыджыдтор жӧ, тыдалӧ, сійӧ радейтӧмыд. А мустӧмыдкӧд олӧмсьыд — лёкысь кындзи, нинӧм жӧ нин, буракӧ, оз тӧр сэсся. Мамӧлы весиг сьӧлӧмӧдзыс мӧрччӧма, бӧрдмӧн... Муртса-муртса эг висьтав ставсӧ... Дядьӧ эськӧ рад торйӧдчас, да меным сэки пӧгибыс лоас... Кыкнан ногыс зэв омӧль: тадзи мамӧлы лёк овныыс, мӧд ногыс — ачым ме верма вошны... Аттӧ, олӧм! Кыдзи овныыс кутам? (Петӧ.)


14-ӧд петкӧдчӧм


СТЕПА (недыр мысти гӧбӧчысь петӧ, ӧтар киас нянь куд, мӧдас паренча туис. Ставсӧ вайӧ пызан вылӧ. Первой гӧгӧр видзӧдлӧ, сэсся пызансӧ корсигмозыс сёрнитӧ ӧтнас). Кыськӧ тай лоӧма йӧйыд — став сьӧлӧмӧс дойдаліс. Кысь нӧ аддзылан сэтшӧм обычайсӧ, ыштӧ ныв юасьӧ аслас рӧдимӧй мамыслысь, кыдзи сійӧ мужикыскӧд олӧ?.. Тайӧ ӧд сё чудеса дивӧ нин! Да ӧд и ачым эг куж кутчысьныыд, быд трасичасӧ ещӧ Клавдилы больгысис менам... Но мед, абу нин ӧд дзоля.


15-ӧд петкӧдчӧм


ЗАКАР (пырӧ, сьӧд дукӧса, кушака, кучик сапӧга, бобрӧвӧй шапкаа, чуня кепыся, ачыс чатрӧс юра, паськыд тоша, сьӧдов морт. Степа повзьӧ нисьӧ яндысьӧ. Закар шапкасӧ пӧрччӧ да первой юрбитыштӧ, сэсся здоровайтчӧ Степакӧд киасьӧмӧн). Чолӧм-здорово, Степанида Петровна!

СТЕПА (яндысигтырйи). Лок, Закар, шойччы да шонтысь.

ЗАКАР (пуксьӧ коник лабичӧ). Шонтысьны эськӧ оз на ков, Степанида Петровна: лымъявліс да бӧр нин ульдӧма. (Сапӧгъяснас джоджас тапкыштӧ.) Аддзылі, Митрейыд Кирӧкӧд вӧравны кайисны да пырысь-пыр и мӧдӧдчи сэсся тэ ордӧ, Степанида Петровна. Сідзсӧ эськӧ ме тіянӧ тшӧкыда волывла, да ас кежын тэкӧд колӧ сёрнитны... Ті нӧ кытчӧкӧ мӧдӧдчанныд, тыдалӧ, Клавдиыд тай вӧв юктавны шорӧ лэччис-а?

СТЕПА. Нярты бӧжӧ кӧсъям турунла ветлыны, дзикӧдз нин орим да. (Вайӧ тасьті да чӧвтӧ паренча.) Мӧсъясным сулалӧны да паренча вылын лоӧ овны. Кутшӧм тай эськӧ кузь вӧлі таво ар помыс да эз и кайлы Митрей кыйсьыныыс. Таво эгӧ и видлӧ ми пӧтка яй кӧртӧ... Вӧравныыс на ӧдва кыдзкӧ вӧрзьӧдчис-а. Зэв ӧд дыш.

ЗАКАР (аслыс). Час, тыдалӧ, артмас. (Степалы.) Дышлуннад, дерт, олӧмыд оз нӧгыльмы. Не тэ кӧ эськӧ, Степанида Петровна, важӧн нин Ӧсип Митрейыд овмӧстӧ тіянлысь пустӧшитіс да. Тэ кодь зіль аньыс сэсся, гашкӧ, миян сиктас абу. Дай Клавдиыд тэнад, чурки-буди, уджаслив. Ме тай сійӧ и шуа: тэ, мися, Степанида Петровна, эн артмы Митрейтӧ пыртӧмнад.

СТЕПА. Эг нин тай артмы, Закар, да мый сэсся керан. (Пуксьӧ пызан помӧ, коник лабичас жӧ да мӧвпалӧ мыйкӧ.)

ЗАКАР (аслыс). Менам кабыр улӧ мыйӧн овмӧсыд сюрас — артмӧда, небось. (Вешйыштӧ Степалань.) Эн тай со ме сайӧ окотит мунныыд, майбыр. (Вашмунӧ.) Том мужик вылӧ вежыд петіс тэнад. Менам нӧ, Степанида Петровна, овмӧсӧй омӧль али мый? Быдтор судзсьӧ, гӧгӧр, слабог, тыр... Ӧтитор сӧмын оз тырмы — кӧзяйка абу. Нёльӧд во дӧвечала да тӧда нин, кутшӧм сытӧг лёк овныыд. Челядь абу, ола казаккӧд, — дерт, быдлаӧ оз судзсьы аслам синмӧй. (Шлапкӧ кинас Степалы пельпомас.) Кылан, Степанида Петровна, позьӧ на тай ставсӧ бура ладмӧдны.

СТЕПА (черӧбтӧ). Ӧні нинӧм нин оз артмы. Вай, Закар, эновтам та йылысь сёрнисӧ, мый сійӧ весьшӧрӧ быргыныыс. Клавди сэсся регыд пырас и. (Чеччӧ да нянь шӧралӧ.)

ЗАКАР (юрнас гогнитӧ). Абу весьшӧрӧ быргӧм, Степанида. Позьӧ на быдтор вӧчны. Кӧть эськӧ, шуам, ӧнія властьясыд ёна менӧ топӧдӧны, кулак туйӧ лыддьӧны, да коланінад тай со буртортӧ сетӧны на и меным, дай тэныд тшӧтш, Степанида, окотитан кӧ... Вай пуксьыштлы, Степа, да сёрнитыштам Клавди локтӧдзыд. (Сойӧдыс кыскыштӧ Степаӧс асланьыс.)

СТЕПА (петитчӧмӧн). Дугды, Закар: абу лӧсьыд. Сідз нӧ висьтав вай. (Ӧдйӧ котӧртлӧ да видзӧдлӧ ӧшиньӧд, сэсся ӧшинь дорас и пуксьӧ.) Висьтав, оз на тай некод лок-а...

ЗАКАР (локтӧ Степа дінӧ). Часлы, татшӧмтор йылысь, Степанида, оз позь ылісянь сёрнитны — он ставсӧ гӧгӧрво. (Пуксьӧ орччӧн.)

СТЕПА (вешйыштӧ бокӧ). Лишнӧйсӧ, Закар, эн ёна сёрнит. Висьтав нин вай, мый кӧсъян, Клавди ӧд регыд локтас.

ЗАКАР (тошсӧ малыштӧ). Со мый, Степа: кодкӧлуннад тай панлі ме сёрнитӧ, Митрейыдкӧд торйӧдчӧм йывсьыд, тӧрыт затрення-ӧбӧдня костын пыралі исполкомӧ да ставсӧ лючки тӧдмалі. Председательыс эськӧ зэв букышӧн ме вылӧ видзӧдліс, да секретарыс зэв шань, — Мокей Варламыд ӧд меным сват лоӧ. Сійӧ сэсся и висьталіс ставсӧ рӧзвода делӧ кузяыд... Вӧлӧмкӧ, позьӧ рӧзводитчыныыд ӧні, кор окота — во всякое время пӧ, шуӧ, мужиклы кӧть бабалы — равноправие пӧ...

СТЕПА (торкӧ). Чӧв, Закар, эн сёрнит! Ме весиг сы йылысь думыштны ог лысьт — виас менӧ Митрей сэки, ӧні нин пыр грӧзитчӧ-а. (Юрсӧ ӧшӧдӧ.)

ЗАКАР (матыстчӧ Степалань). Виас? Ланьт, Степанида, кысь нӧ виас? Прӧстӧ повзьӧдлӧ — нинӧм оз вӧч. (Шлапкӧдӧ Степаӧс.) Эн пов сыысь!

СТЕПА. Буртӧ сысянь эн виччысь, Закар. (Небзьыштӧ.) Сэсся нӧ, торйӧдча кӧ, став овмӧсыс миян сылы кольӧ? Клавди нӧ сэки кыдзи кутас овны?.. Ог вермы сідзи эновтны ставсӧ, Закар.

ЗАКАР. Да тэ кывзы первой, Степанида. Мыйла нӧ шалопайыслы тэ овмӧстӧ колян? Мокей Варламыд меным висьталіс: торйӧдчигӧн пӧ шӧри юксьӧ сӧмын кутшӧм овмӧс да эмбур гозъя лӧсьӧдлісны ӧтвылысь оліганыс. А мый нӧ лӧсьӧдліс Ӧсип Митрейыд тэ ордын олігас? Ме ӧд тӧда тіянлысь олӧмнытӧ: сійӧ дзик кушӧн локтіс татчӧ. Кушӧн кӧ пырис — кушӧн и бӧр петас. Овмӧсыд Клавдиыдлы ставнас кольӧ. Ныв, чурки-буди, мича, шань да зіль, сылы бур жӧникӧс корсям да овмӧдчасны дась бур вылад зэв лӧсьыда, некутшӧм тужа-нужа оз тӧдлыны. (Аслыс.) Кык овмӧс вылад сэки чорыда эськӧ паськӧдча! (Шлапкӧ Степалы мышкас.) Сідз абу, Степуш?.. А тэа-меалы менам овмӧсын сідз жӧ оз лолы горе ни печаль. Мый думайтан? (Степаӧс киӧдыс кутӧ.)

СТЕПА (ышловзьӧ). Ставыс тайӧ, Закар, инасьлывтӧм сёрни.

ЗАКАР. Мыйла? Ставыс тайӧ, Степук, ас саяд. Тэ кӧ окотитан мекӧд овны — ставыс бура артмас. Дерт, мырдӧн ме тэнӧ ог кыскы — аслад окота, и зэв эськӧ тэ бур кӧзяйка меным вӧлін, збыль шуа, Степуш.

СТЕПА. Нинӧм оз ло, Закар, ог лысьт торйӧдчыныыс — пола...

ЗАКАР. Но, мокльӧньӧ, робота! Мыйысь нӧ повныыс ӧнія дырйи? (Чеччӧ да ветлӧ джоджӧдыс.) Прӧстӧ ӧд дзик, Степанида, ышнясян.

СТЕПА (сувтӧ да пызансӧ лӧсьӧдыштӧ). Митрей сайӧ мунӧмӧн эськӧ тай эг нин ме артмы дай тэ сайӧ мунныыс пола.

ЗАКАР (друг сувтӧ). Мыйысь?

СТЕПА (сьӧлӧмсяньысджык). Сідзи... Тэнад ӧд сямыд абу жӧ ошкана, Закар. Тӧдлім ӧд, кутшӧма тэ воддза гӧтыртӧ, покончаӧс, видзлін. Код тӧдас, збыль абу, а мыйкӧ тай йӧзыс вӧлі больӧдчӧны: Парасьыд пӧ тэнад нӧйтӧм помысь и кувсис.

ЗАКАР (аслыс). Быдторсӧ ӧд тӧдӧны, трасичаяс! Кодлыкӧ мог сэтчӧдз? (Нарошнӧ сералігтырйи, юрсӧ чатӧртӧмӧн.) Ке-ке-ке! Лӧж! Эн верит, Степанида, сы вылӧ!.. Ми Парась-покончакӧд зэв бура овлім... Корсюрӧ, дерт, ичӧтикатӧ и... Быдсямаыс ӧд овлӧ гозъя костад... А тэнӧ, Степуш, чуньӧн весиг некор ог вӧрзьӧд... Гашкӧ нӧ, радейтӧмыс месянь и оз ло тэныд тырмымӧн, а кӧзяйка туйын тэнӧ — ок, бура видза! Нэмтӧ красуйтчан ме дінын!.. (Босьтӧ кыкнан киӧдыс Степаӧс.) Но, вай, Степук, шу кодарӧкӧ?


16-ӧд петкӧдчӧм


КЛАВДИ (ӧдйӧ пырӧ, ӧдзӧссӧ восьтігӧн на и шуӧ). Доддялі, мамӧ, вӧвтӧ. (Аддзӧ Закарлысь да Степалысь сулалӧмнысӧ да друг ланьтӧ, бокӧ бергӧдчӧ. Закар лэдзчысьӧ Степаысь да шапкаасьӧ. Степа пызан вылӧ мыйсюрӧ лӧсьӧдӧ. Клавди мунӧ кӧтшасӧ да пӧрччысьӧ.)

ЗАКАР (петігмозыс). Но, прӧщайтлӧй нӧ, сідзкӧ! (Петӧ.)


17-ӧд петкӧдчӧм


СТЕПА (Клавди вылӧ видзӧдлытӧг). Доддялін нин?.. Лок вай сёйыштам паренчаторсӧ да ветлам. (Юрбитыштӧ да пуксьӧ пызан сайӧ.)


Кӧнкӧ ывлаын кылыштӧ гудӧк шы.


КЛАВДИ (юрбитӧмӧн жӧ пуксьӧ лабичӧ, ен ув пельӧс ӧшинь дорӧ). Мам, тӧдан, мый ме кӧсъя тэныд шуны?.. Ми быттьӧ дзебсясям тэкӧд, а пыр жӧ мӧда-мӧднымӧс аддзам...


Гудӧк шы кылӧ гораджыка.


СТЕПА (оз кывзы Клавдилысь). Кодлӧнкӧ тай уджыс эштӧма, петӧма да весьлунӧ гудӧкасьӧ.

КЛАВДИ (видзӧдӧ ӧшиньӧд). Артип тай «рекруталӧ»: аски сортовка лэдзны батьыскӧд кайӧны, рӧштвоӧдз пӧ огӧ локтӧ, шуис, весиг пӧ видзӧ пыригкежлӧ огӧ волӧ.


Гудӧк шы вочасӧн лӧньӧ — ылысмӧ да бырӧ.


СТЕПА. Панясь вай зільджыка — вӧрзьӧдчытӧдзным пемдас, он и тӧдлы.

КЛАВДИ. Меным и сёйныыс ӧні оз ков... Тэ ӧнтай, мамӧ, менӧ дивитін, Артипыдкӧд суин да, а ачыд тай нӧ эськӧ меысь на омӧльтор вӧчан? (Шпыньмунӧ.) Аддзылі ӧд, кыдзи вӧлі кутчысьӧмныд ки на ки Макар Закарыдкӧд...

СТЕПА (дӧзмӧмпырысь). Эн больгы нинӧм абусӧ, йӧй... Пыраліс сутш кежлӧ — гӧститны корӧ видзӧ пыран лунӧ... Ме эг понды кӧсйысьны да кутіс киясӧд... Быдтор тай тэ аддзан! (Панясьӧ зіля.)

КЛАВДИ. Видзӧ пырӧмӧдзыс ӧд, мамӧ, кык вежон на, буракӧ?.. Вывті тай водз корӧ?.. Ок, тӧдас кӧ эськӧ дядьӧыд та йылысь! (Няньтор чегӧ да сёйӧ.)

СТЕПА. Кыськӧ тай эм йӧй нылыд!.. Сёй, эн бызгы вывтісӧ.

КЛАВДИ (нюмъялӧм сорӧн). Эн пов, мамӧ, ог ӧд висьтав нинӧм... А сы пыдди менӧ лэдзлыв корсюрӧ ичӧтика гуляйтыштны да войпукны. Он ӧд кут?

СТЕПА. Ме вӧсна, бара, ветлы, окота кӧ, медтыкӧ дядьыдлы эз кывсьы-а... (Чеччӧ да юрбитӧ.) Но, вай мӧдӧдчам сэсся.

КЛАВДИ (чеччӧ жӧ). Мунам. (Кыкнанныс пасьтасьӧны.) Сійӧ нин кӧть, мамӧ, олӧмнымӧс миянлысь ичӧтика краситыштӧ, ӧтсӧгласӧн ми тэкӧд эня-ныла олам да.


Занавес.


МӦД ВӦЧӦМ.


