ПРАЗДНИК

Тэныд воча нуис менӧ туйыс,
Нуис менӧ кодзув дінӧ моз,
Тэкӧд менӧ вочаӧдіс тулыс,
Бӧрсӧ оз нин янсӧд сійӧ, оз.

Быттьӧ менӧ лэптін вылӧ-вылӧ,
Нюмъёвтін, сьӧд синмаӧй, тэ кор.
Ковтӧмторйыс сьӧлӧм вылысь сылӧ,
Радейтнытӧ некор абу сёр.

Вӧр-ва шыыс пырис менам лолӧ —
Лёксӧ вӧтлысь медся сӧстӧм шы.
Мед нӧ миян пытшкӧсаным олӧ
Тулыслӧн да радейтӧмлӧн гы.

Тэрыб бордъя вояс лэбовтӧны,
И дзик быдӧн кольӧ ассьыс пас,
Налы паныд орччӧн мунам ӧні:
Мен тэ ас, и ме тэн лои ас.

Чышъян помтӧ кисьыд нетшкӧ тӧлыс,
Сӧмын сійӧ кыдзи кӧть оз дур, —
Аддза тэнӧ. Кыла тэнсьыд гӧлӧс.
Мен и тэныд — кыкнаннымлы бур.

Восьса синмӧн аскисьыс не повны,
Восьса сьӧлӧмысь оз кусав би,
Кыдз нӧ ӧта-мӧдтӧг вермим овны,
Талунӧдз эг вочаасьлӧй ми?