СЬӦВМА АНЬ


Зэв и сьӧвма аньыс тайӧ,
Шань да мелі,
Сыкӧд веськавлан нач райӧ:
Радлӧ тэлы.
Бур кыв сійӧ тэныд шуас:
Небзьӧ сьӧлӧм,
Сыкӧд мусмӧ гӧгӧр муыс
Весиг, вӧлӧм.
Йӧзкӧд ӧтув сёрни аддзӧ
Тӧлка мортыд,
Быдӧнкӧд ӧд бара-й ладмӧ
Мелі ёртыд.
Оз тай лыддьысь аслас кадӧн,
Отсӧг сетас,
Тэ дорын ӧд быттьӧ матын
Шонді петас.
Зэв и сьӧвма тайӧ аньыс —
Варов, мелі,
Шоч ӧд ӧні татшӧм шаньыс,
Мый кӧть керин.
Сы водзын ӧд ме уджйӧза,
Тӧда бура,
Шуда олӧм сылы вӧзъя
Шань кывбурӧн.