МЕ АС МОРТ СЫЛЫ ЛОИ

Ме весиг мӧвпыштны эг кужлы,
Мый коркӧ копыртча и Ужлы,
Карпатсянь шливгысь-лэччысь юлы,
И «видза олан!» эг на шулы,
Эг босьтлы соддзӧ тэрыб васӧ,
Эг сьывлы сылы изьва басӧн,
И сійӧн менӧ, изьватасӧс,
Сы дінӧ вайис зэра асыв.
Эн вывті пессьы, сьӧлӧм, чӧвлы!
Тан, гашкӧ, коми эз на-й вӧвлы,
А меным сэтшӧм шудыс усис,
И «добрий ранок!»* менам шусис,
Кыдз быттьӧ татчӧс кывъя чужлі,
И нӧшта ӧвтышті на Ужлы.
А сійӧ, быттьӧ Изьва менам,
И коськ, и кад пӧ ӧтвыв венам — 
Тадз висьталіс мен быгзьӧм гынас,
Тадз висьталіс мен югыд шынас.
Ме бура аддзи, бура кылі,
И аслам кывбурӧ со кыи.
А нӧшта содтӧд гӧгӧрвои,
Мый ачым ас морт сылы лои.