МИ, ТӦРЫТЪЯ ЗОНКАЯС...

Век паськалӧ-содӧ бур слава страналӧн...
Ми, тӧрытъя зонкаяс, быдтысям талун.
Ми быдтысям, тӧдам, мый челядьным миян
Оз уськӧдны славасӧ — нывъяс и пиян.
Оз уськӧдны славасӧ — лэптасны вылӧ,
Мед на йылысь юралӧ матӧ и ылӧ.
И матӧ, и ылӧ... Мед Рӧдина-муным
Пӧсь аттьӧ кыв быдӧнлы вермис сэк шуны,
Пӧсь аттьӧ кыв шуны да радейтны найӧс.

А муслун страналӧн — оз век вичмы тайӧ,
А сэк, кор нин вужъясян сьӧлӧмнад-ловнад
Ас мукӧд — ни енмысь, ни чӧртысь не повны.
Веж знамясӧ му весьтӧ павтыртіс тулыс,
Мед челядьным аддзисны мичлунсӧ мулысь,
Мед аддзисны йӧзыслысь лышкыдлун найӧ,
Мед эскисны: бурторсӧ немтор оз сайӧд.

Вай быдмӧй ті, донаяс, нывъяс и пиян.
Бать сьӧлӧмсянь ӧтитор содтӧд ми сиам:
Ті, быдмад да, энӧ жӧ вунӧдӧй бара,
Мый шуднытӧ ми ӧд на дасьтім зэв яра,
А миянлы — батьяс, а батьяслы — дедъяс.
Оз кушинын, дерт, быдмы-сӧвмы выль петас.
Ті перъянныд выльӧс — эм пай миян таын.
...Ми, тӧрытъя зонкаяс, быдтысям талун.