Медводдза тор


Вӧчсьӧ Ӧсип Митрей ордын жӧ (кӧні муніс медводдза вӧчӧмыс). Стенас, пищальыскӧд орччӧн, тувйын ӧшалӧны порошнича да патронташ. Тӧвся праздник рыт. Ломтысьӧ ичӧтик ӧшалан лампа. Ӧшинь пыр вачкӧ тӧлысь югӧр. Пызан вылас: нянь куд, сёян-юан, тыртӧм сулеяяс да ӧти чашка. Лабичас тэчӧма паськӧмъяс.


1-я петкӧдчӧм


Пызан сайын пукалӧны: Митрей (помас, коник лабичас, йӧзыслы веськыда), Кирӧ, Катя, Закар да Ӧсип (кузьмӧс лабичас): ставныс вӧччӧмаӧсь, Ӧсип сӧмын сера дӧра дӧрӧма, сукманида гача да тюниа (пышына гын сапӧг юр); ставныс бура кодӧсь нин, сёрнитіганыс гӧлӧсъяс ыджыдӧсь, торъя нин Митрейлӧн. Улӧс вылын, пызан дорас жӧ, жугыля пукалӧ Клавди. Занавес воссигӧн гӧстьяс сьылӧны — кыдзсюрӧ, «нескладнӧя» лӧвтігмоз, — юрнаныс кодсюрӧ катлӧдлӧны ӧтарӧ-мӧдарӧ, Митрей весиг кияснас тшӧтш шенасьӧ.


«...зовущӧй,

С рассветом глас раздался мой

На славу йи на смерт зовущӧй... » } 2-ысь


КИРӦ. А ме сэсся, другъяс, ог тӧд водзӧсӧ... Асьныд нин босьталӧй!

МИТРЕЙ. Шань сідзкӧ тайӧс. Вайӧ мӧдтор сьыламӧй, больше ничево!

ЗАКАР. Митрей Ӧсипович, тэ, другӧ, первой горшъяснымӧс вай мавтышт, дзикӧдз ӧд дзуртны кутісны гӧлӧсъясным.


Юрнас гогнитӧ сулеяяс вылӧ.


КИРӦ (серӧктӧ). Вернӧ, Закар Макарӧвич! Колӧ восьтыштны.

МИТРЕЙ (босьтӧ куш сулея). Абу да? Ставыс, со, тыртӧм. Час, Степа ваяс да... Кӧні сійӧ, сё трасича, та дырасӧ ветлӧ? Муніс дай вошис дзикӧдз. (Быд сулеяысь ичӧтикаӧн рудзӧдӧ ӧти чашкаӧ.) Часлы, кымынкӧ войт кольӧма на. (Сетӧ чашкасӧ Закарлы.) На, Закар, курав, больше ничево!

ЗАКАР (оз босьт, бӧрыньтӧ чашкасӧ). Ачыд нин тэ, Митрей Ӧсипович, пу!.. Ачыд пу.

МИТРЕЙ (чашкасӧ кутӧ). Ме, час, баба вотӧдз ог нин. (Чургӧдӧ чашкасӧ Ӧсиплы.) Со кодлы сета. На, батьӧ, тэ помав тайӧс!

ӦСИП (босьтӧ чашкасӧ). Пасибӧ, Митрей, пасибӧ, бур пи! Ме коддзытӧдз нин эськӧ гӧститі да.

МИТРЕЙ (пызанас шлапкӧ кинас). Ю, батьӧ, дай больше ничево! Ме бать мортӧс ог вунӧд! (Ӧсип юӧ да сёйӧ.)

ЗАКАР. Оз ков, оз ков вунӧдны, Митрей Ӧсипович. Бать сійӧ — отеч... «Шти отса твойево» пӧ, шуӧма заповедяд... Сідз ӧд, Ӧсип?

ӦСИП. Сідз эськӧ, Закар, важӧн вӧвлӧма да, ог тӧд, ӧні кыдзи. (Сёйӧ.)

ЗАКАР. Ӧні на сідзи и.

КИРӦ. Абу дзик сідзи ӧні, Закар Макарӧвич. Менам кӧ батьӧ, шуам, надурнӧ вылӧ велӧдӧ, кыдзи нӧ сэки «шти отса» ме верма шуны? Ог вермы дай ог и шу некор «шти твойево»... Сідз абу, Митрей?

МИТРЕЙ (шеныштӧ кинас). Кыдз окота, Кирӧ, сідзи и шу, больше ничево! (Клавдилы.) Сідз абу, Клавдюк? Тэ жӧ кӧ тӧдан-а, тэнад тшассьӧ кузя ӧд талун ми гажӧдчам.


Клавди юрсӧ лэптыштӧ да видзӧдлӧ Митрейлань.


ЗАКАР (водзмӧстчӧмӧн). Ещӧ на сэтчӧ содтыны колӧ «и матер твою»...

МИТРЕЙ (скӧрысь Закарлы). Оз кӧ тэнӧ юавны, мый сэтчӧ суитчан? «Матер твою»... Ок, тэ! Тӧда ӧд ме, кытчӧ вишкан тэ татшӧм кывъяснад.

ЗАКАР (повзьыштӧ). Мый нӧ тэ, Митрей Ӧсипович? Ме нинӧм. Ме заповедьысь висьтала.

МИТРЕЙ. Тӧда ме тэнсьыд заповедьтӧ! (Швачкӧ пызанас кулакӧн.) Менам Степа вылӧ тэнад вежыд петӧ!


Клавди чеччӧ да мунӧ пачводз дорӧ.


ЗАКАР. Весь шуан, Митрей Ӧсипович. Ме весиг...

МИТРЕЙ (кватитӧ сулея да пыдӧснас кучкӧ пызанӧ). Эн ылӧдлы, ачым ме аддза! Степа вылӧ тэ ыштан, Клавдюк мам вылӧ, сійӧн и «матерыд» тэнад дум вылад усис... Видзчысь, Закар! Казяла кӧ, сэтшӧм «шти отса» ме петкӧдла кыкнанныдлы! (Камӧдӧ пызанас сулеяӧн.) Пасьварта дзикӧдз, больше ничево! (Ырыштчӧ сулеянас, Кирӧ да Ӧсип кутӧны.) У!

ӦСИП. Лӧньышт, пиӧ, лӧньышт, Митрей! (Митрей пуксьӧ.) Закарыд ӧд прӧста сідз шуис.

ЗАКАР. Шусис дзик нинӧм думайттӧг, заповедяс сідзи гижӧма да: «шти отса твоего и матер твою». Сідз ӧд, Кирӧ?.. (Кирӧ шеныштӧ сӧмын кинас.)

МИТРЕЙ (рамджыка). Тырмас нин сэсся «матерасьныд»! Клавдюк, лок пуксьы татчӧ да сьылыштам, больше ничево! (Ачыс сэсся пырысь-пыр и босьтӧ, Клавди локтӧ, пуксьӧ важ местаас. Митрей бӧрся сьылӧны ставныс):


Эк, последней нонешней денёчик

Гуляю с вами я, друзья.

А завтра рано чуть сьветочик,

Заплачӧт ся моя семья...

Заплачӧт браття мойи сёстры,

Заплачӧт мать и мой отеч...

Ещӧ заплачӧт дорогая,

С которой три года я жил...


2-ӧд петкӧдчӧм


СТЕПА (пырӧ, пась пӧла увсьыс кыскӧ парта самӧкур — гӧрдов нисьӧ вижов рӧма, чайлань этша мунӧ, пробка пыддиыс сулеясӧ тупкӧма дӧраӧн. Пуктӧ сулеясӧ пызан вылас. Сэки ставныслы этша нимкодьджык лоӧ). Ӧдва и сюрис. (Мунӧ да пӧрччысьӧ.)

МИТРЕЙ (босьтӧ сулеясӧ киас). Ме чайті, тэ он нин волы талун. Эсы дыра ветлін. Мый нӧ, ӧти парта ӧмӧй толькӧ вайин?

СТЕПА. Став сиктсӧ кытшовті, Митрей, да муртса нин и сійӧ сюрис, Кузь Парась сетіс.

МИТРЕЙ. Но, трасича, олӧм лои! Дзонь сикт кузя кытшовтан да кык парта самӧкур нин эз кут шедны? (Восьтӧ сулеясӧ.) Мыйкӧ тай талӧн сьветыс зэв нин мисьтӧм. Дзик куйӧд ва кодь, больше ничево!..

ЗАКАР. Сьветыд сійӧ нинӧм, Митрей Ӧсипович, медтыкӧ скусыс вӧлі-а.

МИТРЕЙ. Тэ, Закар, бара нин зыртчан? Сьветыд кӧ мича — и скусыс сылӧн бур. Степа, лок миян дінӧ пуксьы! (Кисьтӧ чашкаӧ.)

СТЕПА (локтӧ, пуксьӧ Митрейкӧд орччӧн). Ог тӧд — кутшӧм. Парасьыс оз и сет вӧлі ещӧ — кокӧй пӧ юкалӧ да аслым пӧ зырасьны коли, шуӧ. Рематизм пӧ тай.

МИТРЕЙ. Код тӧдас: гашкӧ, тайӧ кок пожъялӧм ваыс нин да? (Ставныс серӧктӧны.)

КАТЯ (сералігмоз, ставныслы). Тіянлы ӧд веськодь, медтыкӧ вина кӧрыс вӧлі-а. Кӧть бара Парасьыд лядьвейсӧ мыськаліс, ті ӧні юанныд нин. (Сералӧ, кодсюрӧ тшӧтш ваксьӧны.) Ещӧ чӧскыдджыкпырысь чурсканныд.

КИРӦ. Тэ, баба, эн вывті бызгы.

КАТЯ. Мый нӧ, онӧ? Сё надейнӧ бара, юанныд.

МИТРЕЙ. Эн шу сідз, Катя! Кыдз нӧ сэтшӧм пежсӧ юан? Тьпу! (Сьӧлыштӧ.)

КИРӦ. Тьпу! (Сьӧлыштӧ.) Трасича баба, кутшӧма сьӧлӧмӧс гудыртін! Восӧдас ещӧ, сё трустыд!.. Тьпу!

МИТРЕЙ. Да ещӧ лёк Кузь Парасьлысь!.. Тьпу, лешпечик! (Сьӧласьӧ.)

СТЕПА. Мый нӧ сэтчӧ нинӧм абусьыс сьӧласьны пондінныд? (Босьтӧ чашка да исыштӧ.) Зэв ещӧ дукыс со и чӧскыд.

МИТРЕЙ. Мый сійӧ нырнад исалан? Вомад вай босьтлы да вӧлисти висьтав, больше ничево! Нолтӧ, видлы!

СТЕПА (ичӧтика юыштӧ. Сы вылӧ ставныс дзоргӧны). Ак! Ук, кутшӧм ён!..

МИТРЕЙ (ставныслы). Сідзкӧ, юам. Юам ӧд?

Унаӧн. Юам!

МИТРЕЙ (босьтӧ киас чашкасӧ да чургӧдӧ Ӧсиплы). Ӧнтай тэ, батьӧ, пуин — тэныд и заводитны. Босьт, батьӧ! (Ӧсип босьтӧ.)

ЗАКАР. Вернӧ, Митрей Ӧсипович! «Шти отса твоево и»...

МИТРЕЙ (друг судзӧдчӧ пызан вомӧныс да тупкӧ Закарлысь вомсӧ). Шань! Эн нин лысьт сэсся шуны «матер твоютӧ»!

СТЕПА (повзьӧ). Мый нӧ, Митрей, тэ лоин? Мыйысь нӧ материтан Закарсӧ?

МИТРЕЙ (Степалы скӧрысь). Тэ ланьт, эн шыась! (Ӧсиплы.) Вай, бать, ю, больше ничево! (Пуксьӧ.)

ӦСИП. Но, будь здоров нӧ! (Юӧ надзӧник.)

КАТЯ (Степалы). Муртса нин тэнад вотӧдз, Степа, эз тышкасьны тані, Закар материтіс Митрейтӧ да.

ЗАКАР. Тэ тай, Катя, он жӧ вӧлӧм тӧд заповедьтӧ.

МИТРЕЙ. Тырмас нин сэсся заповедь йывсьыд ызгыны! (Ӧсиплысь босьтӧ чашкасӧ да кисьтӧ самӧкур.) Кутшӧмджык нӧ винаыс, бать?

ӦСИП. Нинӧм, позьӧ юны, котшсасьыштӧма тай ичӧтика-а... (Сёйӧ.)

МИТРЕЙ (мыччӧ Клавдилы чашкасӧ). Тэ тай нӧ, Клавдюк, мыйкӧ зэв жугыля пукалан талун? На, юышт, гажаджык лоӧ.

КЛАВДИ. Ме ог ю, дядьӧ. Ӧнтай нин эг ю мичаджык винасӧ-а... ог, эн тшӧкты, дядьӧ. (Юрсӧ бергӧдӧ мӧдарлань.)

МИТРЕЙ. Да ӧд ӧти чашка джынтӧ юан жӧ, Клавдюк? Тэнад тшассьӧ кузя ӧд и став гажыс талун. Ме тай шулі тэныд вӧравны мунігӧн: мися, тэ кӧ шуда, бур и прӧмыс лоас. А, чурки-буди, тэ шуда на вӧлӧмыд, Клавдюк! Ме мында прӧмыссӧ, гашкӧ, и батьыд эз вайлыв. Но, вай, Клавдюк, аслад тшассьӧ кузя кӧть видлышт...

КЛАВДИ. Ог, мися, дядьӧ, ю, збыльысь, эн тшӧкты. Юктав гӧстьястӧ.

СТЕПА (Митрейлы). Мыйла нӧ, Митрей, мырдӧнсӧ тшӧктан?

МИТРЕЙ (Степалы). Тэ, баба, ланьт, эн шыась! Мыйла колӧ, сійӧн и тшӧкта... Дай ог и тшӧкты, а просита. Клавдюк! Киӧс эн мудзты менсьым — юышт! Но, мыйта верман, кӧть муртса вом дортӧ инмӧдышт, больше ничево!

СТЕПА (Клавдилы). Мый нӧ сэсся эськӧ и ышнясян тэ — видлы, он ӧд кув...

КАТЯ. Юышт, Клавди, сэтшӧма Митрей дядьыд корӧ да...

КЛАВДИ (чукыртчӧмӧн босьтӧ чашкасӧ да муртса вом дорсӧ кӧтӧдыштӧ). Аттӧ жӧ!.. Фу, кутшӧм чӧскыдтӧм! (Сьӧлыштӧ да вом доръяссӧ чышкӧ нагруникӧн.)

МИТРЕЙ. Винаыс жаль, эськӧ питшӧгад тэныд, Клавдюк, и кисьті ставсӧ да. Но, час нӧ, тэ бӧрын сэсся ме юышта. (Юӧ да вомсӧ тяпкӧдӧ.) Ак, чӧскыд тай вӧлӧма! Котшсасьыштӧма кӧть, а ён. (Кисьтӧ выльысь чашкаас да сетӧ Кирӧлы.) Нолтӧ, Кирӧ друг, вай босьт! Тэкӧд прӧмышляйтӧм таво удайтчис бура, ю!

КИРӦ (юӧ да чукрасьӧ). Тьпу, абу жӧ зэв чӧскыд, кӧть тэ мый шу. Ённас эськӧ тай ён да кӧрыс кутшӧмкӧ лёк, дука. Тьпу!.. (Сьӧласьӧ.)

МИТРЕЙ (бара кисьтӧ). А кутшӧм эм — эн дивит сэсся... Час, прӧмысӧс карӧ лэччӧда да вая сэтысь прамӧй русскӧй горкӧйтӧ... Ведра джын босьта, больше ничево! Сійӧ, колӧкӧ, и чӧскыд та дінын. (Чашкасӧ сетӧ Катялы.) Босьт вай, Катя.

КАТЯ (босьтӧ). А, господьӧ! Коддзам да гортӧ сэсся огӧ вермӧ мунны.

КИРӦ (Катялы). Юан кӧ — ю, он кӧ ю — эн ю. Гортӧ кӧ он вермы мунны — юрсиӧдыд кыска.

