МИЯН ВЫЛЬ ВО

Важӧн нин эз волы этатшӧм гӧсьт.
Бара со во кежлӧ воис.
Лолыд кӧ радлӧ — и сьӧлӧмыд пӧсь.
Радуйтӧ йӧзтӧ Выль воыс.

Буркӧд да вылькӧд век аддзывлім лад.
Вичмӧдам вӧчантор уна.
Олас тан Выль во, а кор тшӧктас кад,
Миянысь, важмас да, мунас.

Мунас. Оз бергӧдчы. Сӧмын зэв дыр
Бурӧн ми казьтывны пондам.
Шудным ӧд важтӧгыс оз жӧ ло тыр.
Лов сайысь бурсӧ он конды.

Кыланныд! Кыпыдлун шыалӧ со.
Шуамӧ:
— Ыджыдав, праздник!
Кутшӧмджык сяма тэ лоан, Выль во, — 
Сыысь ми кыв кутам асьным.