МЕД ЖӦ БОКИТІ ШУДНЫД ОЗ МУН

Самолётнымлы пуксян туй сетӧ
Кыдзкар дівывса аэропорт.
Со нин воча начальникыс петӧ — 
Домень Педӧр, лӧз формаа ёрт.

Кутӧ паса фуражкасӧ тӧвсьыс.
Асшӧр кыв кутӧм стрӧгмӧдӧ бан.
Локтысь-мунысьтӧг сійӧ оз вӧвсьыв — 
Ӧтнас став вылас ыджыдыс тан.

Мылькъяс ме вылӧ дзоргӧны вывсянь,
А ме улын — и качӧді юр.
Кодкӧ сиктын со ломтӧма пывсян — 
И мен долыд, и меным тшӧтш бур.

Сідзкӧ, олӧмыс кывтӧ — и сылы
Воча кая и косны ог кос.
Джуджыдінсянь век тыдалӧ ылӧ,
Оз и ков ылӧ вуджӧдысь пос.

Любӧй пӧраӧ татчӧ мем локсьӧ,
Да и виччысьыс эм на тан, эм.
Татчӧс олӧмысь бурсӧ и лёксӧ
Кывны шуӧма медъёся мем.

Кыдз кӧть тэрыба кадыс эз шенась — 
Ставыс тӧдса тан, нинӧм эз вун.
Муса войтыр!
Землякъяс ті менам!
Мед жӧ бокиті шудныд оз мун!