БӦРД КӦТЬ СЕРАВ


Тешкодь муслун менам вӧлі,
Кӧть тэ серав, кӧть и бӧрд,
Ӧти мусук быдтор сӧрис,
Кывйыс мыйсӧ эз и герт…

Радейта пӧ тэнӧ ёна,
Тэысь некод абу бур,
Тэ пӧ меным зэв и дона,
Сиа, шуӧ, тэд кывбур.

Шуӧ, йӧзӧда газетын,
Сӧмын радейт менӧ тэ,
Кывбур регыд сэні петӧ,
Ог ӧд пӧръясь, шуӧ, мен.

Мусукыдлы эски ачым,
Чайті збыльысь: мортыс шань,
Сьӧлӧм енэжӧдз кӧть качӧ,
Ме ӧд сылӧн — муса ань.

Мыйкӧ мында кадыс гывстіс,
Кывбур газетын эз пет,
Коркӧ сэсся бара-й ыстіс
Сӧмын ичӧтик привет.

Мӧд аньлы нин мусук сӧрӧ,
Тэ пӧ менам медся бур,
Кывйыс ёна сылӧн вӧрӧ,
Сиӧ сылы нин кывбур.

Шуӧ, йӧзӧда газетын,
Сӧмын радейт менӧ тэ,
Кывбур регыд сэні петӧ,
Ог пӧ пӧръясь некор ме.

Татшӧм пӧръясьысьыс уна,
Нывъяс налы — ворсантор,
Налӧн кадыс ӧдйӧ мунӧ,
Ылӧдчыны нем оз сор.

Тешкодь муслун вӧлі коркӧ,
Ог и серав, ог бӧрд ме,
Татшӧм мусук олӧм торкӧ,
Эн жӧ эскы сылы тэ.