КАТЯ. Сідзкӧ, нарошнӧ юа! (Зэв ӧдйӧ дзибыртӧ чашкасӧ.) Со! (Сетӧ чашкасӧ Митрейлы.)

ЗАКАР. Молодеч, Катя!

МИТРЕЙ (выльысь кисьтігтырйи сьылӧ). «Чижик, чижик, де ты был? На каменке водку пил»... (Мыччӧ чашкасӧ Закарлы.)

КАТЯ (катликасьӧмӧн сьылӧ водзӧ): «Выпил румки, выпил две»...

МИТРЕЙ (кокъяснас джоджӧ тапкӧдӧмӧн. Тшӧтш Катякӧд). «Зашумело гӧлӧва».

ЗАКАР (чургӧдӧ ассьыс чашкасӧ Степалы, висьталӧ ставныслы моз). Час, мед первойсӧ кӧзяйкаыс видлас. Митрей Ӧсипович тай быттьӧ ордйӧдіс Степанида Петровнаӧс-а...

КАТЯ. Збыльысь ӧд, Степаыдлы эн и сет, Митрей?.. (Степалы.) Ю, Степа!

СТЕПА (босьтӧ чашкасӧ). Шогӧдас эськӧ да... Ичӧтика, буди. (Кӧсйӧ юны.)

МИТРЕЙ (скӧрысь кватитӧ чашкасӧ). Коді тані кӧзяиныс: ме али тэ, Закар? (Чашканас ырыштчӧ, винаыс солькнитчӧ бӧрвылас стенӧ.) Но, висьтав!..

ЗАКАР (ляскӧдчыштӧ, боквыв вежыньтчӧ). Ме... ме... ме... нинӧм ог шу, Митрей Ӧсипович. Час... энлы... Ме бур кузя... тэ энлы...

МИТРЕЙ (лёкысь). Ныр гӧчад вот чашканас брунга дай, больше ничево! Мыйла тэ кавшасян менам баба вылӧ? А? (Камгӧ чашкасӧ пызанас, чашка жугалӧ.)


КАТЯ, Степа (Ӧлӧдӧны Митрейӧс тшӧтш.) Но, мый нӧ тэ? Дугды, эн дур, Митрей…


Ывлаын кылӧ гудӧк шы. Клавди черӧбтӧкодь.


МИТРЕЙ (Степалы скӧрысь). Разобью кыкнаннытӧ!.. Помнитлы тэ, баба! Юртӧ орӧда, стерволысь! Тэныд друг видзны ковмӧма? М-мы!.. Клавдюк! Аддзан, мый вӧчӧ мамыд?

ЗАКАР. Прӧста дзик, Митрей Ӧсипӧ...

МИТРЕЙ (Закарлы лёкысь). Ланьт!.. (Клавдилы.) Тэ эн пов, Клавдюк!.. Вай выль чашка! (Гудӧк шы гораджыка кылӧ.)

КЛАВДИ (чеччӧ да мунӧ пачводз дорас. Аслыс). Артип, кылӧ, мунӧ нин.

МИТРЕЙ (кылӧ гудӧк шы). О, кодкӧ гудӧка кылӧ!.. Клавдюк, мун чукӧстлы, мед пыралас!


Клавди вайӧ чашка да петӧ ывлаӧ.


3-ӧд петкӧдчӧм


КИРӦ. Вернӧ, Митрей, мед пыралас. Гажаджыка гуляйтам.

МИТРЕЙ (кисьтӧ вина). А вина сылы огӧ нин сетӧ. (Степалы мыччӧ.) На, Степа, ю!

СТЕПА. Оз ков, асьныд...

МИТРЕЙ (наяна). Но-о... Ме кӧ сета — оз ков, Закар кӧ мыччӧ — небось босьтан сылысь. (Друг лёкысь.) Ю! На! Больше ничево! (Мырдӧн сетӧ киас чашкасӧ.) Ставсӧ, кушӧдз ю!

СТЕПА (кутӧ чашкасӧ). Ыджыд жӧ, Митрей, тэнад грӧзыд. Со, батьыд дырйи весиг шуа тэныд — мӧд во олам да ньӧтчыд на ме тэсянь бур кыв эг кывлы.

МИТРЕЙ. Шань! Ю нин вай, ю!.. «Бур кыв»... Он сулав тэ сы доныс!

СТЕПА (ышловзьӧ). Гашкӧ, и ог да. (Юыштӧ этшаник. Чукрасьӧмӧн юрсӧ пыркӧдӧ). Уп-пу! Кутшӧм лёк курыд! Сэсся ог вермы! Уп!

МИТРЕЙ. Ставсӧ помав, кодлы нӧ мыльӧстӧ колян? Кушӧдз ю!

КАТЯ. Ю, Степа, сьӧлӧм вылад долыдджык лоас. Ме тай нӧ со коддзытӧдз жӧ юи.

СТЕПА. Восӧдас ӧд, ӧнтай нин ӧти чашка юи и... Ойя жӧ да! (Юӧ ставсӧ.)

МИТРЕЙ. Важӧн ӧд мед тадз эськӧ вӧчин. (Кисьтӧ сулеясьыс ставсӧ.) Ок, эз нин и тыр весиг. (Сетӧ Закарлы.) На тэныд став курас-карассӧ, да мӧдысь сэсся менам баба вылӧ эн во. Босьт!

ЗАКАР (босьтӧ чашкасӧ). Прӧста вежӧгтан, Митрей Ӧсипович. (Недыр мысти юӧ да закуситӧ.)

МИТРЕЙ. Час, бӧртинас аддзам... Но, кӧні нӧ Клавдюкыс?.. Мый та дырасӧ оз пырт гудӧкасьысьсӧ? (Петӧ пызан сайысь да шатлалігтырйи мунӧ ӧдзӧслань, восьтыштӧ да чукӧстӧ.) Клавдюк! Мый нӧ, кытчӧ тэ вошин сэсся, трасича?.. (Клавдюклӧн гӧлӧс): «Локтам нин, дядьӧ». Лок! Сей минут, больше ничево! (Бӧр мунӧ аслас местаӧ.)

СТЕПА (катлӧдлӧ юрсӧ). Ой, коддза, буракӧ, уп!.. (Идралӧ тыртӧм сулеяяссӧ.)

МИТРЕЙ. Коддзан кӧ, гажаджык... Час, ӧні сэсся сьылам и йӧктам.


4-ӧд петкӧдчӧм


Пырӧ Клавди, сы бӧрся Артип гудӧкӧн. Пыригмозыс Клавди мыйкӧ висьталӧ Артиплы чуньнас грӧзитігтырйи.


АРТИП. Здоровоте тіянлы ставныдлы! Клеб-соль! (Ставныс воча чолӧмасьӧны. Клавди мунӧ пачводз дорӧ, шонтысьӧ.)

МИТРЕЙ. Но, Артип вӧлӧма! Лок, толькӧ тай, другӧ, кокыд тэнад дженьыд — удзӧдім буретш.

АРТИП (пуксьӧ коник лабичӧ). А ми неважӧн на жӧ панясим...

МИТРЕЙ. Панясьӧмыд сійӧ мый. Ми талун прамӧя гажӧдчам... Бур прӧмыс таво ен сетіс миянлы да позьӧ и гуляйтыштны. Сідз ӧд, Кирӧ...

КИРӦ. Вернӧ, Митрей. (Артиплы.) Нолтӧ, Артип, паськӧдлы гудӧктӧ да гораджыка вазӧбтыв!

МИТРЕЙ. Во! А ми йӧктыштам. Ноко, Артип, гажӧдышт миянлысь кумпанньӧсӧ, больше ничево!.. (Ачыс чеччӧ. Кирӧ тшӧтш петӧ пызан сайысь.)

АРТИП. Некор ӧд меным, некор, другъяс. Колӧ мунны катыдӧ — сэні талун комсомолечьяс лӧсьӧдӧны гӧрд войпук да. Виччысьӧны нин, кӧнкӧ, менӧ...

МИТРЕЙ. Но-о, сійӧ олас! «Ком-со-мо-лечь-яс!» Ворс вай миянлы, больше ничево!..

ЗАКАР. Ворсышт, Артип. Ме весиг тэнӧ со просита.

КИРӦ (локтӧ Артип дінӧ да кутчысьӧ гудӧкас). Вай нязӧбтыв камаринскӧйӧс! (Ачыс вомнас гудӧкалӧ да Артип водзын талясьӧ.) Эк, ерӧмакань-кукань!.. Но, вай!

МИТРЕЙ (Артиплы). Мый нӧ тэ ышнясян? (Локтӧ Артип дінӧ.) Колӧкӧ, ещӧ на мӧдӧдлам самӧкурла. Ворс вай, больше ничево!

АРТИП. Самӧкур ӧмӧй юанныд? Оз ӧд позь — кутасны. Збыльысь шуа — ог эшты ворсныыс...

МИТРЕЙ. Мо-ло-ко-сос тэ, Артип, больше ничево!.. Ыдждалӧ ещӧ, трасичаыд.

КИРӦ (кыскӧ гудӧксӧ асланьыс). Вайлы нӧ меным гудӧктӧ, ерӧмакань-кукань! Лэдзлы!

АРТИП. Тэ, Кирӧ, зэв нин гажа да, он вермы ворсныыд. Гудӧксӧ ещӧ жугӧдан.

КИРӦ. Ме? Ме бара ворса на... Вайлы!

МИТРЕЙ. Сетлы нӧ сылы. Оз ӧд сыв гудӧкыд.

СТЕПА (Артиплы). Ачыд ворсышт, Артип. Ме весиг талун коддзи.

КАТЯ. Ворс, йӧктыштам ставным. (Петӧ пызан сайысь шатлалігтырйи.)

АРТИП. Час, инӧ, регыдик ворсышта, мый сэсся тіянкӧд вӧчан.

КИРӦ. Вот, молодеч!.. Ворс камаринскӧй!..

КАТЯ. Кадрель ворс, Артип!

КИРӦ. Первой камаринскӧй ворс!.. Камаринскӧй!..

МИТРЕЙ. «Русскӧй» ворсас мед!..

АРТИП. Ӧтпырйӧ ог вермы ставсӧ... Час, первой камаринскӧйсӧ Кирӧлы ворса. (Ворсӧ. Кирӧ йӧктӧ, кокъясыс гартчӧны. Сэсся сувтӧ йӧктыны тшӧтш Митрей, сы бӧрся Катя.)

КАТЯ (кыскӧ Степаӧс). Лок, Степа, йӧктыштам, трущӧпа!

МИТРЕЙ (Закарлы). Закар! Мый видзӧдан? Сувт тшӧтш!.. Эк, больше ничево! (Закар тшӧтш сувтӧ йӧктыны.)

КАТЯ (мыйкӧ дыра йӧктӧм бӧрын). Вай сэсся кадрель, Артип, ворс. (Кыскӧ Митрейӧс.) Лок мекӧд йӧктам.

МИТРЕЙ. Ме тэкӧд ог. Клавдюккӧд йӧкта. Клавдюк, йӧктам ӧд? Лок сувт! (Мунӧ Клавдилань.)

КЛАВДИ. Ме ог куж. Ог йӧкты, дядьӧ.

МИТРЕЙ. Но, кужтӧг олан. Лок, больше ничево! (Кыскӧ.)

КАТЯ (Кирӧӧс босьтӧ сойӧдыс). Лок нӧ, гозъя ми тэкӧд йӧктам.

КЛАВДИ (петитчӧ). Збыль ог йӧкты. Лэдз, косялан дӧрӧм соскӧс.

МИТРЕЙ (кыскӧ). Косяссяс кӧ, выльӧс ньӧбам. (Скӧрысь.) Мый нӧ тэ, Клавдюк, збыль он йӧкты мекӧд али мый?

КЛАВДИ. Ог, мися, дядьӧ, куж.

МИТРЕЙ (лёкысь нетшыштӧ). Трасича!.. (Мунӧ да Катяӧс кватитӧ.) Лок, Катя, йӧктам мекӧд.

КАТЯ. Ме ӧні ачым тэкӧд ог йӧкты, кора тай вӧлі — мед сэки, колӧкӧ, босьтін... Степаыдкӧд сувт.

МИТРЕЙ (шай-паймунӧ). Мый? Дай тэ он йӧкты мекӧд?

КАТЯ. Ог.

КИРӦ. Йӧкты, Катя, мый, трустӧс, сэні ышнясян?

КАТЯ. Мый нӧ эськӧ ачыс вежнясьӧ сэтшӧма?

МИТРЕЙ (ныр-вомсӧ векыштӧмӧн пуксьӧ Артип дінӧ). Ладнӧ! Часлы... больше ничево!

АРТИП. Мый нӧ сэсся, Митрей, он йӧкты? Сідзкӧ, ме муна... (Кӧсйӧ чеччыны.)

МИТРЕЙ (кутӧ Артипӧс). Эн мун! Ворсышт на!

АРТИП. Ӧти параыдлы? Кутшӧм нӧ сійӧ кадрель? Мун ачыд тшӧтш сувт Степа тьӧткаыдкӧд.

МИТРЕЙ (серам пыр). Сыкӧд? (Сьӧлыштӧ да кокнас зырыштӧ.)

КАТЯ. Сувт, Степа, Закарыскӧд... Закар, лок!

ЗАКАР. Ме йӧкта. (Сувтӧ.) Степа, йӧктан он?

СТЕПА. Ме ог вермы, юрӧй бергӧдчӧ ставнас... Ойя!..

МИТРЕЙ (скӧрысь Степалы). Мун, баба, сувт Закарыскӧд, йӧкты, больше ничево!

КАТЯ. Лок, Степа, ӧдйӧджык.

АРТИП (лӧсьӧдчӧ ворсны). Кык параыдлы позяс... (Заводитӧ ворсны.)

СТЕПА (1-й «фигура» бӧрын лэччысьӧ Закарлы морӧс вылас). Ойя да, юрӧй дзикӧдз бергӧдчӧ.

ЗАКАР (кутӧ Степаӧс). Вывті лои юӧмыд тэнад, Степанида.

КИРӦ. Но, торойӧс гудӧкав!


Артип гудӧкалӧ. Первой йӧктӧны Кирӧ гозъя. Закар оз пет йӧктыныыс, Степаӧс морӧс бердас кутӧ да. Митрей казялӧ Закарлысь Степакӧд кутчысьӧмсӧ да лёкысь уськӧдчӧ на дінӧ. Закарӧс тойыштӧ, Степаӧс шошаӧдыс кватитӧ да лабичӧ пуксьӧдӧ.


КИРӦ (горзӧ). Торойӧс ворс, Артип!

СТЕПА (горӧдыштӧ). Ой, Митрей, лэдз!

АРТИП (чеччӧ да локтӧ Митрей дінӧ). Лэдз, Митрей!.. Мый нӧ, дурмин али мый?

МИТРЕЙ. Ставнытӧ пасьварта! (Ырыштчӧ Степа вылӧ. Артип да Ӧсип кутӧны.)

ӦСИП. Эн дур тэ. Лӧньышт!.. Вод вай лучшӧ, Митрей, да шойччышт.

АРТИП. Вернӧ, водыштлы, Митрей, да спокоитчышт. Вывті тай юӧмыд.

МИТРЕЙ (нетшкысьӧ). Лэдзӧй!.. (Лӧвтігмоз.) Ставныд ті ме вылӧ воанныд? Некод жалитысь менӧ абу!.. (Пуксьӧдӧны Митрейӧс лабичӧ, пызан помӧ. Митрей юрсӧ лэдзӧ кияс вылас. «Последний нынешний денёчик» сьывны босьтлӧ да унмовсьӧ.)

АРТИП (ньӧжйӧник). Но, сэсся энӧ увгӧй, — гашкӧ, унмовсяс. (Локтӧ Клавди дінӧ.) Ветлам, Клавди, катыдӧ тшӧтш.

КЛАВДИ (кинас ӧлӧдӧ). Ланьт, Артип, кылас!

ЗАКАР. Мунамӧй жӧ сэсся вайӧ. (Пасьтасьӧ.)

КИРӦ. Ак-ма, зонмӧ, эз и удайтчы прамӧя йӧктыштны.


Ставныс пасьтасьӧны.


АРТИП. Мӧдысь коркӧ, садь юрӧн.

