ВЫСОЦКӦЙ НЫРД

Ӧтка керка, ичӧтик да важ,
Сиктысь бокын, важӧн сійӧ овтӧм.
Вой кӧ суас, он на шу — мый ковтӧм,
Ломтан пач — и тӧдлан асшӧр гаж.

Ӧшинь улас сы мында со бадь!
Эм бара мый катлӧдлыны тӧвлы,
Тані коркӧ бакенщикӧн вӧвлі
Украина муысь петлӧм дядь.

Сылы, татчӧс вӧр-ва шыӧн тыр,
Юдор олӧм-вылӧм пырис вирас.
Аслас овмӧс, аслас штаб-квартира
Тан, Печора водзын, вӧлі пыр.

Эз зэв сійӧ тыдалана вӧв,
Но Высоцкий овсӧ менам сиктын
Тӧдліс быдӧн, кодӧс кӧть он ликты,
Код вылӧ кӧть видзӧдластӧ чӧвт.

Вӧлі сійӧ авъя, кыпыд, ас,
Ызгысь гыяс костын эз тӧд лябӧм...
...Мортыс важӧн абу, важӧн абу,
Сӧмын овыс колис — быттьӧ пас.

Мыльк и мылькйыв керка, матыс шор
Ӧні новлӧ сылысь джуджыд овсӧ,
Быттьӧ менам сиктсаяс пӧсь ловсӧ
Колисны, мед висьтасьӧм эз ор,

Быттьӧ сылӧн нюжалӧ на нэм.
Оз нин сылӧн понйыс тані увтчы,
Ачыс татчӧ некор нин оз тувччы,
Но Высоцкӧй берег — зато эм.

Кыдзкарсаяс, аттьӧ, мый оз вен
Кадыс сӧстӧм паметьсӧ тшӧтш сылысь.
Аттьӧ, земляк войтыр, тшӧтш и сыысь,
Мый Высоцкӧй нырдӧ локсьӧ мен.