ВЕРА

Век югыд, кӧть вой тан и сэтӧн,
Оз ломзьы на мачта йыв би.
А тэ кольӧм пристаньын петін,
И тэтӧг нин кывтам со ми.

Мый ӧні ме тэ йылысь тӧда,
Кӧть коркӧ да казьтыштны мед?
Мый тэ агрономавны мӧдан,
Мый Вера ним сетлӧмны тэд,

Мый юрсиыд шабді кодь еджыд,
Мый видзӧдлас сӧстӧм и бур,
Мый уналӧн петалас вежыс,
Мый мӧд татшӧм Вера оз сюр, —

Со ставыс, мый тӧда. Но оз-ӧ
Тэд ӧвт теплоходнымлӧн флаг?
Но оз-ӧ тэд копрӧдлы розсӧ
Том лежнӧг да вежӧд том яг?

А винт бӧрас гыыс со пессьӧ,
Мед ю вылас дыр на эз чӧв.
Зіль судно век ылыстӧ тэсянь,
Ми аддзысьлам ог коркӧ сэсся —
Оз тӧд тэлань войӧдысь тӧв.

Но эскытӧмлунсӧ ме нера,
И сыысь тшӧтш югыдджык мем,
Мый му вылас эм кӧнкӧ Вера,
Кӧть ылын, кӧть матын — но эм.