МЕНАМ ЭММА ЧОЙ


Тэнад мыгӧрыд юрӧ эз коль,
Весиг фотоыд вошӧма важӧн нин,
Тэнад синъясыд — сьӧд сэтӧр моль.
Тэнӧ казьтыліг, синъясӧй вазьӧны.

Менам мусаник чой — двӧйни пӧв,
Сылы чужнысӧ Енмыс ӧд шулӧма.
Кымын во нин со ола ме чӧв:
Мыйла ме пыдди чоюкӧй кулӧма?

Эмма, Эммочка — мичаник чой,
Век на лыддя ме мыжаӧн ачымӧс.
Курыд синваӧн мам кольтіс вой,
Чайтіс, дзолюкыс енэжӧ качӧма.

Эмма, Эммочка,  тэ ӧд он тӧд:
Миян нӧшта на чой-вок чужисны,
Но ме некыдзи некор эг нӧд,
Мый и найӧ тэ дорӧ вуджасны.

Тэнӧ некор эз аддзыв ӧд бать,
Эз лэдз гортас Ыджыд тыш-косьыс,
Тэнӧ сывъявны вӧлі ӧд дась,
Сӧмын кузяммис сылӧн чомкостыс.

Менам мусаник чой — двӧйни пӧв,
Сӧмын ӧтчыд мен вӧтын петкӧдчин,
Пӧльлӧн керкаын — дзик шы ни тӧв,
Тэ — ичӧт — ме дорӧ матыстчин.

Тэнӧ топыда сывъялі сэк,
Бӧрддзи нораа курыд синваӧн,
Тайӧ вӧтыс ӧд син водзын век.
Мыйла мунін ми дорысь, Эммаӧй?