КЛЮЧПытшкӧссяньыс ачыс асьсӧ йӧткиг Сьӧлӧмӧй моз тіпкӧ сійӧ со. Корсьысьӧмӧс эськӧ эг и пӧткӧд, Эг кӧ татчӧдз, ю йылӧдзыс, во. Меӧн восьтӧм, сійӧ — сӧстӧм, югыд! Со тэд, колӧкӧ, и ловъя ва, Ачыс киӧ вӧзйысьӧ — он пукӧд, Лыа вывті визлалӧ — он дугӧд, Да и дугӧднысӧ нинӧмла. Ме цивилизациялы паныд Ӧти кыв эг шулы и ог мӧд, Но ме кӧсъя, медым ключыс тані Некутшӧм бульдозеръяс эз тӧд, Медым сійӧ, сӧстӧм, петӧ водзӧ, Медым мӧд морт, татчӧдз локтас кор, Гудырттӧг жӧ васӧ юис соддзӧн, Чайтас: восьтіс восьтывлытӧмтор, Чайтас: сыӧдз некод на эз вӧв тан, Чайтас: сійӧ первой... Но и мед. Со тай матыс кыдз пу бара ӧвтӧ, Быттьӧ ассьыс аттьӧ вӧзйӧ мен.
