НИМЛУН КУЗЯ

Август.
Кыпӧдчӧ выль гажа лун.
Чолӧм, сикт!
Тэн, Республика, копыр!
Мед кӧть кытчӧ ас нэмӧн ог мун,
Бӧръя лов шыӧдз менам он вун
Тэ, Республика, тэ, дружнӧй котыр.

Югъяв, шонді!
Тэ аддзан быдтор.
Но и пыравлан кымӧръяс сайӧ.
А ӧд мувывса удж шы оз ор,
Мӧд ног — вӧвлытӧм шудсӧ он дор,
Мӧд ног — гажлунсӧ матӧ он вайӧд.

Сэтшӧм мусаӧсь ас муын мем — 
Югыд тыяс и сӧдз ваа юяс.
Усис миянлы зэв шуда нэм.
Сӧвет власть миян ставнымлӧн эм — 
Эз на вӧв таысь ыджыдджык туйыс.

Вай жӧ босьтчам, землякъясӧй, ми
Коммунизмсӧ тшӧтш матыстны татчӧ.
Али миянлы кад оз бурси?
Ӧд и миян маякъяслысь би
Важмӧм мир талун, вежӧктіг, аддзӧ.

Югыд кад!
Сӧмын стрӧит да ов,
Мед гордитчисны батьясӧн челядь.
Ми ог тшапитчӧй — сійӧ оз ков.
Но быд вермӧмысь шпыннялӧ лов.
Сідз, Сӧветскӧй Россиялӧн пельӧс?

Сідз, Республика?
Сідз, чужанін?
Ставыс ас, ставыс выль — йӧзыс, муыс.
Кыптысь петаслы радуйтчӧ син.
Мирнӧй флаг улын слава оз чин,
Мирнӧй флаг улын содӧ бур вын:
Вӧчам сідз, кыдзи Партия шуас.