* * *

Н. П. Попов (Жугыль) паметьлы

Сэтшӧм мӧй нин Му шар вылас дзескыд?
Век тай кодкӧ бырӧ — лун и вой.
Ставыс тэныд вӧлись лоис веськодь,
Весиг миян дой.

Сідз жӧ шонді вуджӧ Эжва ютӧ.
Лэбач дзольгӧм шыысь абу мезд.
Парма быд пу вожӧн мичсӧ кутӧ,
Гажӧдчыны мед.

Тэ со дзикӧдз мунін, дона ёртӧй,
Помасис гражданскӧй тэнад тыш.
Пыравлыны гортад он нин кор тэ,
Кызӧдыштігтыр.

Райӧ тэ эн эскывлы ни адӧ —
Абуас нӧ эскынысӧ мый?
Коммунист, ас нэмкӧд олін ладӧн,
Эн ӧд вӧв кын мыр.

Абу нин учёт вылын тэ быттьӧ,
Сетісны архивӧ партбилет.
Олігад ми пуктім тэнӧ пыдди.
Помтӧм паметь тэд.

Жугыльӧсь ми лолім тан и сэтӧн,
Сы вӧсна мый Жугыльным эз ло.
Коми муӧд гӧгыльтчӧ нин тэтӧг
Юбилейнӧй во.

1971