АДДЗЫСИСНЫ НАЙӦ...

Ӧта-мӧдлы сулалӧны паныд.
Вомныс кальк, а кыв оз артмы дзик.
Аддзысисны найӧ ресторанын —
Штатскӧй йӧз, кык вӧвлӧм фронтовик.

Паметь! Сійӧ оз ӧд вунӧд, оз ӧд.
Кыкнанныслӧн быттьӧ вӧрзис лов:
— Тайӧ тэ нӧ... лейтенант Морозов?!
Ме... Вай китӧ, старшина Теплов!

Тайӧ радлун — биысь петлӧм йӧзлӧн.
Но кӧть сэкся вуджрасьлӧ и шог,
Сійӧ сымда сёрнитантор вӧзйӧ!
И со ӧні мирнӧй служба мог

Вочаӧдіс найӧс войвыв карын,
Войвывсаӧс лунвывсакӧд, тан.
Татшӧм помка кузя эз жӧ бара
Юны сӧмын кутшӧмкӧ нарзан.

Точкысясны. Чужӧмсьыныс стрӧглун
Саймовтӧдлас ыджыд-ыджыд нюм.
Радейтӧмкӧд вочаасьлӧ лӧглун,
Курыдыскӧд сорласьлывлӧ юм.

Оз тай сӧмын вина морттӧ коддзӧд.
Кольӧмыс оз вешйы здукӧн, оз,
Кӧть и вояс лэбовтӧны водзӧ
Тӧдса стволйысь ыстӧм пуля моз.

Казьтылантор тувсов ва моз туӧ...
Вӧвлі кад, и сійӧ нэм оз вун:
Эм приказ, и оз ков кыкысь шуӧм,
Лӧгыс ачыс вӧрӧг вылӧ нуӧ,
Дорйыны мед паныд локтысь лун,

Дорйыны мед тшӧтш и тайӧ чассӧ,
Коді зэв на ылын вӧлі сэк...
...Друг тай быттьӧ нӧшкӧн сынӧд-тасӧ
Косьӧбтісны, кыдзи коркӧ сэн,
Фронт вылын, атака выльӧс паніг:
Музыка шы ыльӧбтіс — и со
Бергӧдлӧны нин то вальс, то танго
Параяс. И лёкыс сэсь оз ло.

Сэсся-й, быттьӧ вежисны пластинка,
Залӧ петіс кыськӧ воӧм твист.
Оз быд гӧсть ли гӧстя ёрлы синтӧ —
Оз быд нота сьӧлӧмӧдзыд письт.

Да и твисттӧ, сідзи-й шуам, бара
Колӧ кужны йӧктынытӧ, зон.
А вот петіс тривксьӧдігтыр пара,
Пара, кодлысь пыр и аддзан дон.

Зонмыс тіралӧ да быттьӧ разьсьӧ,
Кинас сідзи-тадзи ӧвтчигтыр.
Но, а нылыс быттьӧ гартӧ асьсӧ,
Дэльӧдчигтыр нюглясьӧ со пыр.

Юр весьтаныс тіралӧ и люстра,
Прӧста сідз не дӧввидзны жӧ мед.
Ак тэ, олӧм! Мустӧмыс кӧ мустӧм,
Мед и сійӧ лёк киӧ оз шед.

Ӧта-мӧдлы видзӧдлісны синмӧ
Кык боец, кык вӧвлӧм фронтовик.
Кыкнанныслы быттьӧ мыйкӧ инмис —
Кызӧктісны ӧттшӧтш найӧ дзик,

Ӧттшӧтш сэсся чеччисны — и асьныс
Музыкалань воськовтісны сэк.
Сы вылӧ мӧй абу налӧн властьныс?
Пыркнитчыны налы ӧмӧй грек?

Сӧмын налӧн мӧдджык йӧктан визьныс,
Кыдзи-й олан визьныс налӧн мӧд.
Йӧктӧмас тшӧтш — асшӧр ловтӧ видзны,
Тӧдны асшӧр вӧрас, асшӧр ӧд.

Зымнитасны ӧтиыс и мӧдыс,
Шевкнитасны кинаныс со тадз, —
Да кыдз мӧдас, мӧдас, мӧдас, мӧдас
Йӧктӧмныс, мый ачыс твистыс пӧдас.
Йӧктӧмныс — кыдз быттьӧ татчӧс рӧдысь:
Топ да топ и бара — вач да вач.

Найӧ ӧні штатскӧйяс. Оз тӧдны
Мукӧдыс, кӧн накӧд лоліс мый.
Войнаыс ӧд ачыс эз куж пӧдны,
Эз ӧд морыс сійӧс, ёртъяс, лый.

Йӧктӧны — оз лёкысь кокӧн тойтны.
Некоднанныс некӧні оз ляб.
Весиг музыкантъяс — дошлӧй войтыр —
Тӧкӧтьыштӧ вежисны сэк лад.

Музыкаыс ланьтіс кор, сэк чӧла
Разӧдчисны, кодлӧн кӧні ин.
Ставӧн, коді матын сэні вӧлі,
Кык вылӧ жӧ чӧвтлісны сэк син.

...Ывлаӧ кор петісны нин найӧ —
Кык салдат, кык вӧвлӧм фронтовик,
Кажитчис, мый рытъя карыс тайӧ
Налы ӧзтіс бияс — ставсӧ дзик.

Уличаыс, быттьӧ югзьӧм шемӧс,
Олӧм туй моз нюжаліс — вель кузь.
Но, а вывсянь дзоргис ыджыд енэж,
Кытысь, лымйысь кындзи, нем эз усь.