КИРӦ. Садь юрӧн нӧ кутшӧм али йӧктӧм? Талун эськӧ мазьыс сюрліс, да дзугис Митрейыд ставсӧ.

СТЕПА. Пукалӧй на. Водз тай нӧ мунанныд?..

КАТЯ. Аски ӧд, люба, весьлун, удж вылӧ ковмас петны. А юрыд кутас висьны!

ЗАКАР (прӧщайтчӧ Степакӧд). Пасибӧ, Степанида Петровна, да эн дивит менӧ.

СТЕПА (шатлалӧ). Водзлань сэсся, Закар... Ставныд тшӧтш видлывлӧй миянӧс. Энӧ дивитӧй! Ӧд кутшӧм код ме талун.

Унаӧн (петігмозныс). Пасибӧ! Сё пасибӧ! (Петӧны. Степа колльӧдӧ посводзас петалӧмӧн. Артип, кылӧ, гудӧкасьны босьтӧ, — гудӧк шыыс пыр вочасӧн ылысмӧ, лӧньӧ, бырӧ.)


5-ӧд петкӧдчӧм


Митрей шкоргӧ-узьӧ пызан вылӧ лэдзчысьӧмӧн; корсюрӧ мурӧстлӧ да ун йывсьыс броткӧдчӧ. Клавди жугыля пукалӧ лабичас, ӧшинь дорын. Кӧнкӧ сиктын кылӧ понъяс увтыштӧны. Степа, кылӧ, кильчӧ игналӧ.


КЛАВДИ (видзӧдӧ ӧшинь пырыс вывлань, тӧлысь югӧр вачкӧ чужӧмас). А тӧлысьыс кутшӧм югыд!..


Занавес ньӧжйӧник тупкысьӧ.


МӦД ВӦЧӦМ


Мӧд тор


Вӧчсьӧ воддзаинас жӧ. Вой. Керкаын пемыдкодь, сӧмын ӧшиньясӧд тӧлысь югӧр вачкӧ. Пызан вылын нинӧм абу, сэтчӧ лэдзчысьӧмӧн век на Митрей узьӧ. Джоджын, вольпась вылын, шебрасьӧмӧн узьӧ Степа; сылы чужӧмас инмӧ тӧлысь югӧр. Клавди паччӧр дорын куйлӧ.


1-я петкӧдчӧм


КЛАВДИ (очсалӧ да корсюрӧ ышловзьӧ. Недыр мысти юрсӧ лэптыштӧ да кывзысьӧ). Узьӧны... А ме синмӧс эг на куньлы. Быдсяма думыс бергалӧ юрын... (Муртса кылыштӧ гудӧк шы.) Артип, буракӧ, вӧлисти на жӧ локтӧ. (Гусьӧник чеччӧ, лэччӧ паччӧрысь да видзӧдӧ ӧшиньӧд. Гудӧк шы матысмӧ.) Майбыръяс, гажӧдчӧны!.. Выль пӧлӧс войпукъяс комсомолечьяс лӧсьӧдӧмаӧсь. Ӧтчыд толькӧ ме сэтчӧ веськавлі... Бур ногӧн сьылӧны-ворсӧны. (Гудӧк шы дзик ӧшинь улын кылӧ.) Артип да Гриша Матвей. (Вешйыштӧ ӧшинь водзсьыс. Гудӧк шы пыр ылысмӧ да вочасӧн бырӧ. Клавди бара ӧшиньӧд видзӧдлӧ да пыдісянь ышловзьӧ.) Пышъя, буракӧ, гортысь. Ог вермы... (Видзӧдлӧ Митрей вылӧ.) Мед эськӧ нэмсӧ вот тадзи нускис-узис, эз и садьмыв мед некор!.. (Бӧр кайӧ паччӧрӧ да водӧ.) Ойя да, олӧм!.. Эштылас жӧ мыйкӧ миян вылын и ыждавны да смекайтчыны.

МИТРЕЙ (ымӧстӧ да кызӧ. Сэсся, этша вӧрӧдчӧм бӧрын, юрсӧ лэптыштлӧ да гӧгӧр видзӧдлӧ дулалӧмӧн). Ппу!.. Татчӧ и унмовсьысьӧма менам. (Пуксьӧ да кияснас чужӧмсӧ ниртӧ, ружтігтырйи.)

КЛАВДИ (бергӧдчӧ йӧзлань банӧн, лэптыштӧ юрсӧ). Садьмис нин, тыдалӧ, му пыр мунтӧмторйыд...

МИТРЕЙ (чеччӧ да ньӧжйӧник ветлӧ пачводз дорӧ юны. Юӧм бӧрын сувтӧ джодж шӧрӧ да бура дыр зунясигмоз видзӧдӧ Степа вылӧ). В-а!.. Стынитӧ, стерво!.. Макар Закарыскӧд абу жӧ мунӧма, стервоыд?.. Клавдюк нӧ кӧні? (Видзӧдӧ, сэсся матыстчӧ паччӧрлань да аддзӧ.) Тані тай сійӧ узьӧ... Но, мед... часлы... (Пуксьӧ лабичӧ да кокъяссӧ пӧрччӧ.)

КЛАВДИ (полӧ, гусьӧник гын сапӧгсӧ кӧмалӧ). Мый бара кутас вӧчны-а? Кайны кӧ кутас ме дінӧ, тойышта да пышъя ачым...

МИТРЕЙ (пӧрччысигмозыс, скӧрысь). Закар ковмӧма!.. Мр! Больше ничево!.. Петкӧдла час ме тэныд ӧні и грӧз, стерволы! Ловъя юрӧн тэысь он жӧ нин мын, буракӧ-а... Пӧрысь кучик! (Пӧрччысьӧм бӧрын малалӧ пызан вылысь, кинас корсьӧ мыйкӧ).

КЛАВДИ (юрсӧ лэптыштӧ да видзӧдлӧ Митрей вылӧ, полӧмӧн). Ой, мыйкӧ кӧсйӧ мамӧс вӧчны?! Пурт корсьӧ, буракӧ.

МИТРЕЙ. А-а, час!.. (Чеччӧ да стенсьыс кималасӧн босьтӧ пищальсӧ, восьтӧ затворсӧ. Сэсся патронташысь кыскӧ патрон да кӧсйӧ зарадитны пищальсӧ.) Дзенга, стервоӧс, дай больше ничево! Ёна менӧ сэсь оз мыждыны, мед йӧз мужиккӧд эз кыскась! Свидетельяс эмӧсь... Стерво!.. Клавдюк сэки менам лоӧ... Мм!..

КЛАВДИ (зэв ӧдйӧ лэччӧ паччӧрысь да гусьӧникӧн кыйӧдӧ, ачыс веськыда тіралӧ. Мыйӧн Митрей кутас патронсӧ пищаляс сюйны, Клавди уськӧдчӧ да кутчысьӧ пищаляс, патроныс усьӧ джоджӧ). Ой, дядьӧ!.. (Горӧдӧ.) Мамӧ, мамӧ!.. Ой, эн лысьт, дядьӧ!.. Мамӧ!.. (Степа кыпӧдчӧ шӧйӧвошӧмӧн.)

МИТРЕЙ (нетшкӧ пищальсӧ). Лэдз!.. Клавдюк, лэдз бурӧн!..

СТЕПА (чеччӧ, локтӧ на дінӧ). Мый нӧ, бласлӧ кристос, лои?

МИТРЕЙ (нетшкӧ). Лэдз, стерво!..

КЛАВДИ. Ойя да!.. Мамӧ, дядьӧ тэнӧ лыйны кӧсйӧ. Ой!..

СТЕПА (тшӧтш кутчысьӧ пищальӧ). Сё благӧслӧви кристос!.. Митрей, мый нӧ тэ, йӧймин али мый?.. Вай пукты пищальтӧ!.. О, господьӧ?!.

МИТРЕЙ (лёкысь нетшкӧ). Лэдзӧ! Мм!..

КЛАВДИ. Кут, мамӧ, ёнджыка, эн сет!..

МИТРЕЙ. Клавдюк!.. Лэдз вай бурӧн... Трасичаяс!.. (Лэдзчысьӧ пищальысь да пуксьӧ лабичас.) Ті тадзи?.. Но — мед!.. Помнитлӧй, бур оз ло тіянлы. Кыкнаннытӧ виа.

СТЕПА. Тэнад тай, Митрей, век на абу палялӧма юрыд. Вод да узь. О, господи да помилуй!.. Да ещӧ загрекиыд кыдзкӧ эз су миянӧс...

КЛАВДИ (кутӧ киас пищальсӧ). Муртса, мамӧ, эз су, муртса...

МИТРЕЙ. Суас на! Энӧ на сэтшӧма радлӧй ті.

СТЕПА. Вод вай, Митрей, да пальӧдчы... Мун, то вольпась вылад. (Индӧ аслас вольпась вылӧ.)

КЛАВДИ. Пищальсӧ ме дзеба, мамӧ, сарайӧ петкӧда да...

МИТРЕЙ. Эн лысьт вӧрзьӧдны!.. Ӧшӧд местаас!

КЛАВДИ. Тэ бара босьтан дай.

МИТРЕЙ. Ог босьт. Ӧшӧд вай сей минут, больше ничево!

СТЕПА. Ӧшӧд, Клавди. Оз босьт, водас узьны... Сідз ӧд прӧста кампузитчыштіс дядьыд, пӧкмӧлля вывсьыс.

КЛАВДИ (пищальсӧ ӧшӧдӧ стенас). Збыльысь, дядьӧ, вод да узь...

МИТРЕЙ (чеччӧ лабичысь да друг уськӧдчӧ пищальлань). Разобью...

КЛАВДИ, Степа (тшӧтш уськӧдчӧны да кутӧны Митрейӧс). Эн босьт!

МИТРЕЙ (лёкысь серӧктӧ). Ог, ог. Энӧ полӧй, повзьӧдыштны кӧсйи, больше ничево! (Пуксьӧ бӧр лабичӧ.) Не кӧ Клавдюк эськӧ, код тӧдас, мый вермис лоны! Дзик тэ кузя, Клавдюк, мамтӧ ме жалита... Аски тэкӧд карӧ лэччылам... Ок, бур жӧ платтьӧ дӧра тэныд ньӧба! Кылан? Тэнад тшассьӧ кузя позьӧ и вӧччӧдыштны тэнӧ... Сатин ньӧба, кылан?..

КЛАВДИ. Меным ӧткодь, дядьӧ... Ас кыӧм шушунсӧ на зэв новла ме.

МИТРЕЙ Мый сійӧ кыз шушунсьыд? Тэ ӧд абу кутшӧмкӧ бобыль ныв. Ӧсип Митрей вермас на ӧти нывтӧ пасьтӧдны и бурджыка! Мед кышакылӧ ставыс мунігад... Вӧччӧда аканьӧс моз, больше ничево!.. Аски лэччам, прӧмыснымӧс иналам дай ньӧбам медбур магазинсьыс....

СТЕПА. Но, вод сэсся, бласлӧ кристос, талун да шойччы... Вой шӧр гӧгӧр кындзи ӧні абу на. Асылӧдзыд дзикӧдз палялан.

МИТРЕЙ (мунӧ да пуксьӧ вольпась вылӧ). А тэ, баба, мекӧд эн вод! (Видзӧдлӧ Клавдилань.) Вот эськӧ... да... Мм!.. (Водӧ.) Аски водз карӧ лэччам. Кылан, Клавдюк?

КЛАВДИ (паччӧрӧ кайигмоз). Но, но, дядьӧ, кыла... (Водӧ. Митрей кызӧ да регыд нускыны-узьны пондӧ.)

СТЕПА (мыйкӧ дыра мысти тшӧтш кайӧ Клавди дінӧ да пуксьӧ паччӧр дорас. Бура дыр пукалӧ. Сэсся бергӧдчӧ Клавдилань). Он на узь, Клавди?

КЛАВДИ. Ог, мамӧ... Кутшӧм нин узьӧм тавой.

СТЕПА (ышловзьӧ). Узьышт, колӧкӧ... Ме пукалышта...

КЛАВДИ (пуксьӧ). Тэ вай, мамӧ, лучшӧ ойбыртлы, менам оз нин ӧні узьсьы.

СТЕПА. Час нӧ, нёровтыштла... юрӧй зэв ёна висьӧ... (Водӧ.) Кыськӧ тай эм жӧ татшӧм мортыд?.. Мырдӧн кык чашка юктӧдіс... О, господи да помилуй!.. Тэ, Клавди, эн унмовсь: гашкӧ, садьмас да бара пондас карапужитчыны дядьыд да. (Ышловзьӧ.)

КЛАВДИ. Ог, ог, узьышт вай.


Недыр мысти Митрей ныргорӧн кутӧ шкоргыны.


СТЕПА (ун йывсьыс моз). Он на узь, Клавди?..

КЛАВДИ (небыдика). Ог, ог, мамӧ...

СТЕПА. Эн унмовссьы, нылӧ... эн...

КЛАВДИ (бура дыр пукалӧ шыасьтӧг. Сэсся видзӧдлӧ мамыс вылӧ да гусьӧник юалӧ). Мам, юксян он эськӧ тэ Митрей дядькӧд?.. (Степа нинӧм оз шу.) Узьӧ нин тай... (Малыштӧ мамсӧ юрӧдыс.)

СТЕПА (черӧбтӧ). Мый?.. Клавди, узян нин?.. (Ышловзьӧ.)

КЛАВДИ. Ог, мамӧ, ог... Узь, узь тэ. Ме караулита — эн пов. Узь!

СТЕПА (унмовсьӧ.) Эн, дитя, унмовсь...


Кӧнкӧ кылӧ петук чуксасьӧ.

Занавес ньӧжйӧник тупкысьӧ.


КОЙМӦД ВӦЧӦМ


Нывбаба юкӧд (женотдел). Гажакодь комната. Шуйгавылас ӧдзӧс; ӧдзӧссяньыс веськыдвылас (авансценалань) пызан, сы дінын улӧс; шуйгавыв стенас жӧ ӧшалӧ Каликова Домналӧн портрет. Веськыдвылас кык ӧшинь; ӧшиньяс костын стенас ӧшалӧ Ленинлӧн портрет. Веськыда — кык портрет: Цеткин Клара да Крупская; кык портрет костас гӧрд плакат, сэтчӧ еджыд шыпасъясӧн гижӧма: «Коми нывбаба, отсав дорны выль олӧм!» Веськыдвыв пельӧсас галанскӧй пач, сы водзын (таланьынджык) мӧд пызан да улӧс. Стенъясас ляскалӧма нывбабаясӧс чуксалан лозунгъяс. Пызанъяс вылас гижан кӧлуй да кабала папкаяс. Шуйгаладор пельӧсас (ӧдзӧс дорас) — прӧстӧй диван; дзик пельӧсас, тувйын, ӧшалӧ паськӧм. Тӧвся лун.


1-я петкӧдчӧм


СИМАНОВА (ӧтнас мӧд пызан саяс пукалӧ да гижӧ, корсюрӧ видзӧдлӧ ас водзас паськӧдӧм папка вылӧ). Этша тай эськӧ пыр жӧ водзӧ восьлалам да... 1924-ӧд воын Коми область пасьта вӧлӧма сӧмын на 18 делегатка чукӧр — 586 делегатка, 25-ӧд воын 44 чукӧр нин — 1380 делегатка, таво вылӧ миян лыддьысьӧ 70 делегатка чукӧр нин — кык сюрс кымын делегатка нин... (Гижӧ да нимкодьпырысь.) Куим воӧн делегатка чукӧрыс содӧма пӧшти 400 прӧчент!.. (Бара сідзи.) Дай делегаткаясыслӧн лыдыс кайӧма 320 прӧчент вылӧ... (Гижӧ бура дыр.) Сӧмын вот коми аньясӧс сьӧкыд уджыс вывті ёна личкӧ да велӧдчыныыс некор. Пемыдлуныс найӧс сёйӧмӧн сёйӧ. Став неграмотнӧй гырысь войтыр пӧвстас куим четвертьыс (75%) нывбабаяс... Лоӧ та йылысь бурджыка гижыштны газетад... Пемыдлуныс вӧсна ӧд сиктъясас и быд омӧльторсӧ вӧчӧны, важ лёк оласногыслӧн зэв на пыдын вужйыс... (Мӧвпалӧ гырддза вылас лэдзчысьӧмӧн.) Аттӧ, мӧвпыштан да, уна на жӧ гырысь уджъяс ковмас вӧчны коми сиктса нывбабаяс костын, крестьянкаяс пӧвстын!.. (Гижӧ.)


