* * *

Сэки... Сэки ылі Рытыввылысь,
Вӧрӧгкӧд кор помалісны вен,
Гортъясаныс ыджыд война вылысь
Воисны — код ловйӧн коли сэн.

На вылӧ сэк дзоргим челядь котыр,
Вежалім и нимкодясим дыр.
Югыд лача сьӧлӧмнымӧс сотіс:
Ӧні сӧмын мир тан лоас пыр!

Унаӧн дзик некор нин оз воны —
Тӧд вылын и тайӧс кутім, дерт.
А ӧд налы сэтшӧм вӧлі дона
Чужан мулӧн дзик быд пом да эрд.

Могмӧдісны налысь медпӧсь кӧсйӧм
Ёртъясныс — мир шедӧдісны со!
Майся шонді сымда югӧр вӧзйис,
Мый ми эским: лёкыс оз нин ло.

Вермӧмлӧн ми эским асшӧр вынӧ:
Татшӧм йӧзнад лёкыс оз нин кыр...
Став Россия аслас пиян вылӧ
Видзӧдіс сэк аттьӧалігтыр.

Порок дука руд шынельяс налысь,
Бусӧссьыштӧм налысь чужӧм бан,
Врагӧн вӧчӧм дойяссӧ страналысь
Миян тӧвру нюліс сэн и тан.

Югыд лунсӧ дорысьясыс — танӧсь,
Микӧд орччӧн дорӧны выль шуд.
Пӧрысьмӧны миян ветеранъяс,
Томмӧ наӧн дорйӧм чужан му.