ВОЙЯСЫС КУЗЬӦСЬ


Войясыс лоисны кузьӧсь,
Кӧч бӧж кодь дженьыдик — луныс.
Пармаыс ланьтӧма-узьӧ,
Лым пиӧ вӧр-ваыс суніс.

Шочаник мыччысьлӧ шонді,
Ёнакодь дышалӧ сійӧ,
Сы моз жӧ дышавны понді,
Ог босьт тай ачымӧс киӧ.

Тӧв шӧрыд — медся лёк кадыс,
Сы дорӧ некыдз он велав,
Быдмигӧн вӧлі тай радыс:
Мыйта кӧть лым пиас келав.

Ӧні кӧть дась да ог вермы
Ывлаӧ весигтӧ петны,
Пӧрысьлы мый сэсся керны:
Мӧвпъястӧ гартны да летны.

Войясыс ӧні зэв кузьӧсь,
Шондіыс оз шонты Мусӧ,
Пӧрысьлӧн ловйыс тшӧтш мудзӧ,
Виччысян тувсовъя русӧ.