МЕД ЛЭБӦНЫ...
Рем Ермолинлы          

Кад, сідзкӧ, лэбны!
Туйыс восьса, восьса!
И дзодзӧгъяс — кӧть ывла вылыс нор —
И лун тӧвлы, и кымӧрыслы воча
Кузь туйӧ мӧдӧдчисны рытладор.

Мед лэбӧны! Печора шуньгӧ водзӧ
Да вуджӧрнысӧ катлӧдлӧ со тшӧтш.
А кымын вуджліс сылысь отсӧ дзодзӧг
И этатчӧ, и татчӧ! Абу тшӧт.

Мед лэбӧны! Но содӧ менам эскӧм,
Мый чужан вӧр-ва оз вун налӧн, оз.
Ёсь горзӧмсьыныс сьӧлӧмӧйлы дзескыд —
И ӧвта налы ёртъясӧйлы моз.

Мед лэбӧны! И нинӧм мед оз дугӧд,
И некод мед оз торк ни лёкӧс кер.
Ӧд бордъяс йылын — татчӧс шонді югӧр,
Ӧд бордъяс улын — татчӧс мулӧн сер.

Мед лэбӧны! Ӧд радейтӧмсӧ пестӧ
И янсӧдчӧм, код мичӧдӧ жӧ нэм.
Россия весьтӧд, менам Кыдзкар весьтӧд
Со лэбӧны. А мыйла кокни мем?