ГОРТ ОЛЫСЬ
Петыр Лёшлӧн дона гӧтырыслы, детсадйын идрасьысьлы, профсоюз нем виччысьтӧг сетіс лунвыв саридзса курортӧ «сотчысь» путёвка. Кодлыкӧ мӧдлы эськӧ корлӧмаӧсь путёвкасӧ, но мыйкӧ сорӧма мортсӧ, да ӧткажитчӧма. Лёшлӧн гӧтырлы радыс! Нюмъялӧ. Дзик быттьӧ чӧскыд юм сёйӧма. Чеботанӧ медся бур паськӧмсӧ тэчис, Лёшӧс велӧдыштіс, кыдз да мый сылӧн ветлігкості вӧчны: шуам, кыдзи да мыйысь шыд пуны, петкӧдліс весиг, кутшӧм шкапъясын мыйся нур да мый да. Сэсся АН-2 самолётӧн юрсиктӧ лэбис, та бӧрын, колӧ чайтны, кузь поезд тӧвзьӧдіс-нуис Лёшлысь гӧтырсӧ ылі, шоныд саридз дорӧ. Нёль арӧса нывнысӧ, коді садикӧ быд лун котраліс, Лёшлы ковмис орчча сиктӧ, гӧтырыслӧн мам дорӧ мотоциклӧн вартӧдны... Мед пӧ Светикным бабыс дорын олыштас: и бабыслы гаж, и Лёшлы этшаджык нок. Сэк жӧ Лёшлӧн тьӧщаыс кӧза дай баляяс на видзис, век нин йӧвтор ичӧт нывкалы лоӧ.
Со и колис Петыр Лёш ӧтнас горт олысьӧн. Эз эськӧ кӧсйы гӧтырсӧ курортад лэдзны, да мӧдыс няргыны кутіс: гашкӧ пӧ, медводдзаысь дай медбӧръяысь татшӧм шудыс усис, гашкӧ пӧ, некор сэсся лунвыв саридз дорас ог волы... Ветла пӧ, кӧть мый шу, а тэныд, Лёшукӧй, терпенньӧсьыд дона джинсы гач вая. Лёшлӧн сьӧлӧмыс и небзис, лэдзис дона Машуксӧ. Гӧтыр мунӧм бӧрас нин юрас кучкис, абу пӧ эськӧ колӧма лэдзны, но кыдз шуласны, киссьӧм ватӧ он курав.
Колӧ шуны, гортув пӧшти став уджыс: пусьӧм да идрасьӧм, песласьӧм да пач ломтӧм, ва вайӧм и лавкаӧ ветлӧм — гӧтырыслӧн пельпом вылын и вӧлі. Ачыс Лёш совхозын трактористаліс: лунтыръясӧн удж вылын — тулысын гӧрӧ-кӧдзӧ, гожӧмын видз вылын, тӧвъяснас турун кыскалӧ скӧт карта дорӧ, куйӧд разӧдӧ муяс вылӧ. Гортас сӧмын сёйны да узьны и волывлӧ. Рытъяснас корсюрӧ небыд диван вылӧ лажгысяс да ӧтарӧ телевизорӧ дзоргӧ. Сӧмын пес кыскыны вӧрысь да горт дорас поткӧдлыны оз вунӧдлы. Тайӧ и эм семьяас сылӧн медшӧр могыс. Ӧні жӧ Петыр Лёшлы гӧтырыс пыдди став уджсӧ ковмас бергӧдны.
Пусьыны Петыр Лёш ньӧти эз куж, кӧть чӧскыда сёйнытӧ радейтіс. Пусьӧмыд, шулывліс, бабалӧн мог... Ме пӧ сы вӧсна и гӧтраси Машук вылӧ, мый бура пусьӧ-пӧжасьӧ дай зэв идӧра ань.
