МЕН СЭТШӦМ МУСА...

Мен важ моз муса аслам чужан нӧрыс,
Кӧн медводдзаысь паныдалі шуд.
Сэн вой тӧв улын шувгӧ-сьылӧ вӧрыс,
Сэн дзоридзьяснас копрасьӧ веж луд.

Крут нӧрыс йывсянь бура тыдалӧ зэв ылӧ,
Мен мичыс Рӧдиналӧн воссьӧ сэн.
Морт сійӧ мичсӧ лэптӧ век вылӧ.
Мортӧс дзик нинӧм оз вен!

Мен вывті муса аслам чужан Войвыв,
Кӧн кокньыдика ветлӧ менам лов.
Сэн ыджыд дойсьыс сьӧлӧмыд кӧть доймӧ,
Сэн ыджыд шудсӧ кывтӧг он жӧ ов.

Ас мелі Войвывсянь мен тыдалӧ зэв ылӧ,
Мен мичыс Рӧдиналӧн воссьӧ сэн.
Морт сійӧ мичсӧ лэптӧ век вылӧ.
Мортӧс дзик нинӧм оз вен!

Мен сэтшӧм муса выльмӧдӧм Россия,
Кӧн ыджыд шыкӧд йитчӧ парма шы.
Сэн уджач морт мен медся бурсӧ сиӧ,
Сэн кыпыдлунӧй кайӧ, быттьӧ гы.

Россиясянь мен нӧшта тыдалӧ зэв ылӧ,
Мен Рӧдиналӧн мичыс воссьӧ сэн.
Морт сійӧ мичсӧ лэптӧ век вылӧ.
Мортӧс дзик нинӧм оз вен!
Слава! Мортлы слава!