СИМОН МИШ

Кыдзкар сиктын ӧні медся пӧрысь —
Симон Мишук, еджыд тошка ёрт.
Чольӧб на, кӧть абу важкодь вӧрысь —
Быттьӧ муртса лигышмуніс борд.

Кымын верст ас нэмӧн сійӧ мунліс!
Нопъяс сійӧ вайліс мыйта мудз!
Муса ягыс коркӧ ӧмӧй вунлас,
Чӧс туй тальны вын кӧть оз нин судз.

Рытъяпом, кор дедӧ песла петӧ,
Кильчӧ вылын сувтовкерлӧ пыр.
Мӧдлапӧлыс — со тай! Ягас сэтӧн
Эм и чом, и вӧр-ва дук — чом тыр.

Кымӧр сайысь мыччысис со тӧлысь —
Лэчкысь мынӧм эзысь пӧтка моз.
Видзӧдыштас дед, а сэсся вӧлись
Пыртас пессӧ. Сувтовкертӧг — оз.

Коркӧ татчӧ бара воас тулыс.
Симон Миш сэк нӧшта лоас дзор.
«Пыр на гижан? — вочаасиг шулас. —
Дерт, и гижӧм абу омӧльтор».

Омӧльсӧ и бурсӧ тӧдліс уна.
Вояс дедлысь гӧрбыльтӧны мыш.
Сэк, кор чужан сиктысь ылӧ муна,
Письмӧын ме юавны ог вунӧд:
«Кыдз нин олӧ-вылӧ Симон Миш?»