ТШӦТШ НИМКОДЬ ЛОЛӦ ТЭН

Важ другыд, чужан сиктса ёртыд,
Тэн карад паныдасяс кор,
Сэк быттьӧ бара волан гортад:
Бур сёрни киссьӧ — дыр оз ор.
И кыдз нин тӧвйисны сэн, сиктын,
И кыдз нин таво муніс йи,
И код нин армияысь локтіс,
И кодлӧн нӧшта чужис пи,
И кодлӧн нин выль керка лыбӧ,
И чери шедӧ али оз,
И кутшӧм петасъясыс ыбын,
И кыдз нин муркӧдчӧ совхоз? — 
Тэн воча кывсӧ ёртыд сетас,
Син водзад тӧдса серпас петас,
Тшӧтш сыысь нимкодь лолӧ тэн,
Мый быдмин сэн, мый петлін сэтысь,
Мый муса керӧс тэнад сэн.