ОЛӦМЫСЬ ЛИСТ БОКЪЯС


Олӧмысь лист бокъяс листала
Нач нин фотоальбом.
Быдтор мӧй йӧзыслы висьталан…
Коркӧ ӧд вӧлі жӧ том.

Вӧтын моз корсюрӧ аддзыла
Кузь туйысь унатор ме,
Бать-мамӧс, чой-вокӧс казьтыла,
Натӧг ӧд зэв сьӧкыд мен.

Гажыд и шогсьӧмыд, муслуныд
Некор, дерт, дзикӧдз оз вун.
Дум вылад быдторыс усьлывлӧ:
Кольӧмас он тай на сун.

Быдтыси ӧтнамӧн сьӧкыда,
Аслам ӧд позйыд эз вӧв,
Оланін вежлавлім тшӧкыда,
Пансьыліс тӧждыс выль пӧв.

Шань йӧзсӧ тшӧкыда казьтыла,
Налӧн ӧд бурлун оз чин,
Весиг ӧд корсюрӧ вазьылӧ
Бур мортӧс казьтыліг, син.

Кодыр мен отсӧгыс вичмыліс,
Коді мен нюжӧдліс ки,
Вотӧс моз бурыс сэк кисьмыліс,
Шаньлуныд ӧзйӧ кыдз би.

Вӧліны, эмӧсь лёк вӧчысьяс,
На вылӧ лӧгсӧ ог кут.
Олӧмыд сетсьӧ кӧть ӧтчыдысь,
Сыын и ставнымлӧн шуд.

Олӧмысь лист бокъяс листала
Нач нин фотоальбом,
Быдӧнлы восьсӧн ме висьтала,
Ловйыд тай быттьӧ век том.