* * *

Томлунад тай бара он на кос,
Пӧрысьмыны некыдзи эг чайтӧ.
Томдырланьыд он тай нюжӧд пос,
Он ньӧб сійӧс долларӧн ни шайтӧн.

Коркӧ ӧд и быдӧн вӧлім том,
Сійӧ кадсӧ донъявны эг кужӧй,
Оланінным вӧлі нач нин чом,
Тӧдлім ставӧн уна тужа-нужа.

Тшыгъялӧмтӧ бура тӧдлім ми,
Челядьдырті вуджис косьыс-тышыс.
Батьтӧг коли уна ныв да пи,
Сійӧ кадӧ эз вӧв ньӧти дышыс.

Быдӧн водзын сувтіс ӧти мог:
Кыпӧдны войнаӧн кисьтӧм овмӧс.
Вир кисьтана тышыс — ставлӧн шог,
Верстьӧяскӧд уджавны тшӧтш ковмис.

Пӧрысьмим да лоис миян мыж,
Быттьӧ эг и мырсьылӧ ми коркӧ.
Но ӧд миян кывным абу ныж,
Тыр-бур ладсӧ некор кӧть ог торкӧ.

Аддзысьлам на тшӧтшъяяскӧд кор,
Ставныс найӧ меным зэв и дона:
Чужӧм — чукрӧсь, юрсиныс нин дзор,
Но ме аддза быдӧнӧс на томӧн.

Томдыр кадыд некор, дерт, оз вун,
Сьӧкыдсӧ кӧть ковмис венны уна.
Томдыр кадад он нин сэсся сун,
Тӧдлытӧг тай кадыс ӧдйӧ мунӧ.

Томлунад тай он на бара кос,
Оз нин сылань миян туйыс югды.
Миянысь ӧд вӧлі жӧ тай гос.
Бур олӧмӧ эскыны эг дугдыв.