ВЫНЙӦРА И ТОМ ТЭ

Тэ и алӧй, тэ и лӧз, — 
Вынйӧра и том тэ.
Тэнӧ ыдждӧдлӧны йӧз:
Шудыд, сідзкӧ, помтӧм.

Зарни лучнад кучкы вай — 
Сьӧлӧмъясӧ кучкы,
Быдлаын, кӧн ветлан, Май,
Медым вӧлі лючки,

Медым лёкыслы эн шед,
Пыр мед вӧлін ярӧн,
Ёртлы моз тэн радлӧ мед
Мирса пролетарий,

Тэнад воськовкӧд мед пыр
Йитчӧ воськов менам.
Тэкӧд эскӧмӧй оз быр:
Ми, мый колӧ, венам.

И, кӧть ӧшйывлӧ на грӧз,
Ыджыд шудным помтӧм.
Ӧттшӧтш алӧй тэ и лӧз, — 
Вынйӧра и том тэ.