* * *

Эк, лунъяс, ӧдйӧ жӧ ті мунад...
Со мамӧ бара гижӧ мен:
«Тэ эн-ӧ миянӧс нин вунӧд?
А, гашкӧ, пиук, висьмин сэн?

Зэв важӧн письмӧыд эз волы...»
Мам сьӧлӧм, тӧда, висьӧ, дерт:
Эз мамӧ ӧмӧй сет мен олӧм,
Эз сійӧ морӧснас мӧй верд?

Ме быдми, мортъямми, и сьыла
Страналысь вынйӧр, сылысь мич.
Йӧз сёрниысь ме весиг кыла,
Кыдз содтӧны ним дінам вич,

Кӧть вӧчӧмторлӧн доныс улын,
Кӧть ыджыдторсӧ эг на тэч.
Но — гражданин сӧветскӧй мулӧн — 
Ме выльмӧм лунъяслӧн боец.

Ас поколеньекӧд ме зіля,
Мед кадлӧн восьласысь ог коль.
Ме тшӧтшъяяскӧд ола выльӧн,
Кӧть лишнӧй та йылысь ог доль.

Ми кылам (чувство оз ӧд ныжмы)
Великӧй делӧяслысь гор.
Но частӧ дышӧдчылам гижны
Ас мамлы прӧстӧй письмӧтор.