Радейтана гӧтырыслӧн мунӧм бӧрын мӧд рытнас жӧ Лёш медводз ломтіс плитаа ичӧт пачсӧ. Ваӧн джынвыйӧ тыртӧм гырничӧ шняпкис кӧзӧдысь пыртӧм ыджыдкодь яй ёкмыль, водзвыв шырӧм картупель, содтіс сак тыр вермишель, сэсся сапкис ыджыд пань тыр сов. Торъя рачын пражитіс пулӧм картупель, поснӧй выйӧн сорлаліс да. Сэсся велалӧмпырысь нюжводіс радейтана диван вылас — шойччышта пӧ. Тракторнад лунтыр муркӧдчӧм-гӧрӧмсьыс мудзӧм морттӧ ӧдйӧ и босьтіс ойбырыс. Садьмис тшын дукысь. Вӧлӧм, картупельыс тшынасьӧ, сотчӧма — сёйны оз нин туй. А шыдыс дыркодь пуиг-варгигӧныс рокӧ пӧрӧма. Паньыштіс Лёш шыдсӧ да нымӧнӧ синъясыс пач вылас эз кайны — сир курыд сов. Яйсӧ на видліс, но абу бура пусьӧма, чорыд. Лёш эз и мӧд йирны, Бусик понйыслы кӧтшасӧ лэбӧдіс...
Мый и вӧчны? Кӧзӧдысь жӧ ковмис пыртны солалӧм тшак да сійӧс мырдысьӧн няклявны. Сук тшай на юис — со и став ужыныс лои мужик мортлӧн.
Ывла вылын май тӧлысь. Видз-му овмӧсын тыр ӧдӧн мунӧ гӧра-кӧдза. Петыр Лёш, дерт, лунтыръясӧн удж вылын. Удж бӧрас мудзӧмвывсьыс лёкӧн сорӧн воис гортӧдзыс. Колӧ эськӧ кӧть шыдтор пуыштны, но тӧрытъя пусьӧмыс дум вылас уси, да дзикӧдз сьӧлӧмнас усис. Виччысьтӧг юрас вирдыштліс югыд мӧвп... Кышаліс вылысас куртка да петіс сиктӧ. Регыд мысти шуда нюмӧн пызан вылӧ ректіс нянь тупӧсь, чериа некымын консерв банка да пачкаа шыд, дасӧс кымын. Водзті Лёш кывліс нин: пачкаа шыдсьыс пӧ зэв на и скоднӧй нуръясянтор артмӧ, и главнӧйыс — ӧдйӧ! А консервалӧм чериыс пӧ аттӧ чӧскыд, позьӧ и шонтытӧг нямны. Вузасьысьыслысь Лёш юаліс на:
— Надя, ноко висьтав, кыдзи пачкӧвӧй шыдсьыс сёйӧдсӧ пуны?
— Сэтчӧ ӧд гижӧма... Ачыд грамотей, лыддьы, — дӧзмискодь мӧдыс. — Ме кӧ быдӧнлы мӧда тӧлкуйтны, кыдз-мый да дыр-ӧ пуны, и вузасьны кадыс оз коль.
Но Лёшыд Надя вылӧ эз лёкӧдчы, гортас локтіс да пуксьӧмӧн и лыддис, кыдз-мый колӧ вӧчны. Пачкаа шыдыс ӧдйӧ и пусис. Шыдӧн да консерва чериӧн ужнайтӧм бӧрын Петыр Лёшлы долыдджык лои сьӧлӧм вылас. Но тасьті-паньсӧ эз мыськав. Дышӧдіс талун вылӧ горт гӧгӧр нокыс.
Мӧд асывнас водз чеччис. Тшак тыра тасьті кымис, сук, пӧсь тшайӧн горшсӧ пожъяліс дай бара удж вылӧ. Ӧбед кадӧ гортас котӧрӧн сорӧн воліс: тӧрытъя шыдсӧ плита вылын шонтіс. Сійӧ сорванас да консерва чериӧн бара и тыртіс рушкусӧ. Рытъя менюыс эз жӧ вежсьы: тшак, консерв, гырничын пуӧм картупель, юмов тшай. И тадзи некымын лун нин...
Омӧльыс сыын, мый Лёш эз радейт мыськавны тасьті-паньсӧ. Вежон кымын мысти Лёшлӧн керкаын эз коль ни ӧти сӧстӧм дозмук. Став тасьті-паньыс, чугун-гырничыс и рачьясыс няйтӧсь. Колӧ шуны, Лёш ичӧтсяньыс быдтор вылӧ зывӧктысь вӧлі, мыськытӧм тасьтісьыд оз на и сёй. Бара падмис мортыд: мый вӧчны? И мортыдлы нӧшта ӧти югыд мӧвп воис... Бара петіс Надя дорӧ лавкаӧ. А сиктса лавкаад ӧд водзті ставсӧ ӧтилаын вузалісны: сакар и яй, сапӧг и тшай, сунис и ем, мый абу и эм. Сӧмын агас да гӧр эз тырмыв.