2-ӧд петкӧдчӧм


МАЙКОВА (пырӧ портфеля, бергӧдчылӧ бӧрвылас да чуксалӧ). Лок, лок, татчӧ пыр! (Полігтырйи пырӧ Клавди, дукӧса, шалля, кушенча кепыся; киняулас кутӧ кабала пытшкӧ тӧбыштӧм ёкмыль. Майкова портфельсӧ пуктӧ пызан вылас да пӧрччысигмозыс шуалӧ.) Пуксьы сэтчӧ диван вылас да шонтысь...

КЛАВДИ (оз пуксьы, полӧ). Ог, дядьӧ локтас да видчыны кутас.

СИМАНОВА (Майковалы). Помасис судыд?

МАЙКОВА. Помасис. Нёль во кежлӧ пукӧдны судитісны. (Клавдилы.) Пуксьыштлы да висьтав, бур ныв, мыйысь тэ вӧлі бӧрдан? (Пуксьӧ пызан сайӧ.)

СИМАНОВА. Нёль во кежлӧ жӧ... Гижышт газетӧ суд йывсьыд, мед мукӧд тӧдісны да эз пондыны ӧбӧдитны нывбабаясӧс.

КЛАВДИ (ньӧжйӧник пуксьӧ диван помӧ, ёкмыльсӧ киас босьтӧ). Вӧлӧй, гашкӧ, мунас да?.. Дядьӧ, мися, менӧ кутас видны и.

СИМАНОВА. Кытысь нӧ тэ, нылӧнька, ачыд? Слугаӧ медасьны кӧсъян али мый?

КЛАВДИ. Ог, дядькӧд локтім, прӧмыс вайим татчӧ карас. (Лэптыштӧ юрсӧ да надзӧник гӧгӧр видзӧдлӧ. Аддзӧ гӧрд плакат да дыр видзӧдӧ, лыддьӧ ас кежсьыс вомсӧ вӧрӧдӧмӧн.)

МАЙКОВА. Пушнина?.. Мыйла нӧ эськӧ, ачыд карӧ локтӧмыд-а, шогсян?.. (Казялӧ Клавдилысь лыддьӧмсӧ.) Тэ нӧ грамотнӧй?

КЛАВДИ. Сідз, омӧлика кужа...

МАЙКОВА. Нолтӧ, вай лыддьы, мый сэтчӧ гӧрд вылас гижӧма? Сійӧ ӧд тэныд тшӧтш инмӧ...

КЛАВДИ. Меным оз жӧ инмы? Сэтчӧ со гижӧма «Коми нывбаба» да? Ме ӧд абу на баба — ныв на ме... Ойя да, мунны сэсся лоӧ. (Чеччӧ.)


Симанова Майковакӧд шпыньмунӧны.


МАЙКОВА. Пукышт на. Эн тай нӧ и висьтав нинӧм?

КЛАВДИ (ышловзьӧ). Мый нӧ висьтала ме? Дядьӧ, кӧнкӧ, корсьӧ нин менӧ... Сёяс дзикӧдз вӧлӧс эновті да... (Аддзӧ Ленинлысь портретсӧ да синъяснас зэв сюся дзоргӧ сы вылӧ.)

СИМАНОВА. Ёна жӧ тэ, тыдалӧ, полан дядьсьыд? Ӧбӧдитӧ али мый сійӧ тэнӧ?!. Эн на мун, сідзкӧ. Пуксьыштлы да висьтав миянлы, кутшӧма тэ олан гортад, мый вӧчлан?

КЛАВДИ (ӧзъян чужӧмӧн, портрет вылӧ индӧ). Эсійӧ ӧд Лениныд и эм, буракӧ? (Пуксьӧ диван вылӧ да видзӧдӧ.)

МАЙКОВА. Сійӧ.

КЛАВДИ. Ме книгаысь аддзылі, картина вылысь... Сэні ичӧт, а тані со ыджыд — дзик ловъя морт кодь... Сійӧ нӧ збыльысь кувліс?..

МАЙКОВА. Мӧд во нин, люба, ми Ленинтӧг олам. Тэныд нӧ сійӧ жаль жӧ?

КЛАВДИ (ышловзьӧ). Зэв жаль. Мортыс пӧ сійӧ зэв вежӧра да бур вӧлӧма. (Пернапас чӧвтӧ.) Сарство небеснӧй!..

МАЙКОВА. Оз ков, бур ныв, Ленинтӧ сідз казьтывны. Ачыс Лениныд некор енмыдлы эз эскыв, пыр чуксавліс вермасьны ен вераыдкӧд.


Майкова чеччӧ да шкапысь корсьысьӧ-видлалӧ книгаяс.


КЛАВДИ (яндысигмоз). Вунӧдчи... Ми ӧд пемыдӧсь да век на со важас кыскӧ... Некутшӧм ен ни мӧдар югыд пӧ тай эськӧ ӧні абу да...

СИМАНОВА. Дай войдӧр эз вӧвлы. Ставсӧ ӧд сійӧ попъяс да озыръяс лӧсьӧдлӧмаӧсь, медым пемыд уджалысь войтыртӧ повзьӧдлыны да нартитны ёнджыка вермисны.

МАЙКОВА (шкапысь перйӧ кык книга, сетӧ Клавдилы). На, со тэныд кык книга ме сета: «Енлы эскӧм» — кыдзи Лениныд видзӧдіс ен вера вылад, мӧдыс — «Ленин да нывбабаясӧс мездӧм». Бура лыддьы, кык пӧв, куим пӧв лыддьы да ачыд гӧгӧрвоан ставсӧ.

КЛАВДИ (босьтӧ да питшӧгас сюйӧ, полігтырйи). Мед эськӧ Митрей дядьӧ эз жӧ аддзы... Стрӧка кӧ сюрас, ёна жӧ сьӧлӧмсянь и лыддя ме тайӧ нигаястӧ!.. Пасибӧ. (Чеччӧ.) Муна сэсся, дзикӧдз ӧд ылалі со татчӧ... Нӧйтас нин менӧ Митрей дядьӧ ӧні, эта дыра кежлӧ Каркоӧс эновті да...

МАЙКОВА (кутӧ да пуксьӧдӧ, меліа шуалӧ). Регыдик пукалышт на, бур ныв, эн на мун... Тэ со пыр на шуан: дядьӧысь пӧ пола. Висьтав вай, мыйсяма Митрей дядь тэнад сэтшӧмыс?.. Гашкӧ, ми на вермам мыйкӧ сӧветуйтны тэныд. Пуксьыштлы, пуксьыштлы.

КЛАВДИ (пуксьӧ, жугыля). Ойя да, кыдз нӧ ме висьтала ставсӧ?.. Дай висьтавныыс ог лысьт, яндзим... Весиг мамӧлы на эг висьтавлы ни...

МАЙКОВА. Тыдалӧ, збыльысь кутшӧмкӧ ыджыд шог тэнад сьӧлӧм вылад. (Симановалы.) Пыригӧн, видзӧда да, пукалӧ тайӧ пос помын, мызгыртчӧма да бӧрдӧ гусьӧникӧн мыйыськӧ.

СИМАНОВА. Час, ачыс бур нылыс висьталас. (Клавдилы.) Эн пов, висьтав.

КЛАВДИ (юрсӧ копыртӧ, быттьӧ яндысьӧ). Ог нин висьтав, буракӧ, дядьӧлы кывсяс да вӧтлас менӧ гортысь. Код тӧдас, кутшӧмӧсь ті асьныд сэсся. Гашкӧ, нарошнӧ сылы ме йылысь сукляланныд да?..

СИМАНОВА (локтӧ Клавди водзӧ). Тэ тай, бур ныв, вывті полысь вӧлӧмыд. Эн сэтшӧма пов миянысь. Ми ӧд сы вылын и уджалам, кыдз эськӧ нывбабаясӧс дорйыны да югдӧдны. Тэ, буракӧ, ӧнія олӧмсӧ зэв на омӧлика тӧдан. Гашкӧ, первойысь на и карас локтін да?..

КЛАВДИ. Первойысь, дерт. Прӧмыс вайим дядьӧкӧд, татчӧ уліас тай вузаліс... (Друг.) Ок, вӧлӧй бара эм али абу нин? Он ӧд и тӧдлы — гусяласны: карад пӧ тай зэв гусясьысьӧсь да... (Чеччӧ.) Муна.

СИМАНОВА (пуксьӧдӧ Клавдиӧс да ачыс тшӧтш сыкӧд орччӧн пуксьӧ). Лун шӧр лунӧ некод оз вӧрзьӧд, эн пов. Дядьыд нӧ эськӧ кытчӧкӧ ньӧбасьны муніс?

КЛАВДИ. Эз. Винала кабакӧ муніс, дай сур юны на кӧсйӧ вӧлі кытчӧкӧ пыравны. Код юрнас ещӧ усьӧ кытчӧкӧ, да став деньгасӧ гусяласны...

МАЙКОВА. Юлывлӧ жӧ дядьыд?

КЛАВДИ. Кӧть бара ведра сувтӧд, бучкас жӧ сійӧ. (Друг видзӧдлӧ гӧгӧр.) Мед эськӧ, загреки, оз жӧ кывлы? Некытчӧ туйтӧм ӧд код юрнас — пыр сэсся ме вылӧ и воны пондас...

МАЙКОВА. Мыйсяма дядь нӧ сійӧ сэтшӧмыс: чож тэнад али батьыдлӧн вокыс?

КЛАВДИ (ышловзьӧ). Абу. Мамӧлӧн мужикыс... Батьӧ кувліс, во квайт кымын нин, буракӧ, лоӧ, биа висьӧмсьыд — типысь пӧ тай, пельшӧр вӧлі висьталӧ-а.

СИМАНОВА. Сідзкӧ, тэ дядьводз ныв лоан? Мамыд мӧдысь муніс верӧс саяс?..

КЛАВДИ. Мӧдысь... Эз мун эськӧ да, гортӧ пыртіс Ӧсип Митрейтӧ, дась овмӧс вылӧ босьтіс. Ӧні сэсся сійӧ жӧ миян вылын и ыджыдалӧ, вӧля босьтӧма да.

МАЙКОВА. Мый нӧ, нӧйтӧ, али мый тіянӧс?

КЛАВДИ. Быдсямаыс овлӧ, ещӧ и смекайтчывлас быд ногыс миян водзын.

МАЙКОВА, СИМАНОВА } (Ӧтпырйӧ.) Мыйысь? Кыдзи?

КЛАВДИ. Кутшӧмкӧ тай йӧй ру пырӧма сылы юрас да, ме бӧрся вӧтлысьӧ... (Друг ёна шога.) Ойя да, зэв ӧд сьӧкыд миянлы мамӧкӧд сы дінын овныыс. Вины нин мамӧс кутліс и, муртса эз лый пищальысь...

СИМАНОВА. Мамыдкӧд нӧ сылӧн сӧгласыс оз жӧ тырмы?

КЛАВДИ. Дерт нин, оз. Менсьым быд воськов туялӧ, быд стрӧкаын кыйӧдӧ, тшӧктӧ аскӧдыс овны. Шуӧ весиг: ме пӧ, дядьӧ быттьӧ, эг пыр тіян овмӧсаныд мамыд вӧсна, меным пӧ сійӧ мустӧм, пӧрысь, ме пӧ пыри тэ понда, ме понда быттьӧ. Горт помысь некытчӧ оз лэдз петавны менӧ ни...

МАЙКОВА. Кымын арӧс нӧ аслыд тэныд?

КЛАВДИ. Дас ӧкмысӧд нин. Артип таво комсомолӧ нин пырӧма; меным эськӧ зэв жӧ окота да, ог лысьт.

МАЙКОВА. Митрей дядьыд нӧ ачыс том на?

СИМАНОВА. Код нӧ сійӧ Артипыс? Тэнӧ нӧ асьтӧ кыдзи шуӧны?

КЛАВДИ. Клавдияӧн... Митрей дядьлы кызь вит арӧс... Артипыс... (Нюммунӧ.) Миян сиктса томиник зон, бурлак. Вӧр лэдзӧны таво батьыскӧд...

СИМАНОВА. Дядьыд нӧ кыйсьӧ тэнад, вӧралӧ?

КЛАВДИ. Вӧралӧ. Педьӧ Кирӧкӧд таво кыйсьыныыс кайлісны. Бура уна эськӧ прӧмыссӧ вайӧма, да мый — ставсӧ жӧ юас да кыдзсюрӧ таргайтас.

МАЙКОВА. Со ӧд, Клавдия, кутшӧм лёк вӧлӧма тэнад олӧмыд, а тэ он кӧсйы вӧлі висьтавны миянлы.

КЛАВДИ (друг кватитчӧ). Ойя да, збыльысь тай нӧ висьтавсис менам ставсӧ!.. Энӧ жӧ бара ті дядьлы удтӧй менӧ! Юасьны кӧ мыйкӧ кутас ме йылысь — пӧръялӧй сійӧс...

СИМАНОВА. Эн пов. Сійӧ ӧд татчӧ оз и во. (Меліа.) Гашкӧ, дядьыд тэнӧ ӧбӧдитіс нин да?..

КЛАВДИ (збоя). Сы выйӧдз ӧд ог жӧ ме лэдзчысь!.. Пыр эськӧ менӧ кыйӧдӧ, тӧрӧпитӧ да ловъя юрӧн сылы наперво ме ог сетчы!.. (Видзӧдлӧ гӧгӧр полігтырйи.) Час, висьтала нин нӧ тіянлы ӧти сайын: татчӧ карад локтігчӧж сійӧ сӧрис быдторсӧ меным, тшӧктӧ овны аскӧдыс. Сэсся прӧмыссӧ вузаліс да меным со (петкӧдлӧ ёкмыльсӧ) сарапан вылӧ сатин ньӧбис. Ӧні ме ог тӧд, мый и керны? Дерт, кӧнкӧ, тайӧ гӧснечсьыд ёнджыка пондас ме дінӧ зыртчыны...

СИМАНОВА. Оз лысьт! Сарапантӧ вур да новлы на здоровйӧ. Мыйкӧ кӧ кутас шуны, тэ мун да асланыд волисполкомӧ норась, либӧ миянлы письмӧ ысты, гиж женотдел ним вылӧ.

КЛАВДИ (полігтырйи). Сы вылӧ норасьны? Ме бара ог лысьт — виас.

МАЙКОВА. Нинӧм оз вӧч.

КЛАВДИ. Ме кӧсъя вӧлі тіянлысь ещӧ юавны: позяс оз эськӧ мамӧлы торйӧдчыны Митрей дядьӧсьыс да вӧтлыны сійӧс миянысь?

МАЙКОВА. Позяс, дерт, нылӧ. Ӧнія законыд быд ногӧн дорйӧ нывбабаястӧ, оз лэдз на вылын нартитчыны. Оз кӧ дядьыд бурӧн торйӧдчы, мамыд вермас судӧ сы йылысь шыасьны.

КЛАВДИ. А мамӧ вермас на коймӧдысь верӧс сайӧ мунны?

МАЙКОВА (сералігмоз). Вермас... Кӧсйӧ на ӧмӧй ещӧ кодкӧ сайӧ мунны?

КЛАВДИ (яндысигмоз). Сідз юалі... Гашкӧ, мися, Закар саяс окотитас да.

МАЙКОВА. Код нӧ сійӧ Закарыс?

КЛАВДИ. Миян сиктысь жӧ, ӧти озыр дӧвеч морт... Сідзкӧ, гортӧ воа да, пырысь-пыр жӧ мамӧӧс ыштӧда торйӧдчыны дядьысь: сэтшӧм идол дінын огӧ жӧ кутӧ овны! (Видзӧдӧ гӧгӧр.) Со ӧд, тіян тані кутшӧм гажа! (Индӧ Крупская да Цеткин портретъяс вылӧ.) Эсійӧ нӧ кутшӧм тьӧткаяс?

