И БАРА, БАРА...

И бара, бара шпоргӧ коръя вӧр,
И бара, бара гожӧм локтӧ воча.
Тэ некор дзик эн няргыв, сьӧлӧмшӧр,
Кӧть олӧмыс тэн нюмъявліс зэв шоча.

И бара, бара ӧддзис парма ёль,
И бара, бара востымасьӧ юыс.
Тэ ковтӧмторсӧ сы йылысь он доль,
Мый верӧстӧ лёк война мырддис-нуис.

И бара, бара енэж сэтшӧм лӧз,
И бара, бара шонді качис вылӧ.
Тэ ачыд аснад — му выв лёклы грӧз,
И туйвеж тэнӧ ӧні оз нин ылӧд.

И бара, бара вӧччӧ чужан му,
И бара, бара олӧм бурыс лыбӧ.
Тэ олӧм пудтӧ он нин этша ну,
Но бурсӧ он куш артав вояс лыдӧн.

И бара, бара шпоргӧ коръя вӧр,
И бара, бара гожӧм пырӧ лолӧ.
Тэ — нывбаба,
Тэ — олӧмыслӧн шӧр,
Мед быдтор вӧчсьӧ сідзи, кыдзи колӧ!