***

Локтан воыс лоӧ шуда — эска:
Сійӧ ачыс аснас — кыпыд висьт.
Мед жӧ бурсӧ нинӧм нин оз дзескӧд,
Мед жӧ лёкыс усьласьны эз лысьт.

Ыджыд мирас шуштӧмыс сідз уна,
Быдӧнлы ӧд шонді эз на-й пет.
Та йылысь и Выль во праздник лунӧ
Менам сӧвесть вунӧдны оз сет.

Война шы и талун грымгӧ, кылӧ,
Мортлысь радлун мырддьыны оз мудз...
Но ӧд асьным бурсӧ лэптам вылӧ,
Но ӧд Мирлӧн сӧвесть оз жӧ узь.

Миян пӧвстысь, войтыр, быдӧн кӧсйӧ,
Медым збыльысь югыд вӧлі нэм.
Со тай кыа — флагным моз жӧ ӧзйӧ,
Быттьӧ быдса Му шарыслы вӧзйӧ
Ассьыс, тышӧ чуксалана рӧм.

Кыпыдлун, тэ вынсяв, а эн раммы!
Сьӧлӧмъясын ломав, сӧстӧм би!
Кутшӧм лоас выль воыслӧн сямыс,
Сыысь асьным кыв кутамӧ ми.