СИМАНОВА (чеччӧ да индӧ Цеткин вылӧ). Тайӧ — Клара Цеткин. (Клавди матыстчӧмӧн видзӧдӧ портрет вылас.) Ачыс чужлӧма Германияын. Бур коммунистка-революционерка. Видзӧд, пӧрысь нин ачыс, а век на сьӧлӧмсяньыс тӧждысьӧ уджалысь йӧз вӧсна. (Индӧ Крупская вылӧ.) А этійӧ — Крупская, Надежда Константиновна, Ленинлӧн гӧтырыс. Ёна зільӧ йӧзӧс югдӧдӧм вӧсна, торъя нин нывбабаяс понда. (Пуксьӧ аслас местаӧ, пызан сайӧ.) Тэныд, Клавди, али кыдз шуӧны тэнӧ, велӧдчыны жӧ эськӧ колӧ да. Тыдалӧ, выль ногса олӧмланьыс тэнӧ ёна жӧ кыскӧ.

КЛАВДИ (видзӧдӧ портретъяс вылӧ, сьӧлӧмысь). Со ӧд, майбырӧй, эмӧсь жӧ ыджыд мывкыда-вежӧра нывбабаясыд!.. Ок, эськӧ, меным ёна жӧ окота велӧдчыштны да некыдз!.. Кӧть нин эськӧ ичӧтика. (Нывбабаяслы.) Но, муна сэсся, зэв дыр манитчи!.. Пасибӧ тіянлы, да энӧ жӧ дивитӧ менӧ, пемыд нылӧс, лёк шогӧс висьтала да! (Бергӧдчӧ да аддзӧ Каликовалысь карточкасӧ.) То нӧ на со кутшӧмкӧ томиник нывлӧн карточкаыс дай. (Видзӧдӧ.)

МАЙКОВА. Сійӧ — Каликова Домнаыд и эм; гашкӧ, кывлін? Повтӧм сьӧлӧма коми коммунарка, ачыс Выльгортысь, гӧлиник ныв. Домнаыд ас вӧлясьыс гӧрд партизанъяскӧд тшӧтш кодкӧ вонад еджыдъяскӧд воюйтіс. Сэсся разведка вылысь вӧлі еджыдъясыд кутӧмаӧсь да Помӧсдінын и лыйлӧмаӧсь, шойсӧ шыбитӧмаӧсь вӧлі лым пиӧ, лыйланінас... Лыйлытӧдзыс на сылысь вӧлі чегъялӧмаӧсь кияссӧ, тшӧктӧны вӧлӧм висьтавны гӧрдъяс йылысь да сетчыны еджыдлы. Домнаыдлӧн нинӧмысь абу здрӧгнитӧма сьӧлӧмыс. Со кутшӧм герой ныв вӧлі Домна Каликоваыд!

КЛАВДИ (ӧзъялан чужӧмӧн видзӧдӧ карточка вылӧ). Тайӧ и эм Домнушкаыд! Кывлі коркӧ... Ачыс, видзӧд, кутшӧм на том вӧлӧма... Зверъяс! Этатшӧм нылӧс лыйлӧмаӧсь. Зарни нылӧй! (Малыштӧ карточкасӧ да дыр сы вылӧ видзӧдӧ.) Ыджыд жӧ сьӧлӧмыс талӧн вӧлӧма, весиг еджыдъясысь абу повзьӧма... А ме, коньӧрӧй, Митрей дядьысь пола...

СИМАНОВА. Оз ков повны, Клавди! Тэ ӧд ачыд нин верстьӧ ныв, колӧ нин асшӧрыс тыр морӧсӧн лолыштны.

КЛАВДИ. Ок, кысь бара миянлы! (Сьӧлӧмсьыс.) Вот эськӧ Домна кодьӧсь кӧ ми вӧлім повтӧм сьӧлӧмаӧсь! (Видзӧдӧ карточка вылӧ.)


3-ӧд петкӧдчӧм


МИТРЕЙ (пырӧ, бура код, киас «четверть» вина). Колӧкӧ — извеняйтӧй, колӧкӧ — тодмышкалӧй, а висьталӧй, кӧні менам Клавдюкыс? Больше ничево!.. (Видзӧдӧ Майкова вылӧ, Клавдиӧс оз аддзы. Сы кості Клавди повзьӧ, чуньнас грӧзитӧ-ӧлӧдӧ Симановалы да гусьӧник петӧ женотделысь, шуигмоз: «Пӧръялӧ жӧ бара кыдзкӧ».)


4-ӧд петкӧдчӧм


МАЙКОВА. Тэ нӧ, гражданин, кодӧс татысь корсян? Коді тэ ачыд?

МИТРЕЙ. Ме — Ӧсип Митрей лоа. Корся... Коді колӧ — сійӧс и корся. Мый нӧ, татчӧ пырны сэсся оз позь али мый? (Видзӧдлӧ гӧгӧр.) Кутшӧм нӧ тані тіян заведенньӧ?

СИМАНОВА. Тані — женотдел. Тэ, гражданин, талун гажакодь да вай мун...

МИТРЕЙ. Дерт, буракӧ, ог кольччы... Женотдел, шуанныд, тані? Сідз! (Сувтӧдӧ «четвертьсӧ» Майкова водзӧ пызан вылӧ.) Сідзкӧ, тіян тані женщинаяс эмӧсь и? (Видзӧдлӧ кыкнанныс вылӧ.) А подкодящӧйӧсь, трущӧпаяс, больше ничево! (Перйӧ папирос да куритчыны кӧсйӧ.)

МАЙКОВА (вештыштӧ «четвертьсӧ»). Вай босьт татысь тайӧс да мун. Сэсся тані куритчыны, гражданин, оз позь!

МИТРЕЙ. Папирос ӧд ньӧби, абу макорка либӧ мый. (Ӧзтӧ.) Мунны — муна, дай винаӧс татчӧ ог коль тіянлы, гортӧ катӧда, гӧснеч... Прӧмыс вузалі да вина ньӧби. Клавдюклы сарапан вылӧ сатин босьті вит метра! Пивнӧйын бура дыр сульмуйтім, кутшӧмкӧ тӧварышъяс сюрисны да. Кутшӧм нӧ сійӧ, трущӧпа, карӧ волӧм, он кӧ прамӧя гажмыв?..

МАЙКОВА. Вай, мися, босьт тайӧс татысь, абу лӧсьыд.

МИТРЕЙ. Босьта, босьта, мый сэні теньгыны пондін, абу ӧд тайӧ самӧкур ли мый?.. Збыльысь, оз-ӧ ликмы тіян кутшӧмкӧ подкодящӧй женщина? Видзӧд, менам бабаӧй пӧрысь нин да колӧ эськӧ вӧлі...

СИМАНОВА (дӧзмӧмпырысь торкӧ). Гражданин, мун вай, мун, нинӧм абусӧ тай кутін больгыны! Тан ӧд партийнӧй учреждение...

МИТРЕЙ. Муна, муна, эн сэтшӧма дзезгы!.. Партийнӧй кӧ, ещӧ бурджык... Ме кӧть ачым абу партейнӧй эськӧ да любӧй коммунистӧс верма йӧртны, больше ничево!.. Но, час нӧ муна. (Босьтӧ «четвертьсӧ».) Збыльысь, кӧні нӧ Клавдюкыс менам? Висьталісны тай нӧ татчӧ кытчӧкӧ пырӧмӧн-а? Эз волы?

СИМАНОВА. Некод эз волы.

МИТРЕЙ (сьӧлӧмсьыс). Сё трасича! Часлы, ме сылы петкӧдла. Ещӧ ӧд гӧснеч ньӧби аслыс... Но, сідзкӧ извеняйтӧй, больше ничево!


5-ӧд петкӧдчӧм


КЛАВДИ (ӧдзӧс восьтӧ). Тэ тай тані вӧлӧмыд, дядьӧ?

МИТРЕЙ (скӧрысь). Ме эськӧ тані да, тэ вот кӧні шӧйтан-а?

КЛАВДИ. Тэнӧ корсьны ветлі... Виччыси-виччыси, да дыр эн кут локны, дай ветлі сэсся корсьны: мед эськӧ, мися, эн юсьы да деньгатӧ эн вошты.

МИТРЕЙ (нимкодя). Ай да, пасибӧ, Клавдюк!.. (Мукӧдыслы.) Тайӧ и эм Клавдюкыд менам!.. (Клавдилы.) Но, лок сэсся гортӧ вӧрзьӧдчам, больше ничево! (Петӧ.)

КЛАВДИ (сы бӧрся петігмозыс видзӧдлӧ нӧшта Каликова карточка вылӧ, сэсся нывбабаяслань бергӧдчылӧ да нюммунӧ.) Пасибӧ тіянлы!.. (Дядьыслы гораа.) Этша нин и котралі кар кузяыс!


Занавес.


НЁЛЬӦД ВӦЧӦМ


Коймӧд действиесянь кольӧ во нёль кымын (вӧчсьӧ 1929–30 воясӧ). Став воддза йӧзыслӧн тӧдчӧ пӧрысьмыштӧм. Артип ветлӧма нин Гӧрд Армияӧ, дай бӧр воӧма; Закар дзормыштӧма, Клавди «возмужайтӧма». Митрейлӧн чужӧмыс вежсьыштӧма — син гуранъясас «мешӧкъяс» (юӧмсьыс). Степалӧн унджык чукырыс чужӧмас лоӧма. Вӧчсьӧ Степа ордын (кӧні вӧлі медводдза действиеыс). Керка пытшкӧс тӧдчымӧн вежсьӧма: «енъяс» абуӧсь. Стенас ляскалӧма вождьяслысь портретъяс да сӧветскӧй картинаяс. Пищаль да патронташ важинас на ӧшалӧны. Тувсов лун.


1-я петкӧдчӧм


Милиционер пукалӧ улӧс вылын, пызан дорын, киас кутӧ кабала, пызан вылас папка; кык понятӧй пукалӧны лабичын, пызан саяс моз; Кирӧ да Катя — ӧшинь дорын; Степа сулалӧ пачводз дорын, самӧвар пузьӧдӧ; Митрей джодж шӧрас сулалӧ, зумыштчӧма, лёкиник сукмана да картуза.


МИЛИЦИОНЕР (Митрейлы). Но, вай, Митрей Ӧсипович, кырымась сэсся татчӧ. (Индӧ кабала вылас.)

МИТРЕЙ (букышӧн видзӧдлӧ). Мый бур кузя кырымасьныыс? Вӧтланныд да сійӧн?

МИЛИЦИОНЕР. Ми сӧмын сельсӧветлысь шуӧмсӧ олӧмӧ пӧртам. Тэныд тшӧктӧма татысь петны, керкасӧ кольны Степалы нылыскӧд...

МИТРЕЙ (сьӧлӧмсьыс). Кутшӧм нӧ тайӧ власть ӧні пуксьӧма? Ме тані вит во мырси, гӧгӧр лӧсьӧді, а сэсся менӧ жӧ и вӧтлӧны? Дзик кушӧн, некутшӧм пай оз сетны...

МИЛИЦИОНЕР. Сы йылысь суд разберитчас. Ми эгӧ овмӧс юкны локтӧ.

СТЕПА (Митрейлы). Вит во тэ йирин миянӧс Клавдюккӧд... Ордӧм мыль кодь дзик тэ вӧлін миян овмӧсын...

МИТРЕЙ (Степалы скӧрысь). Мый трустла нӧ эськӧ мунлін ме сайӧ?

СТЕПА (босьтӧ самӧвар вывсьыс трубасӧ). Сьӧкыд вӧлі уджавныыс миянлы мужик морттӧгыс, сійӧн и мунлі... А тэ, отсӧг пыдди, ещӧ ёнджыка торкин олӧмнымӧс. (Пӧльыштӧ самӧвар пытшкӧ.)

КИРӦ. Веськыда кӧ шуны, Митрейыд омӧлик кӧзяин жӧ вӧлі... Эн лӧгась, Митрей!.. Этатшӧм дась бур овмӧс вылад эськӧ позис тэныд красуйтчыныыд да!..

СТЕПА. «Красуйтчис» тай вит во чӧж: смекайтчис-нартитчис миян вылын. Водзӧ сэсся эз нин тырмы терпенньӧным миян да юксьыны лои... Зэв эськӧ быттьӧ йӧзсяньыс абу лӧсьыд, да мый керан...

МИТРЕЙ. Тӧда ӧд, коді ышӧдіс юксьыныыс.

СТЕПА. Коді нӧ ышӧдас? Аслым нин ӧд сьӧлӧмӧдз став лёкыс йиджис, быд сӧнӧдз мӧрччис.

МИТРЕЙ. Закар сайӧ лӧсьӧдчан мунны, больше ничево! Сійӧ и гудраліс.

СТЕПА (серам пыр). Кыськӧ тай эм йӧйыд!.. «Закар сайӧ» пӧ. Весиг и дум вылын сійӧ некор эз вӧв. Муна кӧ ме ещӧ кодкӧ сайӧ коймӧдысь, — вӧлисти эськӧ и лоа пӧслӧвичанад, йӧз серам туяд. Тырмас нин сэсся менам нэм вылӧ.

МИТРЕЙ. Сідзкӧ, Артип-коммунистыд. Салдатад ветліс да вывті нин уна тӧдӧ. Видзчысь, мед нывтӧ сійӧ тэнсьыд эз кокышт-а.

СТЕПА (самӧвар дорын ноксьӧ). Кыті нӧ кутшӧм Артипыс?

КИРӦ. Весьшӧрӧ шуан, другӧ, Митрей. Гӧрд Армиясьыд воӧм бӧрас Артипыд зэв бура кутчысьӧ быд удж дорӧ дай йӧзсӧ босьтчӧдны вермӧ...

МИЛИЦИОНЕР. Кырымась вай, Митрей, миянлы некор кывзынысӧ тіянлысь вензьӧмнытӧ!.. Куим лун мысти тэныд ковмас петны татысь...

МИТРЕЙ. Ме ог кырымась!.. Кушӧн, овмӧсысь пай сеттӧг, ог пет ни, больше ничево.

МИЛИЦИОНЕР. Он кӧ кырымась, сідз олас, сідзи и гижам, понятӧйяс кырымаласны дай шань. (Гижӧ.)

СТЕПА. Пай ковмӧма. Мый нӧ тэ лӧсьӧдлін миян овмӧсас? Кушӧн волін — кушӧн и мунан. (Тшайникӧ тшай пуктӧ да заваритӧ.)

КИРӦ «Прикод-рӧскод верен», кыдз важӧн шулас вӧлі писарыд.

МИЛИЦИОНЕР (понятӧйяслы). Вайӧ нӧ кырымалӧй тайӧ приказсӧ, гижсьӧй со этатчӧ. (Понятӧйяс кырымалӧны.)

МИТРЕЙ (бокӧ). Часлы, Клавдюкыд ме сайын ӧні лоас да, став овмӧсыд на бӧр меным веськалас!.. (Гораа.) Да ӧд и гортад оз позь пырны ни: бать кулӧм мысти став овмӧссӧ вокъяс юкисны... Кук-ку пукты тай коли, буракӧ, ме!.. Ог мун, больше ничево!..

КИРӦ (Катялы). Ми нӧ тэкӧд, Катя, огӧ на торйӧдчӧ?

КАТЯ. Митрей мозыд кӧ кутан юны да карапужитчыны, регыд и тэ на аддзан туйтӧ. Ӧні тай со абу дыр торйӧдчыныыд... Милиционерыд локтас, кырымӧдас дай ушывайтчы ме дінысь!..

МИЛИЦИОНЕР (Катялы). Ми асьным некодӧс огӧ вермӧ юкны, ми толькӧ пӧрадок лӧсьӧдам... (Чеччӧ да гартӧ папкасӧ.) Но, мунам сэсся!.. (Митрейлы.) Мед мӧдысь эз ковмы волыны сэсся мырдӧн тэнӧ татысь вӧтлыны; куим лун мысти пет, Митрей, тайӧ керкасьыс! (Лӧсьӧдчӧ мунны, понятӧйяс тшӧтш лӧсьӧдчӧны мунны.)

