* * *

Ог нин казьтыв, дзикӧдз вуніс
Туйыс, коді шуштӧм мен,
Вунӧдлытӧм лоис луныс,
Кодӧс козьналін мен тэ.

Ог нин казьтыв, дзикӧдз вуніс
Вӧвлӧм муслун, тӧжд и нок.
Ӧні тэкӧд райӧ суні,
Тэкӧд некор оз ло лёк.

Ог нин казьтыв, дзикӧдз вуніс
И ӧбида, и лӧг кыв.
Мӧд туйӧ нин кежи-муні,
Сьыла мыла сьыланкыв.

Ог нин казьтыв, дзикӧдз вуніс
Узьтӧг кольӧм уна вой,
Тэкӧд гажа, кыпыд луныс,
Тэкӧд бурдіс сьӧлӧм дой.

Ог нин казьтыв, дзикӧдз вуніс
Вӧвлӧм муслун, зык и гаж,
Сэсся нинӧм татчӧ шуны,
Кольӧм муслун — менам блаж.

Ог нин казьтыв, дзикӧдз вуніс
Синва кисьтан, шуштӧм кад,
Вошис-сылі мустӧм туныс,
Миян муслун — мича сад.