АННА ТЬӦТ

Сиктысь нэмсӧ некытчӧ эз петав,
Чужліс тан — и пӧчӧн кувсис тан.
Код нӧ сылы омӧль донсӧ сетас?
Сыысь эз ӧд пемдыв олӧм бан.

Верӧссӧ гражданскӧй вылын воштіс.
Дӧва мортыд тӧждтӧгыд эз ов.
Бӧръя война кыкнан писӧ босьтіс.
Дерт нин, сэсся лӧгӧн тырлас лов.

Олӧм бердас кутчысис, кыдз колӧ,
Кыдзи кужӧ миян коми ань.
Радлуныс кӧть шоча вӧлі волӧ, — 
Эскис пыр, мый олӧм — век жӧ шань.

Видз вылын и ыбын, йӧзын, гортын — 
Весь эз овлы. Уджыс сюрліс пыр.
Тӧдіс, мыйысь мортыс лоӧ мортӧн.
Пӧрысьмӧдчис, аслас гажӧн тыр.
Внукъяс костас гажлуныс эз быр.

Коркӧ-й дзескыд вӧвлі няньысь-солысь,
Коркӧ-й паськӧм ас серти эз вӧв.
Казьтыштны кӧ, татшӧмӧн и колис:
Праздник дырйи варов, уджын — чӧв.

Эз кӧть быдӧн пыдди пуктыв пӧчсӧ — 
Бурсӧ вӧчны лов петтӧдз эз пӧт.
Му вылын и космосын мый вӧчсьӧ — 
Миян моз жӧ кывліс Анна тьӧт.

Некытчӧ эз петав чужан сиктысь,
Эз и мунлы-волы. Сӧмын вот
Сьӧлӧм вӧлі быттьӧ мыйкӧ ликтӧ,
Горувті кор кывтліс пароход.

Ӧд и кодкӧ ылӧ мунысь-мӧдысь
(Сэсся кутшӧм могӧн кӧть эз мӧд),
Кӧть и быттьӧ сэтшӧм уна тӧдысь,
Лоны мортӧн — татшӧм шуд оз тӧд.

Но, а сійӧ, Анна тьӧтным, тӧдіс
Лоны сэн и сэк — кӧн колан кор.
Быттьӧ сійӧс олӧмыслӧн ӧдыс
Тэрмӧдліс, мед бурлы эз ло сёр.

Нэмсӧ колис сиктын. Эз вӧв писка.
Асшӧр олӧм оліс — и эз берд...
...Чужӧмсяньыс кувтӧдзыс прописка
Вӧлі тан. А ӧні тан нин, дерт.