ПӦРЫСЬ СУСЕД


Гожӧм локтӧ таланьӧ — 
Кӧдзыд русӧ венӧ.
Пӧрысь вой-лун талялӧ
Со и, сусед, тэнӧ.

Медым вермим бурсины,
Ас ног томмӧ ывла.
Гожся кад, а юрсисьыд
Пужйыс оз нин сывлы.

Тӧвру пӧльтӧ асывсянь — 
Воштіс войся ойбыр.
Важ пу зырйӧн тасасин,
Вала довгин чойбӧр.

Лэччин со дай гумовтін,
Карнана со вӧрзин.
Ньӧжйӧ, мыйкӧ думайтіг,
Каян вуджӧр бӧрсьыд.

Тувччалан зэв гежӧда,
Воддза моз он войӧд.
Быттьӧ выльысь, вежӧрнад
Каян олӧм чойӧд.

Кильчӧ помад пуксин да
Бурпӧт шойччин вӧлись.
Лӧнь. И быдтӧм пуясыд
Сулалӧны, чӧлӧсь.

Муыс быттьӧ лолалӧ — 
Ӧвтӧ-кайӧ мусьыс
Яръюгыдӧн, томлунӧн...
Тэнад бара-й шусис:

«Овлім коркӧ збоясӧ.
Туй визь вӧлі веськыд.
Не кӧ олӧм воясыс,
Пӧрысьми мӧй эськӧ?»