МИТРЕЙ. Бӧрвылас аддзам, мый вӧчны... Тіян вылӧ права корсьлам на, больше ничево!..

СТЕПА (лӧсьӧдалӧ чашкаяс, стӧканъяс. Милиционерлы). Эн на мун, тшайсӧ юам да вӧлисти.

МИЛИЦИОНЕР. Некор, Степанида, колӧ на ещӧ гоз-мӧдлаӧ пыравны... Прӧщайтлӧ! (Петӧны.)


2-ӧд петкӧдчӧм


МИТРЕЙ (пуксьӧ лабичӧ, пызан помас). Да ӧд вит во чӧжӧн ме мыйкӧ тані уджавлі жӧ, нажӧвитлі жӧ? Кыдзи нӧ друг сэсся вӧтлыны кӧзяинӧс?

СТЕПА. Тэ кодь «кӧзяиныд» толькӧ падмӧдӧ олӧмсӧ. Мый нӧ тэ нажӧвитлін, висьтав? Дась овмӧс вылас на пыр ыджыдавлін. Ӧти гыж пом ыджда добра ӧд вит воӧн эн лӧсьӧд! Уджавнысӧ медъёнасӧ миянлы эня-нылалы пыр сюрліс. А тэ мый нажӧвитлін — сійӧс и сысъялін самӧкурӧн да винаӧн... Ланьт нин лучшӧ!..

КИРӦ. Кыдзи нӧ эськӧ олан тэ сэсся, Степа, мужиктӧгыд? Овмӧсад ӧд бура уналаӧ на ковмывлӧ мужичӧй киыд. Ті ӧд эня-ныла онӧ жӧ вермӧ став уджсӧ асьныд вӧчны?

МИТРЕЙ. Метӧг кыкнанныс пӧгибӧ воасны, больше ничево!

СТЕПА. Пӧгибсьыс ӧні, слабог, мынім да, кыдзкӧ олам нин... Бур йӧз отсаласны... Сэсся Клавди вылӧ надеяӧн да...

МИТРЕЙ (торкӧ). Клавдюкӧс эн лысьт, Степа, сьӧкыд удж вылӧ кесйӧдны! Сы вылын менам лоӧ вӧляыс!!. Тэысь кӧ мыні, ӧні сэсся ме Клавдюккӧд овмӧдча, больше ничево! Кылад?..


Ставныс чуймӧны.


КИРӦ (шензьӧмӧн). Митрей, тэнад нӧ юр вежӧрыд эз на кок пыдӧсад лэччы? Шуан жӧ, другӧ, нинӧм абусӧ! Кысь нӧ сійӧ Клавди тэкӧд ӧтлаасяс?

СТЕПА (сералігмоз). Сёр нин ӧні, он нин удит смекайтчыныыд!..

МИТРЕЙ. Ньӧти ог шу смекайтчӧм кузя. Веськыда кӧ шуны, ме тайӧ овмӧсас эг Степа вӧсна пырав. Клавдюкыс вӧлі сьӧлӧм вылӧ воӧ да, сійӧн. Ме ачым нин вӧлі кӧсъя торйӧдчыны Степакӧд. Ӧні сійӧ ачыс кӧртӧдсӧ разис... Вит во чӧж ме виччыси Клавдюкӧс, вӧлисти кадыс воис.

СТЕПА. Тӧда ӧд: ставсӧ меным Клавди висьтавліс... Абу и яндзим тэныд?.. Да ещӧ, кыдз шуласны, тырмылӧма на молитваным да, загрекиыд миянӧс ӧнӧдз эз су! (Скӧрысь.) Мун менам керкаысь, да мед сэсся кок помыд некор эз вӧв!.. Яндысьтӧм син!

МИТРЕЙ. Тэ ме вылӧ лысьтан тадзи горзыны, трасича?.. Весиг милиционер куим лун строк сетіс, а тэ грӧзитчан ӧні вӧтлыны? Нӧрӧвитла на! Уна на вежсяс тайӧ куим луннас, видзӧдлан тон ачыд!.. Клавдюк локтас да, ставыс мӧдарӧ путкыльтчас!

СТЕПА (вайӧ пызан вылӧ самӧвар, нянь да мый да). Нинӧм оз ло!.. (Кирӧлы да Катялы.) Кирӧ, Катя, топӧдчӧ вайӧ пызанланьыс, пуксьӧй!..

КИРӦ. Зыксянныд да, быттьӧ абу и лӧсьыд тшайтӧ юны.

СТЕПА. Пуксьӧй, пуксьӧй, нинӧм видзӧдны та вылӧ... Кӧнкӧ тай дыр кутіс Клавдиыс ветлыны да, сытӧг нин юам.

КИРӦ. Сійӧ ӧд лыддьысян керкаад, кӧнкӧ, муркӧдчӧ. Час инӧ, ӧти стӧкан юа. (Кӧсйӧ юрбитны да енсӧ оз аддзы.) Но, тіян тай ен джадж ни нинӧм нин абу? (Сідз пуксьӧ пызан саяс.)

СТЕПА. Тӧрыт ставсӧ идраліс Клавди, кытчӧкӧ кумӧ петкӧдліс. Ог тӧд, мый сэсся лоӧ. Шуӧ тай: енъясыд пӧ быттьӧ прӧстӧй пӧвъяс, некутшӧм ен пӧ некӧн абу... Пуксьы, Катя, пӧсь васӧ ю! (Катя пернапасасьӧ да матыстчӧ пызанлань.)

МИТРЕЙ. Менӧ нӧ он нин и морт пыдди пукты?.. Вай кисьт, больше ничево!

СТЕПА. Вывтісӧ, Митрей, эн нин ме вылын ӧні камандуйт! (Кисьтӧ.) Талунъя луныс кузя юктала. На, ю!

КАТЯ. Первойсяньыс колі, Степа, тадзи Митрейтӧ кутны, эз ков полӧм улад лэдзчысьлыны! Сэки эськӧ, колӧкӧ, энӧ юксьӧмӧдзыд волӧй...

МИТРЕЙ. Степа кӧ эз юксьы, ме ӧд ачым эськӧ торйӧдчи жӧ да Клавдюккӧд ӧтлааси.

СТЕПА. Со ӧд кутшӧм да, кыдз сэсся такӧд олан? Сьӧд понлы еджыд гӧныд оз нин пет. Юӧй, видлӧй няньсӧ, мыйкӧ эськӧ еджыд сора да, эз жӧ мичаасӧ ловзьы... Артип гозъя кӧсйисны воны да, пӧжышті...

КАТЯ. Гӧтрасьӧма нин ӧмӧй Артипыс? Кор нӧ? Кодӧс вайӧма?..

КИРӦ. Тӧрыт, зонмӧ, гӧтыртӧм на вӧлі сійӧ.

СТЕПА (нюммунӧ). Ӧні абу ӧд дыр: мунін да гижсин дай ставыс... Талун вӧлі гижсьыны кӧсйӧ.


3-ӧд петкӧдчӧм


ЗАКАР (пырӧ мичаа вӧччӧма). Здорово, тшай-сакар! С праздником!

СТЕПА. Лок, Закар. Самӧй кузь кокыд тэнад... Пуксьы лок, пӧсь ва миянкӧд юам.

ЗАКАР. Пасибӧ, Степанида Петровна! Ме буретш самӧвар сайсянь ӧні локті... Митрей Ӧсипович тай тані на жӧ? (Пуксьӧ лабич помӧ.)

МИТРЕЙ. Кӧні нӧ меным колӧ лоныыс сэсся, гортысь ӧприч?

ЗАКАР. Мыйкӧ тай Ӧньӧ Педӧр паныдасис да висьталӧ: быттьӧ пӧ волӧма милиция тэнӧ вӧтлыны Степанида Петровна керкаысь. Ачыс Педӧрыс понятӧй пыдди тіянӧ волӧма... Ме сэсся нимкодьпырысь татчӧ локті. Степанида Петровнаӧс поздравитны...

МИТРЕЙ (лёкысь). Ещӧ мыйкӧ он-ӧ шу, трасича!.. Ветлан, шӧйтан, чӧртыс новлӧдлӧ тэнӧ! Ме вот босьта да сэтшӧма «поздравита», больше ничево!.. Тэнад тайӧ уджыс, тэ сюйсин пеж нырнад миян костӧ?.. Степа ковмӧма тэныд, еретниклы!..

СТЕПА. Эн сӧр нинӧм абусӧ, Митрей! Ичӧтикасӧ кӧть колӧ жӧ яндысьны йӧзсьыс...

МИТРЕЙ. Со тай, жӧниктӧ дорйыны кутін! Тӧда ӧд, важӧн нин тӧда, вит во чӧж ме тіянлысь шашнияснытӧ видзӧді...

КИРӦ. Мый сійӧ, Митрей, бызгыны? Тэ, другӧ, збыльысь шӧйӧвошны пондӧмыд, да ачыд нин он тӧд, мый и сӧран.

МИТРЕЙ (ставныс вылӧ лёкысь). Ті уна тӧданныд, трасичаяс! Вот эськӧ босьт да ставнытӧ пасьварт, больше ничево!..

ЗАКАР. Сы вылӧ, Митрей Ӧсипович, ӧні тэнад абу нин вӧляыд... Степанида Петровна ӧні ачыс сполнӧй кӧзяйка!.. Весиг меным тшӧтш нимкодь; вит во чӧж ӧд ме сійӧс виччыси... Слава тебе, господи. (Пернапасасьӧ.) Вӧлисти сійӧ тэысь мездысис!..

СТЕПА (сьӧлӧмсьыс). Мездыси кӧ, Закар, эг ӧд тэ вӧсна. Нылӧй менӧ кыскис татшӧм лёк гыбадсьыс. Пасибӧ Клавдюшлы!.. Эз жӧ тай весьшӧрӧ вош сылӧн нигаястӧ лыддьӧмыс да комсомолад пырӧмыс... Тэ, Закар, эн и думайт весиг сы йылысь, ыштӧ ме ещӧ кодкӧ сайӧ лӧсьӧдча мунны.

ЗАКАР (чуймӧ, повзьӧмӧн сувтӧ). Степа, мый нӧ тэ шуан?.. (Локтӧ да пельпомӧдыс кутӧ.) Он ӧмӧй ме сайӧ мун?

СТЕПА (нетшыштсьӧ). Мый нӧ тэ, Закар, йӧймин али мый? Ме ӧмӧй кыв сетлі коркӧ, кӧсйысьлі тэ сайӧ мунны али мый? Мун, вешйы ме дінысь!

ЗАКАР (аслыс скӧрысь). Но, трасича! Оз ӧмӧй сюр тайӧ овмӧсыс менам кипод улӧ? (Кевмысигмоз.) Степа, Степуш... Вит во ӧд ме тэнӧ виччыси, быдса вит во чӧж... Кывзы, Степанида!..

СТЕПА. Кӧть дас витӧс ещӧ виччысь, ог мун!.. Ланьт сёрнинад! Да кыдзи нӧ абу яндзим?

МИТРЕЙ (Закарлы жеръялӧ). Босьтін? Проздравляйта, Закар Макарӧвич!..

ЗАКАР (жугыля бӧр пуксьӧ важ местаас). Мыйла нӧ он мун, Степанида?

КАТЯ (Закарлы). Мый нӧ тэ сэні сэсся, Закар, дзезгыны пондін, трустӧс? Оз мун дай ставыс...

КИРӦ. Кыдз шуласны, косӧма-бергӧдчӧма тэнад невестаыд.

ЗАКАР (на вылӧ). Тіянӧс кӧ оз юавны, нинӧмла шыасьныс! Ме Степанидалысь юала.

СТЕПА. Ме тай сідзи жӧ шуа: ог, мися, мун дай ставыс!.. Мый трущӧпасӧ ме тэ сайысь аддза? Кык мужиккӧд тай аслам нэмын олі-а, сэсся шань.

ЗАКАР. Сідзкӧ, прӧстӧй надея вӧлӧма. Кутшӧм окота на вӧлі меным гӧтырӧн олыштны, да оз нин, тыдалӧ, удайтчы...

КИРӦ. Оз нин, пӧжалуй, Закар, нинӧм пусьы. А томулов оз зевайтны: тэ эн на кывлы — Артип пӧ гӧтрасьӧма?

ЗАКАР. Быд шалопай йылысь и тӧдныыс весиг оз ков! Артипыд сэтшӧм незгӧдник-коммунист вӧлӧма! Весиг ме вылӧ кутіс кавшасьны. Шуӧ: тэ пӧ кулак. Сы вӧсна меным таво вылӧ вот сюйӧмаӧсь квайтымын шайт. Рӧзӧритісны менӧ дзикӧдз. Мед эськӧ Артипыд и ставныс сэні му пырыс мунасны!

КИРӦ. Тэ он на рӧзӧритчы, Закар. Видз-муыд тэнад медбур, ачыд он уджав — медӧн ставсӧ уджалӧны тэныд, дай казакӧс видзан, дерт, он шу тэнӧ гӧль крестьянинӧн либӧ шӧркоддьӧмаӧн, кулак и эм тэ.

КАТЯ (Кирӧлы). Эн вывті сэні вомтӧ жеркйӧдлы, Кирӧ! Пыдынджык видз кывтӧ, судӧ сюран мыйсюрӧтӧ больгӧмсьыд...

ЗАКАР (скӧрысь Кирӧлы). Кыдзи нӧ тэ лысьтан менӧ кулакнас укӧрайтны, а? Уджӧда кӧ йӧзӧс — ог прӧстӧ, аслам зептысь жӧ сэтчӧ петӧ.

КИРӦ. Кокньыда жӧ ӧд и пырӧ зептад, оз на зэв коскад сюй.

ЗАКАР. Кӧзяйка кӧ эськӧ менам вӧлі, сэки нӧ, гашкӧ и... Ӧні ӧд весиг и казакӧй абу: тӧрыт муніс артельӧ уджавны... Артипыд гудралӧ ставсӧ, артельсӧ пӧ сійӧ лӧсьӧдӧма и.

МИТРЕЙ. Мый шуан, Закар? Казакыд тэнад муніс?

ЗАКАР. Муніс тай, кузьясыс кыскисны, трустӧс!

МИТРЕЙ (нимкодя). Босьт вай менӧ казакад, Закар!

ЗАКАР. Эн серав, Митрей Ӧсипович.

КИРӦ. А мый? Мортыс ӧні ослободитчис жӧ татысь да, зэв позяс.

МИТРЕЙ. Збыльысь шуа: босьт, он ӧд ворссьы. Но, вай китӧ, больше ничево! (Чургӧдӧ кисӧ Закарлань, Закар оз вӧрзьӧдчы — мӧвпалӧ. Митрей бӧр кыскӧ кисӧ.)

КАТЯ (сералігмоз). Пӧдлинӧ, Закар, босьт и эм! Степасӧ пыдди мужиксӧ сылысь вай, дай артманныд. Орччӧн ӧти вольпасьын узьлыны кутанныд и быдтор.

КИРӦ. Ланьт, баба, эн жеръяв, кут ассьыд кузь кывтӧ пыдынджык!


4-ӧд петкӧдчӧм


Пырӧны Артип да Клавди. Артиплӧн ичӧтик ус нин эм; паськӧмыс гӧрд армееч формаа, шынеля, кодзула картуза, сапӧга, галифе гача. Клавди вылын лӧз ной жакет, сапожки, прӧстӧй чышъяна.


КЛАВДИ (пырӧмӧн тшӧтш). Но, миянын тай гӧстьяс пукалӧны? Здорово ставныдлы! (Пӧрччысьӧ.)

АРТИП. Чолӧм-здорово! Тшай да сакар тіянлы! (Пуксьӧ кузьмӧс лабичӧ, краснӧй ӧшинь дорӧ.)


Ставныс пырысьяслы чолӧм быттьӧ видзӧны.


СТЕПА (чеччӧ). Муртса эгӧ удзӧдӧ тіянӧс. Зэв тай нӧ мыйкӧ дыр?.. (Вайӧ выль чашка, стӧкан да няньсӧ содтӧ, кисьтӧ тшай.)

АРТИП. Сійӧ ӧд виччысигад дыр кажитчис... Регыд эськӧ быттьӧ лои да...