— Надя, мыччыв меным эсійӧ кӧстрюльсӧ... Сэсся кык тасьті эськӧ колӧ да ӧти шыд дар.
— Нӧшта мый? — тшӧті мольнас тітш-тотшкерис Надяыс.
— А-а... Ыджыд лӧшка на колӧ.
— Зарни али эзысь? — нюммуніс Надя.
— Мы-ый? — чуймис Петыр Лёш.
— Мися, паньыс тэныд зарни али эзысь колӧ?
— Мый серавлан, — дӧзмис Лёш. — Меным и пу лӧшкаыс олас.
— Ми пу лӧшкаясӧн ог вузасьӧ, — крапкис вузасьысь. — Лемень пань со эм.
— Вай, сідзкӧ, кыкӧс, сэсся нинӧм пока. Мый колӧыс, босьті...
Петыр Лёш мынтысис да тэрмасьӧмӧн петіс.
Та бӧрын сійӧ пӧшти быд рыт кутіс кежавны лавкаад: то шыд гырнич ньӧбас, то разнӧй пӧлӧс тасьтіяс, то чашка да стӧкан. Тадзикӧн тасьті-паньыс да мукӧд дозмукыс Лёшлӧн чӧжсис бура уна. Надяыс гигзьыны нин мӧдіс: миян лавкалы пӧ ыджыд барыш вӧчан тасьті-паньяснас... Али мӧд семья пӧ лӧсьӧдін гӧтырыдлӧн курортас ветлігкості?
...Колӧ шуны, сійӧ кадӧ сьӧмнад бурджыка овсис сиктсалы: совхозын удждонъяс эз ичӧтӧсь вӧвны, нӧшта нин механизаторъясыдлӧн. А лавкаясын дозмукыд — ньӧб, мыйта лолыдлы колӧ.
А Лёшлы, тракторист мортыдлы, и пывсьыны на окота: быд вӧскресенньӧӧ пывсянас мышкусӧ да бокъяссӧ корӧсьӧн швачӧдӧ. Мыссяс-пывсяс, гӧтырысӧн водзвыв дасьтӧм сӧстӧм паськӧм пасьталас, новлӧмсӧ кӧджас и коляс. Тадзикӧнтӧ и няйт паськӧмыс чӧжсис аслас трактор додь тыр мында, вежлытӧмыс эз коль...
Машукыс лунвылысь воис тшук тӧлысь мысти. Пырис керкаас да сӧмын кыкнан кинас аслыс бекъясас шлачкыны сяммис: быдсӧн шай-паймуніс, кор гӧгӧр видзӧдліс муса позсӧ... Быд пельӧсын, джоджын и шкапъясын, пач вылын и пызан горулын, ӧшинь дорын и диван вылын — мыськытӧм дозмук. Пывсянас лэччис, а кӧдж тырыс пеславтӧм паськӧм.
Рытнас Лёш удж вывсьыс воис, аддзис дона гӧтырсӧ да радысла муртса садьсӧ эз вошты.
— Машукӧ, зӧлӧта ёкмыльӧ, воин жӧ ӧд... Ме тэнӧ виччыси да виччыси, весиг чайті, лунвыв саридз дорас и кольччан! — нор гӧлӧсӧн шыасис сійӧ. — Сэсся ме тэнӧ ӧтнадтӧ некытчӧ ог лэдз. Кыкӧн мӧдам, ковмас кӧ кытчӧкӧ ветлыны... Тшыг нисьӧ пӧт ола, няйтас пырзи.
Машалы сэсся некымын шойччан лун ковмис идрасьны, весиг нарошнӧ пывсянсӧ ломтыліс, тасьті-паньяссӧ да гырнич-кастрюляяссӧ медым мыськавны да ӧкмӧм паськӧмсӧ пеславны. Лёшӧн ньӧбавлӧм дозмуксӧ кӧсйис бӧр лавкаӧ нуны, та мындаыс пӧ миянлы нинӧмла, но Лёш эз сет. Петкӧдавлы пӧ сарайӧ, оз тай горзы. Коркӧ пӧ, гашкӧ, ковмылас на...
