ПӦРЫСЬЫДЛЫ РЫТЫД КУЗЬТӧвся рытыд зэв и кузь, Кодӧскӧ кӧ виччысян, Сэсся войбыд на он узь: Кор и шонді мыччысяс… Тӧвся рытыд зэв и кузь, Телевизор гажӧдӧ, Киносериалыд кузь, Унтӧ бара пальӧдӧ. Тӧвся рытыд зэв и кузь, Тӧвлы пом оз тыдав и, Эм кӧ паччӧр, каян гузь, Сэн на мыйкӧ дыдан и. Тӧвся рытыд зэв и кузь. Кор и воас тулысыс… Войнас быттьӧ ачыд сюзь, Кевмысян и пуыслы. Войвылад ӧд рытыс кузь, Пӧрысь мортлы сьӧкыд ӧд, Но он пукав кык ки рудз, Сюрӧ жӧ тай нокыд ӧд. Мыйкӧ ноксян рытывбыд: Кысьыштан ли вурсьыштан, Каньлысь вӧдитыштан гыд, Йӧлӧн сійӧс вердыштан. Пӧрысь мортлӧн вошлӧ ун, Важыс усьлӧ дум вылад. Олӧмсьыд ӧд нем оз вун, Быдторсӧ тай казьтылан. Челядь вӧсна тӧжд оз быр, На вӧсна век шогсьыштан, Мед жӧ позныс шудӧн тыр, На дорын и ноксьыштан. Тадзи кольӧ быдса вой: Думъясын да вӧтъясын, Син водзад и вок, и чой, Олан натӧг, ӧтнасӧн. Син водзад — и бать, и мам — Кӧдзыд муын узьӧны, Найӧ сетлісны вын-сям Кузь олӧмсӧ вуджӧмын.