СТЕПА. Но, вай жӧ пуксьӧ да юӧ сэсся тшайсӧ.

КЛАВДИ (Артиплы). Пӧрччысь, Артип, да пуксьы. (Ачыс пуксьӧ Катякӧд орччӧн.)

АРТИП. Ладнӧ. Тэ тай, Клавдия, зэв ӧдйӧ тэрмасин?.. (Пӧрччысьӧ.)

КЛАВДИ. Кынӧмӧй нин сюмаліс лунтырнад да. (Сёйӧ.)

МИТРЕЙ (меліакодь). Но, Клавдюк, ӧні сэсся и миянлы тэкӧд позяс сёрнитыштны.

КЛАВДИ. Мый йылысь нин, дядьӧ?

МИТРЕЙ. Кутшӧм нӧ ме тэныд, Клавдюк, дядь?.. Эн нин сэсся ӧні шу сідзи менӧ... Мамыд меысь ӧні торйӧдчис, ме коли вӧльнӧй птица кодь... Вай жӧ висьтав, Клавдюк, ӧні став дырйиыс: мунан он тэ ме сайӧ?.. Висьтав, эн пов, больше ничево!


Унаӧн прыськӧбтӧны-серӧктӧны.


КЛАВДИ (чеччӧ сералігтырйи). Ок, менам ӧд и вуні пыригӧн висьтавныыс. (Босьтӧ Артипӧс сойбордйӧдыс да локтӧны пызан дорӧ кыкнанныс.) Сёрмин, дядьӧ!.. (Ставныслы.) Ми Артипкӧд талунсянь гозъя: Артип — менам верӧс, ме — сылӧн гӧтыр!.. Сёйӧй да юӧй! Тайӧ миян ставыс — свадьбаыс и пирыс... Пуксьы, Артип...


Пуксьӧны кыкнанныс.

Ставныс бура дыр кежлӧ шемӧс кольлӧны: Митрей вомсӧ паськӧдӧмӧн сулалӧ; Закар чеччӧ да гӧрбыльтчӧмӧн, зэв сюся выль гозъя вылӧ дзоргӧ, щӧкасӧ водзӧ чургӧдӧмӧн. Степа зэв паськыда нюмъялӧ.


СТЕПА (Артип гозъялы). Ме ӧд тайӧяслы нинӧм на эг висьтав, асьныд ті сідзи тшӧктінныд да.

КИРӦ (Катялы). Вай жӧ, Катя, ми татысь петам, мед пуксясны татчӧ ичмонь гозъяыс. (Сувтӧны, петны кӧсйӧны.)

КЛАВДИ. Пукалӧй, пукалӧй сэні, ӧткодь ӧд... (Кирӧ гозъя бӧр пуксьӧны да шпыннялӧны, корсюрӧ видзӧдлӧны Артип гозъя вылӧ.)

МИТРЕЙ (йӧй кодь). Мый нӧ тайӧ лои?!. Збыльысь ӧмӧй тэ, Клавдюк, мунін Артип саяс?

КЛАВДИ. Збыльысь, дерт. Мый сэтшӧма повзин?

МИТРЕЙ. Ог верит!.. Ог верит, больше ничево!..

АРТИП. Он кӧ верит, ветлы да волисполкомысь юав. Талун ми сэні Клавдикӧд гижсим.

ЗАКАР (аслыс). Тьпу! Татчӧ нин незгӧдникыд сюйсьӧма. Слӧймас тай, трасича.

КИРӦ. Мися, кутшӧм Артип гозъяӧс бара виччысьӧ Степаыд? Со, вӧлӧм, кодъяс!.. Проздравляю законным браком!

КЛАВДИ. Пасибӧ!

ЗАКАР (копрасьӧ). Ме тшӧтш проздравляю!..

КИРӦ (Закарлы). Тэ, Закар, мӧд проздравляйтӧмӧ нин талун веськалін.

МИТРЕЙ (скӧрысь Клавдилы). Кыдзи нӧ тэ, Клавдюк, стерво, лысьтін мунныыс Артип саяс? Ме нӧ мый вӧлі?! (Камгӧ пызанӧ). Оз ло сідзи! Ог верит! Сё лешак, больше ничево!

КЛАВДИ (чорыдакодь). Эн тані ёрччы, Митрей, абу лӧсьыд!.. Лоӧма нин ӧні да, кысь босьтан... Ме ас вылын ачым ыджыдыс. Нэм чӧж ӧд он жӧ сэсся тэ миян вылын ыджыдав. Тырмас, терпитім нин, шу, вывті дыр тэнӧ!

АРТИП. Кад нин сэсся неуна и ляпкӧдчыштны!

МИТРЕЙ (Артиплы). Тэ эн шыась сэні! (Клавдилы.) Мый нӧ тэ вӧчин? Вит во чӧж ӧд ме тэнӧ, трасичаӧс, виччыси — видзи да дӧзьӧриті, а тэ Артип сайӧ босьтӧмыд да мунӧмыд?!

КЛАВДИ. Вит во чӧж тэ ме бӧрся вӧтлысин, быд воськов кыйӧдін, вит во чӧж жӧ ме тэысь мынтӧдчи да вӧлисти ӧні сэсся мыні.

СТЕПА. Дай ме вит во чӧж мучитчи да мыні! (Клавдилы.) Милиционер воліс ӧнтай да тшӧктіс дядьыдлы петны миянысь.

КЛАВДИ. Сы пыдди ми кутам тані овны куимӧн. Ми сідзи и висьталім исполкомын. (Ставныслы.) Оз ков некор полӧм улӧ лэдзчысьны! Ми мамӧкӧд вывті таысь повлім да, гашкӧ, сійӧн и олӧмыс эз вӧв. Сэсся менам мывкыдӧй вежсис карӧ медводдзаысь лэччылӧмсянь. Мыйӧн вӧлі повны кута, думышта Каликова Домна йылысь, дай бырӧ вӧлі полӧмӧй. Ӧні, дерт нин, повтӧг кутам овны. Нывбабаяслы оз ков полӧмӧн овны!

ЗАКАР. Сідзкӧ нӧ, Степа, меным нинӧм нин тэ вылӧ и надейтчыны?.. Аттӧ! Вит во чӧж ӧд ме сьӧлӧм бердын тэнӧ видзи...

АРТИП (Закарлы). Тэнад ӧд кулак сьӧлӧмыд — кын сьӧлӧм.

ЗАКАР. Менам кын сьӧлӧм?.. Ок тэ, незгӧдник!

КИРӦ (Артиплы). Сылӧн ещӧ и казакыс тӧрыт пышйӧма, да дзик нин сьӧлӧмыс йизис.

АРТИП. Тӧдӧмысь. Батракъясӧс вермим ӧтувтны да, дерт, абу зэв нимкодь кулакъясыдлы.

ЗАКАР. Рӧзбойникъяс! Ті менӧ рӧзӧритны-помавны кӧсъянныд. Сідз нин ӧд дзик ӧтнамӧс колинныд.

КАТЯ. Митрейтӧ босьт, вӧзйысьӧ тай мортыс казакад.

АРТИП. Збыльысь вӧзйысьӧ, али мый?

МИТРЕЙ (лэптӧ юрсӧ скӧрысь). Мый нӧ кӧть и вӧзйыся?.. Дай пыра Закар ордас... Босьтан, Закар?

ЗАКАР. Лок, босьта бара! Тэнӧ? Рад босьта, другӧ!

АРТИП. Зэв тай лӧсьыда артмис: тэ кодь идӧртӧм, юысь «кӧзяиныд» буретш кулаклы отсасьысьӧ и згӧдитчас, сэсся нинӧм!

МИТРЕЙ. Тэ эн на сэтшӧма серав, молокосос! Ми Закаркӧд бергӧдам на ставсӧ мӧдарӧ банӧн! (Петӧ пызан сайысь.)

ЗАКАР. Тіянӧс, коммунистъясӧс, топӧдлам на ми тшемилӧ костӧ, помнитлӧй!

АРТИП. Вынныд оз судзсьы тіян!

МИТРЕЙ (скӧрысь босьтӧ чашка блюд, шыбитӧ джоджас да кокнас талялӧ). Со кыдзи ми тіян кодьсӧ и варкӧдам, больше ничево!

ЗАКАР (тшӧтш талялӧ блюдсӧ). Веськыда нырам, трасичаясӧс!.. Коз пу йылӧ увлань юрӧн тоньгӧдам ставнытӧ!

КЛАВДИ. Нолтӧ ті, кык друг, ӧвсьӧй сэсся, энӧ сэтшӧма рӧзбушитчӧй миянын. (Митрейлы.) Эн на тэ лӧсьӧдлы блюдсӧ жуглыныыд! Эн дур!

КАТЯ. Мед!.. Шуласны тай: свадьба вылын кӧ пӧ дозмуктӧ жуглан, шудаджыка гозъя пондасны овны. Тайӧ ӧд бур водзӧ.

МИТРЕЙ (скӧрысь). Ме недӧкмыштӧ тайӧ блюдсӧ, асьнытӧ тіянӧс пасьварта ставнытӧ!

ЗАКАР. Резьӧдлам на тіянлысь овмӧснытӧ, ставсӧ асланым бала вылӧ зэвтам. (Митрейлы.) Лок, Митрей, мунам ме ордӧ, али кольччан на?

МИТРЕЙ. Ог жӧ кольччы коммунистъяс пӧвстӧ! Муна!.. (Аддзӧ пищаль.) Час, босьта кӧть тайӧ «крымкасӧ»! (Кӧсйӧ судзӧдны.) Згӧдитчас на...

СТЕПА (кутӧ). Эн на тэ сійӧс лӧсьӧдлы, эн вӧрзьӧд!

МИТРЕЙ. Мый нӧ, ме вит вонас нинӧм эг лӧсьӧдлы, али мый?

СТЕПА. Мыйкӧ кӧ лӧсьӧдлін, босьт ассьыд кӧлуйтӧ, а йӧз добра вылӧ эн нюжйӧдлы китӧ!

МИТРЕЙ. Но, сідзкӧ нинӧм, тэ ногӧн, эг и лӧсьӧдлы? А лямпасӧ ме эг лӧсьӧдлы, али мый?.. Вай менсьым лямпаяссӧ дай койбедьсӧ тшӧтш, больше ничево!

КЛАВДИ. Сет, мамӧ, мед нуас сьӧрсьыс! Кум ӧдзӧс дорын тай сулалӧ.


Степа петӧ.


5-ӧд петкӧдчӧм


АРТИП. Мый аслас эм — ставсӧ колӧ сетны, мед сылӧн татчӧ волан туйыс тупкысяс.

МИТРЕЙ. Ог и лок рӧзбойникъяс дінӧ!

КЛАВДИ. Эн и лок, нинӧм сэсся тэныд татысь и корсьныыс!

КИРӦ. Няйтсӧ толькӧ кыскаласны джодж тырыд...

МИТРЕЙ (Кирӧ вылӧ). Тэ, Кирӧ, на дор жӧ сулалан? Ачыд ещӧ друг морт вӧвлін-а.

КИРӦ. Ылыс друг жӧ вӧвлі. Мый толькӧ ӧти сиктын олам да коркӧ ӧти чӧс туйӧд кыйсьывлім, а сэсся нинӧм жӧ торъя другъясӧн эгӧ вӧвлӧ ми тэкӧд.


6-ӧд петкӧдчӧм


СТЕПА (пыртӧ лямпа гоз да койбедь. Чӧвтӧ джоджас). Босьт, ну! (Митрей босьтӧ шуйга киняулас лямпаяссӧ, веськыд киас койбедьсӧ.)

КЛАВДИ (Артипкӧд чеччӧны). Мун да Карзан кыр йывсянь шливкнит-исковт сэсся лямпанад: лымйыс эм на кӧнсюрӧ бӧрӧзда гуранъясас, кытчӧкӧ ӧд воан на, гашкӧ.

МИТРЕЙ (ырыштчӧ Клавди вылӧ койбедьнас). Сутшка вот морӧсад курвалы, дай больше ничево! (Сы дінӧ уськӧдчӧны Степа да Артип да мырддьӧны бедьсӧ.)

АРТИП. Тэ нӧ мый пондін сэсся тані карапужитчыны? Мун, другӧ, татысь сідзкӧ! Клавдиӧс эн лысьт вӧрзьӧдны некор!

СТЕПА. Дурмис тай дзикӧдз!

КЛАВДИ (босьтӧ Артип ордысь койбедьсӧ да шӧри чегӧ). На! Мун со койбедь бӧрсяыд ачыд сэсся тшӧтш! (Восьтлӧ ӧдзӧс да шыбитӧ бедь торъяссӧ посводзӧ.)

КИРӦ. Кыдз шуласны, по шею да гож водзӧ!

МИТРЕЙ (водзсасьӧ Артипкӧд, лёкысь сералӧ). Тэ менӧ вӧтлыны кӧсъян? Тэ ӧд муртса на татчӧ кок пӧвтӧ сюйин, а ме Клавдикӧд нёль во нин гӧтыркӧд моз олі. Тэ ӧд менам свӧяк, тӧдан кӧ, больше ничево!..

КЛАВДИ (скӧрысь). Мый нӧ тэ сэні лӧжсӧ сӧран? Эстшӧм кывъяс лысьтан ме вылӧ шуны? (Кутчысьӧ Митрейӧс тойлавны.) Мун миянысь, лёк кулиган! Тэнад ӧд некутшӧм яндзим нин, тыдалӧ, абу.

АРТИП. Лёкысла сідз шуасьӧ, оз нин тӧд, мый керныыс да... Мун! Лякӧсьтчыны весиг тэ дінӧ эськӧ нинӧмла да... Мун!

СТЕПА (тшӧтш кутчысьӧ). Мун, пеж горш, миянысь!

МИТРЕЙ. Бурӧн ог мун!.. (Друг горзӧ.) Ой, караул!.. Караул, вины кутісны!..

КЛАВДИ. Эн горзы, полокалӧ!

ЗАКАР (кутчысьӧ дорйыны Митрейӧс). Лэччысьӧй. Энӧ ӧбӧдитӧй менсьым другсӧ!.. Нолтӧ, Митрей, ӧдӧбтылам ӧтвылысь!.. Но-о-о! (Ноксьӧны ставныс, кашкӧны, ружтӧны.)

КИРӦ (чеччӧ да тшӧтш отсалӧ вӧтлыны Митрейӧс да Закарӧс). Но? Ті тай прамӧйӧдз косясьны кутінныд? Митрей, Закар, лэччысьӧй!..

КАТЯ (тшӧтш локтӧ). Силитчисны тай, збыльысь! Тодмышкавны колӧ, чужъявны кыкнаннысӧ.

АРТИП. Ушывайтчӧ жӧ вайӧ татысь, кык друг, весасьӧй! Шагом марш! (Закарӧс да Митрейӧс тойлалӧ ӧдзӧс сайӧ. Сы бӧрся петӧны тшӧтш: Клавди, Кирӧ да Катя. Посводзын бура дыр грымӧдчӧм да увгӧм кылӧ.)

СТЕПА. Вӧлисти, тыдалӧ, мынім мисьтӧм чужӧмысь! Вот сё чудесаыс!

АРТИП (пырӧ, босьтӧ лямпаяссӧ да шыбитӧ посводзас). Налӧй, босьтӧй морт ӧти лямпа пӧлӧн да исковтӧй кыкнанныд Карзан гуранас, кытчӧдз онӧ турбыльтчӧй! (Сайын кылӧ Кирӧлӧн да Катялӧн серам).

МИТРЕЙ (сайсянь). Помнитланныд ті, рӧзбойникъяс! Тшынйыв ставсӧ лэптам, больше ничево! (Босьтчӧ сьывны.) «Последней нӧнешнӧй денёчек»...

АРТИП. А, дерт нин, ӧні «последней денёчекъяс» тіянлы воисны!


Мукӧдыс пырӧны.


Занавес.

Гижысь: 
Нёбдінса Виттор
Гижӧд
Парма ныв
Жанр: 
Драма
Гижан кад: 
1929ʼ во
Ӧшмӧс: 
Вабергач (1982)

lkejrlkelkrgner klrjnelknfrkl ekjnrjkenfrej

1