А ӦД ВОЫС ВЫЛЬ

Лымйыс пыр на кольӧм вося,
Кольӧм вося, збыль.
Важ моз петін меным воча,
А ӧд воыс — выль.

Туйыс юж, да тэнад мунӧм
Оз и тӧдчы нем,
А ӧд дзик выль вося нюмӧн
Нюмъялан тэ мем.

Ставыс, кольӧм во мый вӧвлі,
Лым улысь оз шед.
А ӧд дзик выль вося тӧвру
Пӧльтӧ мем и тэд.

Тэнад чышъян — топыд гӧрӧд,
Разьны ог и куж.
А ӧд выль во — миян сьӧрын.
Эз мӧй сӧмын чуж?

Сьӧлӧм тіпкӧмтӧ кӧ кыла,
Орччӧн мунам вай.
А ӧд дзик выль вося кыа
Ӧзтіс мусюр сай.

Лымйыс усяс на зэв уна,
Ачыд тӧдан — збыль.
Кольӧм вося лымйӧд мунам,
Кытчӧдз оз усь выль.