МЫЙ НИН ВЫЛЬЫС?

Асывводз кӧть рытын сёр,
Яр кӧть чусыд ывла,
Дыр мысть ёртӧй пырас кор,
Татшӧмтор ме кывла:

«Мый нин выльыс, изьватас?
Кутшӧма нин олан?»
Сэк, кор юалысьыс ас,
Дӧзмынысӧ пола.

Эськӧ-й юалӧмыс важ,
Водзвыв тӧда сійӧс,
Но эз вош мед ёртлӧн гаж,
Воча мычча киӧс.

Оз ӧд ёртӧй ворс ни дур,
Эз ӧд лёкӧн лок ни.
Сэтшӧм меным сэки бур,
Сэтшӧм лолӧ кокни.

Бара эска, эска дыр,
Мый дзик быдтор вена.
Сэсся бара дыр оз быр
Кыпыдлунӧй менам.

Кыдз бур ёртасьӧмлысь пас
Мед и водзӧ кыла:
«Мый нин выльыс, изьватас?
Кыдз нин олан-вылан?»