МЕДЫМ...

Лайкыд ру, тэ татысь кеж вай,
Асьтӧ, кымӧр, бокӧ ну,
Медым тыдаліс мен Эжва — 
Тшӧтш и менам муса ю;

Медым шонді, быттьӧ лэбач,
Ягъяс сайсянь качис сідз,
Мый и юлы содтіс эбӧс,
Коді асьсӧ весь оз видз;

Медым татчӧс сьыланкывйыс,
Кодӧс сьыліс Вера пӧч,
Бара босьтіс менӧ сывъяс,
Кывзі-кывзі — и эг пӧт;

Медым уджач, кыпыд зонмыс,
Коді ёртӧн лоис мен,
Оліс-сӧвмис, оліс-ёнмис,
Вӧлі шуда тан и сэн;

Медым сьӧлӧм вылын югдіс,
Асшӧр вынсӧ кыліс лов,
Ковтӧг нетшкысьӧмысь дугдіс,
Колан тӧждлунысь эз пов.