***

Лыйсьӧ-трачкӧдчӧ бипур — 
Менам вой коллян ёртӧй,
Лэччӧ ю вылӧ руыс,
Быттьӧ мӧс вӧра йӧв.
Юыс тёльскыны дугдіс,
Кад пӧ мунны мем гортӧ,
Кад пӧ шатинӧс гартны.
Гӧгӧр чӧв — шы ни тӧв.

Теплоход либӧ катер
Некӧн оз кывны матын,
Тӧдса эрдъясті каля
Оз на кыйкъяліг лэб,
Сьылысь лэбачьяс весиг
Эз на садьмыны татӧн,
Сӧмын лӧзӧдысь енэж
Асьсӧ оз нин со дзеб.

Югдӧ. Ломалысь кыа
Бара вӧр йывсӧ ӧзтіс,
Парма пасьтала медым
Сылӧн тыдаліс би.
Сямным-вежӧрным содіс
Ӧти вой вылӧ нӧшта,
Ӧти вой вылӧ нӧшта
Быдӧн пӧрысьмим ми.

Но ӧд, сідзи кӧ шуны,
Быттьӧ медыджыд козин — 
Локтӧ миянӧ асыв,
Коді кыпыд да том.
Сідзкӧ, мыйта на вӧчам!
Сідзкӧ, ставыс на водзын!
Сідзкӧ, кыпалысь выльыс
Некор оз тӧдлы пом.

Вот-вот мыччысяс шонді,
И со лэбачьяс горӧн
Тырис керӧс дор. Пышйӧ 
Гожся ывлалӧн ун.
Войлысь вешйӧмсӧ тӧдлім
Сӧмын ме да Печора,
Кыкӧн казялім сӧмын,
Кыдзи чужӧ выль лун.