А ПАРМААД ВОЛЫВЛӦ ТӦВ

Горизонт таласӧ
Чорыда доръя.
Вас. Елькин

Тэд шондіыс некор нин сэсся оз пет.
Узь медбӧръя вольпасяд сэні.
Эн элясь, ас му вӧсна усьӧм поэт,
Мый арлыднам суӧді тэнӧ,

Мый вемӧсӧн некор мен воча он во,
Мый киасьны тэкӧд ме сёрми.
Портретын сук юрсиыд менам кодь со,
Оз гежӧдмы сійӧ, оз дзормы.

Сюсь видзӧдлас тэнсьыд век видзӧ портрет.
Но сійӧ — портрет... Ӧні эськӧ
Ас войтыркӧд ӧтвылысь петны и тэд
Збой сьылӧмнад чужан му весьтӧ.

Ми шогпырысь эскам, мый смертьысь эн мын,
Кор Му шарыс кок улад ветліс.
Но збыль мӧй нӧ пулялӧн сы мында вын,
Мед вины и шысӧ поэтлысь?

Тэд Волховскӧй фронт вылын кызь во нин чӧв.
Странаным выль шудлунсӧ кылӧ.
А пармаад Рытывсянь волывлӧ тӧв,
Код воліс и тэнад гу вылӧ.

Кыдз мамлӧн да Рӧдина-мамнымлӧн пи
Тэ миянысь некор он торъяв.
Ӧд тэ моз жӧ кывбуръяс гижамӧй ми.
И горизонт таласӧ доръям.