МЕ ОРДЫН ПУШКИН

Быттьӧ киася сыкӧд, кор босьта
Сылысь, дона поэтнымлысь, том.
Ыджыд сьӧлӧмсӧ ме водзын восьтӧ.
Лыддя, лыддя... Кӧн радлунлы пом?

Донсӧ гижӧдлы кутшӧмӧс сетны?
Стӧча висьтавны некыдз ог куж.
Да и колӧ-ӧ? Пӧсь кыв поэтлӧн
Вӧчӧ тырвыйӧ колана удж:

Лыддя шог йылысь — зэв шог и меным.
Лыддя мич йылысь — шоналӧ лов.
Менӧ быттьӧкӧ кутлӧ сідз гений,
Таысь ыджыдджык радлун оз ков.

Ӧшинь сайын оз омляв нин бушков,
Гыӧн ыльӧбтіс шондіа лун.
Пушкин! Ме ордын гӧститӧ Пушкин!
Сійӧс лыддя — и сійӧ оз мун.

Ой, да кымынысь кольлам на кыкӧн,
Ыджыдторъяснас юксьыны мед!
Ме ог янсав великӧйкӧд сыкӧд,
Кытчӧдз смертьыслы сывйӧ ог шед.