А. П. РАЗМЫСЛОВЛЫ

Лоин тшӧтш сӧветскӧй лейтенантӧн
Тэ, поэт да парманымлӧн пи.
Ок ӧд важӧн, важӧн эн вӧв тан тэ,
Тӧдмасьны ог вермӧй некыдз ми.

Рытыввывлань мунлӧмыд тэ татысь,
Вӧрӧгъяслы воча петны мед.
Кымын пароход нин сэксянь катіс!
Ньӧтиысь тай пристаньӧ он пет.

Эськӧ тэнӧ Кыдзкар сиктӧ нулі,
Петкӧдлі ме эськӧ сэтчӧс луд.
Эськӧ-й сэсянь китӧ, кыдзи шулін,
Мыччин Майлы, медым кывны шуд.

Шуньгисны мед Эжва да Печора,
Олӧмным мед лёклунсӧ эз тӧд, —
Та вӧсна ми шонді пуксяндорыс,
Гашкӧ, весиг лэптім румка-мӧд.

Кывбуръяс ми сэсся эськӧ лыддим,
Донъялысьнас лоис югыд вой.
Бурсӧ эськӧ ӧтвыв пуктім пыдди,
Ӧтвыв эськӧ кылім сьӧлӧм дой.

Тэкӧд эськӧ янсӧдчигӧн сідз ми
Кутчысьлімӧ, завидьтісны мед...
Но тэн кадыс локны век оз вичмы, —
Мыськовтӧны вояс... Некор тэд.

Менӧ сӧмын ӧти дум и шонтӧ:
Чужан муысь врагӧс зыригтыр
Он и вевъяв пӧрысьмыны, он тай...
Кызь кӧкъямыс арӧса тэ пыр.