ЧУКСАСЬӦНЫ ВОЯС

Чайтан, мунӧм воясыс оз волыны?
Чайтан, найӧ ланьтісны нин помӧдз?
Но ӧд найӧ сьӧлӧмъясын олӧны,
Сы вӧсна и томӧсь найӧ, томӧсь.

Тувсов югӧр — кузяла и пасьтала.
Дзик выль тулыс войвыв муӧд мунӧ.
Сы вӧсна и кольӧмсӧ ми казьтылам,
Мый и сэні яръюгыдыс уна.

Кутшӧм мог ми — ыджыдӧс ли ичӧтӧс —
Воясыслы индам, сідзи-й петлӧ.
Мортлӧн вӧчлӧмторйыс найӧс мичӧдӧ,
Мортлӧн бурыс налысь донсӧ лэптӧ.

Вояс, найӧ арлыднымӧс содтӧны
Ассьыныс моз — кыпыдӧсь да збойӧсь.
Асшӧр гажӧн, асшӧр дойӧн — котырӧн
Мортлы паныд лэбовтӧны вояс.

Лэбовтӧны — видлы чинты ӧдныссӧ!
Кадыс аслас тшупӧдъясті кайӧ.
Чуксасьӧны вояс ӧта-мӧдныскӧд,
Пальӧдӧны вежӧрнымӧс найӧ.